قدرنا زواج (باللهجة الليبية)

البارت الاول

السلام عليكم .. كيف حالكم؟
انا انوار مواليد 2000 بنية وحدة وفوقي خمسة خوت وتحتي واحد من بنغازي نكره جنس آدم كره يا رب اغفرلي وخلاص يا اخي تحسهم بلا قلوب مزعجين فالحين كان في اللعب بني نحنا بنات حواء!! مش هادا موضوعنا تعالوا معاي نحكيلكم القصة...
__________________________
-انوار تعالي يابنت وينك؟!
-باهي ياماما مش فاضية نغير في لامبة الدار
-شن اديري؟!
-نغير في اللامبا ولادك ميبوش يغيروهالي
نزلت لامي وقلت نعم يا امي شن فيه!؟
-ديري معاي العشي
شبحتلها بصدمة وقلت علاش اني!؟
-في غيرك هوا
اااااااه النم وخلاص علاش معنديش خوات؟
-انا تو نديره ياماما انت اطلعي
سراج قال من بعيد متخليهاش بروحها في الكوجينة بالكشي اديرلنا سم
-والله ما تسكتش يا سراج نوريك هادي اختك تبليكمش الا الخير يا ولدي
وانا تمتم آيه نبيدهم كل خير غر نبي نذبحهم ونشرب دمهم بس لا اكثر ولا اقل
امي😳😳 شن قلتي؟!
انا توترت وقلت نكلم في الطنجرة على اللحم ماهو!
طبعاً انا نفسي منصدقش حاجة زي هادي نتخيل حد يصدقها؟! المهم قعمزنا نتعشوا وامي تهدرز على بوي وخوتي طبعاً انا الكلبة نأكل في صونية بروحي كيف اليهودية المستعبدة وهما مع بعضهم
امي-والله يا شبانيا سليمة وخيتي مدايرة عرس والدها وعزمتنا السبوع الجاي لازم نمشواْ
اني تحمست وقلت-آيه يا بابا قداش ليا محضرتش عرس وعراس الولاد حلوة...
سراج-تو انت من جاب سيرتك
مالك-والله مندري كل شي حاشية خشمها فيه سبحان ربي
اني تكنطيت من حماقتي حطيت الصونية متعتي المليانة مكرونة فوق رأس سراج وجري بسرعة 180 كيلومتر في الساعة لغرفتي وهوا يصيح ينادي عليا وانا قعمزت حمقانة واتصلت بي صديقتي لينا...
-والله يا انوار كان تشوفي عيونه ولا شعره يجنن!
-بالله فكيني من دوتك اللي مليهاش نهاية على فلان شفته في المحل وفلان غمزلي في المول وانت حتى لو تمشي للمقبرة تشوفي حد يبكي تقوليلي بكيته حلوة
-هادا أكيدا سراج رافعلك ضغطك يا حيّة الْحَيَّات
-من غيره .. لكن انتقمت وبزعت فرق راسه المكرونة بش يتعلم معاش يطلبها غدى وعشاء
شوية وصوت طقان على باب الدار تقول فيل يرفس في الباب عرفته سراج اني خفت لكن معاي احتياطاتي مسكرة الدار والنسخة الاحتياطية في درج سيارة بابا اللي مفتاحها رايح في المطبخ ولما قالي نكسر الباب هنا الخطة ج وهيا ان ننزل من دروج البلكونة البراني ونمشي لحوش الجيران بكل بساطة يعني شن بيصير؟!
طبعاً بعدها روحت وركبت من نفس الدروج لكن كليت طريحة في الساعة 2:00 في أليل ماهو سراج كان يستنى امتا نطلع بش يضربني ولما طلعت من الدار باش نشرب حصل عليا .. هوا ركب وخلاني واني مشيت لدار كل واحد فيهم وخديت السورية العربية متعته وبديت نحدد فيهم .. مهما كانوا خوتي قاسيين عليا متحملش فيهم شي ومنقدرش نرقد الا لما نحدد لكل واحد حاجته!
