الفصل الخامس عشر من رواية شمس تتحدى الغيوم
بقلمي :عبير سليم
💖💖💖💖💖💖💖💖
يعود يزيد الى المنزل وبصحبته عمر وسيف الذى رغم انتقاله الى شقته الا ان يزيد يصر عليه بين الحين والآخر أن يأتى معهم إلى المنزل لتناول وجبة الغداء
يدخلون المنزل فيجدون هاله وشاكر وعهد وعاليه وعشق جالسين فى انتظارهم يتحدثون
يزيد:السلام عليكم ورحمة الله وبركاته
فيرد:وعليكم السلام ورحمة الله وبركاته
شاكر:حمد الله على السلامة يا ولاد
يزيد:حمد الله على سلامتك انت ياحاج ثم يقبل على يديه ليقبلها:والله وجودك وسطنا وقعدتك بيننا أحلى حاجه فى الدنيا كلها
شاكر :ربنا يخليك ياحبيبي وميحرمنيش من وجودكم حوالية
ثم يتقدم يزيد نحو حبيبته ويسلم عليها كالعاده
بينما يجلس سيف وعمر حيث كان كاشر عبوس الوجه لا يتحدث إلى أحد فى حين كانت عهد تنظر إليه بين الحين والحين كان سيف أيضا ينظر إليها بين الحين والآخر
قام الجميع للتجمع حول المائده بينما أجلس يزيد عشق على قدمه ليؤكلها فى فمها
وكان أيضا لايتغافل عن محبوبته التى كان يحرص على وضع الطعام فى فمها
عاليه :حبيبي كل انت انا باكل والله انت جاى تعبان ومحتاج تاكل كويس ومتتعبش نفسك عشان ترتاح
يزيد:حبيبتى انا لما بشوف بابا صحته كويسه وماما مهتميه بيه وواخده بالها منه فينظر إليه عمر نظرة تنم على غضبه من هذه الكلمه ولكنه يكتم غيظه
ثم يستكمل يزيد كلامه ولما الاقيكى انتى وعشق كويسين انا كده حرتاح وحكون بخير
عاليه:ربنا يريح قلبك ياحبيبي يارب
شاكر:مالك ياعمر من ساعة مادخلت وانت لا ويلنا بوزك ومنطقتش بكلمه هو حصل حاجه فى الشركه
عمر:اسأل البيه ابنك اللى نزلنى وجابنى بالاجبار عشان يقرطسنى ويخلينى مرمطون
شاكر:ايه الكلام ده ياعمر فى ايه يايزيد عمر زعلان ليه وايه معنى الكلام اللي بيقوله ده
يزيد وهو يضع الطعام فى فم عشق :بابا حضرتك بتثق فية واللا لاء
شاكر :أكيد طبعاً بس ايه علاقة ثقتى فيك بالكلام اللي عمر بيقوله ده يعنى هو ملوش لزمه واللا إيه لازم تدى لأخوك وضعه يابنى
عمر:قلله يابابا ده مخلينى تحت امر حتة بت لا راحت ولاجت متعقده من عيشتها بتتحكم فية وبتعرفنى الصح من الغلط باينلهاعاوزة تطلع عقدها علية
يزيد وهو ينزل عشق من على قدمه:عمر اتكلم بأدب شمس من اكفا المهندسين عندنا وشغاله معانا من سنين وفاهمه هى بتعمل إيه كويس
عاليه:فعلا ياعمر انا اعرف شمس كويس دى ماشاء الله عليها فى الشغل وطول عمر يزيد بيثق فيها جدا
عهد:ايوة بس عمر ليه شخصيته ومينفعش حد يتنطط عليه
عاليه:عهد اسكتى انتى ملكيش دعوة ومتدخليش فى اللى ملكيش فيه
فتشعر عهد بالاحراج
عمر:هو حرام يعنى ان حد يدافع عنى واللا ايه انا مش فاهم الصراحه انا حاسس ان كل اللى فى البيت هنا ضدى
كانت هاله لا تشاركهم الحوار على الإطلاق لأنها تعلم جيدا موقف عمر منها ولاتدرى بماذا سيتفوه لسانه اذا نطقت بحرف ولذلك فهى تفضل السكوت دائما أثناء تجمعهم وتشغل نفسها بأى شئ عدا مشاركتهم فى الحديث
