ماضي لا ينتهي

الحلقة ٤١

#ماضي_لا_ينتهي
#بوسي_مصطفى
___________

الحلقة ٤١

في دمياط... في فيلا شوقي.

قام عادل من النوم وهو بيدور علي التليفون.
تامر بصوت ناعس : ايوه يا عادل متصل دلوقت ليه؟؟
عادل : تامر بلاش تقتل ليان
شوف طريقة تانية علشان خاطري
بلاش نودي نفسنا في داهيه
البوليس هيعرف مين اللي قتلها
ووقتها أنا وأنت هندخل السجن واحتمال نتعدم
كمان.
تامر : انت بتقول ايه يا مجنون انت
مين قال إننا هنقتلها
انت بتألف من دماغك وانت نايم ولا ايه؟؟!
عادل : كان حتة حلم.. بس ايه مرعب بشكل يسيب
الأعصاب
تامر : طيب روح كمل نوم يا اخويا.
ولما تحلم بحاجه متتصلش بيه سلام
عادل : لا سلام ايه
انت تقولي هتعمل ايه في حوار ليان دا
تامر : مش قولت هتعرف في الوقت المناسب
المهم دلوقت متخليش ابوك يكتب حاجه للبت دي
عادل : ازاي بقى يا فالح هنحجر عليه ولا ايه؟؟!
تامر : طب م تسيبني انا اخطط وامخمخ كده براحتي
وبعدين هو انا مركز دلوقت في حاجه اصلا علشان اقولك
يا ابني روح كمل نوم بقى
ضيعت عليه الحلم الجميل اللي كنت عايش فيه دلوقت
عادل : يعني انت تحلم حلم جميل وانا في نفس ذات
اللحظة أحلم بكابوس زي ده
تامر : هو انت هتنبر عليه في الأحلام كمان.
اقفل يا عادل... سلام
وقفل تامر التليفون
عادل : يا ترى ناوي على ايه
يا تامر
وانا اشغل دماغي وافكر ليه
خليه هو يخطط ويمخمخ زي ما بيقول واكمل نوم بقى
كويس اني فوقت من الكابوس ده.
____________

في شقة دكتور مروان
قاعدين على السفرة ما عدا الولاد.. أكلوا من بدري علشان يناموا عندهم مدرسة الصبح.
طول الوقت ومروان بينظر ل ليلى بنظرة حاده
بتحاول تتجاهل نظراته ليها
لكن في النهاية مقدرتش وقامت ليلى من على السفرة
سليم : رايحه فين يا ليلى
ليلى : الحمد لله
شبعت هدخل اوضتي.
فريال : هي أكلت حاجه؟؟
طبقها زي ما هو.
نظر سليم لوالده لانه كان واخد باله من نظرات
والدة ل ليلى.
شوية ودخل سليم ل ليلى.
ليلى : مش عايزة اكل يا سليم
سليم : يعني هتنامي يا ليلى؟؟!
ليلى : ايوه
سليم : خلاص بلاش تاكلي
وقومي ندردش شوية
ليلى : مليش مزاج علشان خاطري سيبني أنام
سليم : كده.. طيب تصبحي على خير.
وخرج سليم من الغرفة.

في غرفة دكتور مروان.
فريال : ليه كده يا مروان
انت طول عمرك بتحب ليلى
ودايما تقولي ابنك طايش وليلى
عاقله مش هيتفقوا مع بعض
وانا كنت ازعل منك.
واقولك يمكن علشان شخصيتهم مختلفه
دا يكون سبب إنهم يكملوا  بعض.
مروان : كنت يا فريال
بس معرفش إن دماغها بالشكل دا
ضيعت ابنك وخسرته كتير.
فريال : معلش كله بيتعوض
المهم إنهم بخير.
مروان : عاجبك قعدة ابنك في البيت دي
وحضرتها نازله بكره تشتغل في جورنال تاني
هيبقى كويس لما تشوفيها نازله الشغل
وابنك نايم جوه.
فريال : لأ مش هبقى فرحانه طبعاً
بس سليم قال إنه هيشتغل قريب
في قناة جديدة  وكمان بيقول الراجل صاحب
القناة بيثق فيه جدا.
مروان : وانتي صدقتي بقى
فريال : وهو هيكدب ليه يا مروان
مروان : انا مبقولش إن سليم بيكدب
بس الكلام اللي قاله ليه دا في حاجه مش مريحاني
مخلياني مش عايز الموضوع دا يتم.
فريال : ليه بس دا انا فرحانه من وقتها
وحاسه كمان إن نفسيته ارتاحت كتير عن الأول.
بلاش تنكد عليه يا مروان
مروان : ليه ما هو فايق ورايق وعمال يهزر مع مراته مشفتهمش ولا ايه.
مروان : روحت انت بقي تنكد عليه وعلي مراته.
مروان : ليه عملت ايه
هو أنا كلمتها
فريال : هو انا مشوفتش بصتك ليها
دي قامت من على الأكل ممدتش ايدها في الطبق بتاعها
ودا لازم يزعل سليم
مروان : شغل العيال دا انا مبحبوش يا فريال
اللي عايز ياكل ياكل.
فريال : طيب تصبح على خير
مروان : رايحه فين
فريال : خارجه اقعد في الصاله