مشيت للسطح بعد لا علقت بدلاتهم نبي نتفرج على الشروق لأَنِّي نحب نتفرج عليه لانه يخلي فيا نستريح .. لما وصلت تفاجأت لقيت مراد شاد مصحفه ويقرا ياناس صوته ملائكي حاجة خيالية قعدت واقفة نسمع فيه ونشوف للشروق المنظر مع الصوت خلاني احس براحة ماليهاش مثيل وبعد كمل مشيت بست راسه وقلت:ربي يثبتك ويوفقك تكمل مصحفه وتلبس أبويك التاج يارب
-امين .. علاش قعدا نايضة؟!
-لا له غر جيت نشوف في الشروق نحب نشوفه وانت!؟
-نحفض في اللي بنسمعه غضوة
-يارب ماتغلطش فيه بكل
ابتسم لي وناض خش الداخل واني قعدت واقفة نتفرج والنسمة تلعب بشعري يمين يسار بعدين نزلت طيبت الفطور وناض سراج لقاني ندير في الفطور مشي قالي باستفزاز-شن تحاولي تطلعي روحك فالحا باش ترفعك امك للعرس معاها؟
-لا .. برا نوض خوتك
بدّي يصيح بعصبية-مصح وجهك تحسابيني خدام ولا قرصون تندهي فيا ياللي متتحشميش وووو
-باهي النم تو نمشي اني
مالك-مش لازم أصلاً ناضوا من صياحك😄
-ماهو اختك تنده فيا تحسابني قرصون
بديت نبكي ورديت-وانت تنده طول الوقت خير منقولش على روحي قرصون؟! متقولش لأَنِّي بنت كل دم ولحم وكلنا نحسوا غير إنتوا قايمين خشومكم
ومشيت قربعت باب الدار بقوة جهدي وامي وبوي نسمعهم يهزبوا على خاطر اني قربعت ومهزبوش ولدهم اللي أمس ضربني واليوم يهزب اني بس اللي غالطة مع اني طيبت الفطور اني بس الغالطة في كل شيء
لينا اتصلت بيا وهيا تبكي استغربت!!
-خيريك لينا من زعل حبيبتي؟!
-والله امي حرجانة مني واني مقدرتش نعتذر منها تعالي حاولي تساعديني بالله عليك يا انوار
-حبيبتي شوية وا نكون عندك باْذن الله
نزلت وقلت لبوي-بنطلع يا بوي لينا تبيني ضروري
مراد وهوا بينوض-نوصلك اني بنطلع بنطلع هيا
فرحت وطلعت معاه قالي مالك-وين وشاحك؟!
-البسه انت اني منيش لابساته ومدخلكش فيا عندي بو
مراد-ماهو يا انوار منبولكش النار حني نبوك في الجنة
-ربي يهديني ان شاء الله
وطلعنا مع بعض وصلني للينا ومشي واني حاولت نفهم شن القصة وطلعت اتفه من التفاهة وفهمت كل وحدة وحلينا المشكلة وروحت للحوش .. طبعاً لما خشيت كان المكان هدوء غريب وبعدها ناداني لؤي
_____نسيت نقوللكم ونعرفكم بخوتي اسفة .. اول واحد سراج وهو كبير العيلة مواليد 89 وبعده مالك 91 وبعدهم رواد 93 وهوا أحب واحد في خوتي ليا بس هوا يقرا برا عنده منحة دراسية وبعدهم لؤي 95 بعدين مراد 98 وبعدين انا وبعدين خوي عبد الله 2005 وامي اسمها جليلة وبوي اسمه يوسف وهادي عليتنا____
مشيت للؤي وقالي-وين سوريتي؟!
-شوية ونجيبهالك حطيتهم لوطة
ونزلت خديت سوريته وتلاقيت مع سراج ماقلتش اي حرف ولا حتى سؤال ولا مناشبة
سراج-😳😳هادي مدايرة روحها حرجانة ولا شنوا؟!
-لؤي هاك سوريتك
خداها واني مشيت للدار لقيت امي تفتش في دولابي استغربت وقلت-شن فيه؟!
