هذا الرجل ....أبوك 💚💙
🎆الحلقة السابعة : القسم 2 🎆
**********
من غير لا يكون عندو شعور ،لقى روحو يتبسم وهو يرى فيها تاقف بثبات و قوة قدام فلاشات التصوير والكاميراوات، كانت متكاملة مع الروبة واامكياج والضو ...هكا امو ماهيش باش تندم لانها اختارتها ، كيف فاق على روحو وخزر على اجنابو يشوف في التأثير ايلي خلاتو تولين ،نجم يسمع تلاثة رجال يحكو في مابينهم عليها ،واحد كان راسو شايب اما الزوز الاخرين اصغر منو ببارشا تقريبا نص عمرو ، كرجل نجم يفهم خزراتهم ليها ، كانو يراو فيها بدن مرا يشهي حرك فيهم احساس الرغبة ،بلع ريقو ولهى بروحو بحاجة اخرى ...طبيعي يشوف حاجات كيف اكاكا ..شنوة مستني ..ناس تستغفر والا تصلي ع النبي ، لكن حواسو مازالت مركزة مع التلاثة هاكم ،خاصة حاسة السمع ايلي تركزت في شنوة يقولو ،كان الشايب هو ايلي يحكي ،ماكانتش بالعربية ونجم يفهم انها طليانية "متخيل تكون هاكي على طاولتي ،الا مانسكر من غير كاس "
ضغط صوابعو وقت سمع الزوز الاخرين يضحكو واحد منهم تكلم بنفس لغة الشايب " ع العكس كل شي فيها يخليك صاحي ومركز ، لانو وقت تتلمس بدنها ضروري تتحسسو مليح بصوابعك "
كمل الاخر على مرمة احمد وقت تمادى في خيالو عليها " انا ...نرى انها بها اللون الغامق وفمها ايلي يشهي ماانجم الا نضرب ***** نخليها تحت ساقي "
ضرب احمد الكرسي وقام من بلاصتو ، كلاتو صوابعو باش يعطيه بونية يوريه شمعناه تحت الساقين ،لكن العرض مهم ليه ولامو وخاصة لتولين ايلي ضحات بارشا باش تاقف فم ، لازمو يخرج يشم طرف هواء ويبعد من فم والا باش يفقد اعصابو بالحق ....هزت وفاء عينها في الراجل الطويل ايلي وقف قدامها وبدا يغطي فيها ع العرض ،لكن وقت رات بدنو ...وشافت لون عينيه و لحيتو وشعرو المنظم ،قعدت مثبتة فيه وقبل ما يفوتها قرات الاسم ع البادج المعلق في كرومتو ،احمد....وتابع ناز ...يعني هذا يتبع المصممة ايلي تحبها ومسؤول في الشركة ايلي تلبس منها وتحب تختار من الكولكسيون متاعها المعروضة قدامها ، قعدت في خشمها شوية من ريحة برفانتو خلات بدنها يقشعر وحدو وماتعرفش علاش ...الراجل بوڨوص ع الاخير وتونسي ومن ناز ....تبسمت فرحانة للخاطر ايلي جاء لبالها وهو فيه ...تلفتت لخوها لقاتو مركز بكل ماعندو فيلي واقفة بالفيولاي وتخزر للحاضرين قبل ما تتقدم زينب وتشدلها يدها ، يعني ها الطفلة نجمت تشد انتباهو رغم ايلي تعدو قبل وبعدها ،مالت عليه "اسمها تولين ...كان تحب نعطيك الانستا متاعها ...انا ديجا نتبع فيها " غمزتو وقت دارلها موش فاهم قصدها ،لكن مانجمش يبعد عينو اكثر من اكاكا ،رجع يتفرج فيها ومكنت بدنو برودة حسها تسري فيه وقت شافها تخزر ناحيتو ...هاك العينين عبارة سلاح صابو عقلو وقلبو. ..هي....الطفلة المتكاملة ايلي رسمها في خيالو .
ماتعرفش وينو ...ووين مشى ...وجودو في الصف الاول عطاها قوة عظيمة ونسّاها الرعب ايلي حسّت بيه قبل ماتدخل..لكن علاه في اللحظة هاكي ماهوش موجود ...خصوصي انو الكل وقفولها وصفقو باعجاب ...حست بيد زينب تتحط على ظهرها وتشاورلها باش ترجع للوج ...فاقت من شردتها ومشات تتمايل من غير ما تنسى تعفس مليح على ساقيها وماتبينش الوجيعة... الوجيعة ايلي خلتها اول ما تقعد تسيب روحها للبكاء ...وصلت للتوب من التحمل ومعادش تنجم تزيد ، جات جيهان جنبها وعنقتها "برااافو ...برافو ..."
ثنت زينب ركبتها وقعدت قدامها خلات العارضات يستغربو ويبهتو من التصرف هاكي ،خذات يدها " تولين انت ....تخلقت باش تكون عارضة "
الكلمة شجعتها خلاتها تزرع ضحكة من بين الدموع .
عضت ريما شفايفها لين قريب تجرحها من الغزول وبعد مارات الناس الكل مرة اخرى مصبوبة على غريمتها ،عرفت انها لازم تتصرف وتتخلص منها باي طريقة والا باش تخسر كل شي ...
خذى هواء عبى رواريه ومن بعد نفخو ،قعد يعاود في الفازة بارشا مرات لين حس انو اعصابو بدات تشد بلاصتها ، نعوشتو شوية برودة النسمة وعاونتو باش يزيد يهدى ....وقيت باش يرجع لداخل .. اكيد العرض كمل والناس تسأل ع المدير التنفيذي لناز ...لذا لازم يكون موجود ...وزيد لازمو يهنيها ...هي تاثق فيه ومأمنة بروحها بحكم هو مآمن بيها كيف ماقالتلو ...مالازمش يخذلها خاصة بعد ايلي عملتو ....خلى الصحافة لامو و لجيهان وبقية المصممين وشوية من العارضات ...وتلهى باومور ادارية اخرى ...لقى روحو يفضى كان بعد ساعة ونص بالضبط...جبد امو على جنب وسألها بلهفة " تولين وينهي ...مانيش نرا فيها "
تنهدت " تولين ساقها وجعتها بارشا ...بعثتها مع واحد من الاولاد للسبيطار ...قلت نطمن عليها وتكون على عينين المختصين بعد التعب ايلي تحملتو ليوم "
"امي ...اتلهى بالباقي يعيشك...انا لازمني نشوفها "
"داكوغ عزيزي ...برا "
شافتو يبعد وهو يزرب لو ماجاش مقدر الوضع كان يجري اما اش باش يقولو عليه...اذا حد من الصحافة خطفو وهو في هاك الحالة.... يعني انت تحبها....مانعرفش يا وليدي اذا نفرح لانو لقيت الحب بعد ها السنين والا ومع مرا قوية تقاوم لاخر نفس...والا نحزن لانو اخترت وحدة غير ايلي ترضى عليها العايلة....حد مايعرف هي شكون والا بنت شكون والا شنوة عايلتها ...نتمنى تكون لايقة بيك وباسمك ...والا باش تتعب واتعبنأ
💙💚
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Cerita Pendek★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