-والله قلت نطلعلها حوايج تختار منهم شن ترفع معاها للعرس قبل ما توصلي
جئت بست رأسها-اني يا امي منبيش منك تعبي روحك انديرها اني هادا بري اتريحي ولا وتي شنطك وخلي خوتي عليا يا الغالية
ابتسمتلي ومشت لدارها توتي في الحاجات واني كملت حاجاتي ومشيت دار خوي عبد الله شفتله شن يلبس وحطيتهم على سريره وبعدها لخوي لؤي بعدين مراد وكانوا الثلاثة مهناش ولما مشيت لمالك لقيته في الدار نرفزني لا النم وهوا هادي أخيه شعرك لونه زي الفحم ذوقك يع مش حياخذك حد وكأني قتله دور خطيب النم ووك .. لما وصلت دار سراج وقفت وقَعَدت نفكر نخش لا نخش لا وبعدين خشيت لقيتها حايسة زي اللي قبلها لكن معرفتش شن اندير نضمها ولا لا شفتله حوايج وطبقت دولابه وساويت الدار وحددتله وطلعت تلاقيت معاه فم الدار لكن فتت وسيبته واقف
سراج-😳😳هادي خيرها؟!
خديت حوايجي حطيتهم في شنطتي ونزلت بديت في الغدي والجمعة أذنت كل واخد من خوتي خذي بدلته ومشي للجامع واني سقيت الغدي كسكسي ومشيت توضيت صليت ونزلت حطيته وكل واحد يخش ورا التاني واني ركبت فوق وسيبتهم اتصلت بي لينا لقيتها تتغدى سكرت طلعت للبلكونة نتفرج على الدنيا شوية نسمع باب داري انفتح وتسكر تلفتت لقيته سراج يشبح لي رافع حاجبه شبحتله ببرود فقال-خيرك؟!
اني-☺️ولا شيء
ومشيت فتت من بحداه حركت شعري ضرب وجهه ونزلت لوطة للجنان نسقي في الورد وهوا نزل ياكل .. امي-باش ترفعنا يا سراج لحوش خالتك
-ترفعنا؟! انت ومن؟!
-اني وأختك أكيدة هادي لمن بنخليها وكلكم بتمشوا!؟
مراد-كان متبيش تو نرفعهم اني
سراج-لا نرفعهم اني عندي مشوار
اني-مش ترقد انت القايلة ولا شن فيه اليوم سراج يعرض في خدماته علينا!؟
عبدالله-اسكتي خير من يبطل
-آيه حق .. اني بنشري قفطان
امي-بقداش بنيتي
-لا يمة عندي حقه
عبدالله-متقوليش فلوس شهادة الثانوي قعدات داستهم!؟
-فلوس شن امالا .. شن بنشري بيهم غير قفطان أساساً شريت عدسات بشوية منهم وتوا قعد قفطان قلت نشريه لعرس ولد خالتي
سراج-هيا نوضوا .. وانت البسي وشاح
-من بيغسل الماعين انت مالا؟!
امي-بري نزل الحاجات واني نغسلهم
ركبت نزلت كل شيء وطلعنا واني ملبستش وشاح وناض سراج يهزب قتله-انت عرضت خدماتك وتتشرط زيادة هلبا علينا متبيش أهو مراد
مشينا وصل امي ورفعني للمحل .. نزلنا وبديت ندور هني وهني ولقيت القفطان اللي نبيه خشيت حجرة القياس ولبسته وناديت سراج قتله-شن رأيك؟!
-منعرفش فيها الحاجات هادي؟!
-شن دخل سألتك حلو عليا ولا لا اني؟!
-خوديه هيا بنروح نبي نرقد
خديته وخلصناه وطلعنا وبعدها سراج يسوق قعد يسوق في طريق اول مرة نشوفها لكن سكتت لأَنِّي ديما الطريق اللي تفوتوا منها نحس روحي اول مرة نشوفها😅
وقف سيارته في مكان وحط راسه على الدومان وقال بنفاذ صبر-انوار؟
-نعم!؟
-خير دعوتك اليومين هاذوا؟!
-لاشيء غر فديت من الاستعلاء عليّ ولما نطلب منكم طلب تطلعوا قرصون وانا قليلة أدب ومنتحشمش
-والمطلوب مني شنوا؟!
-ولا شيء
-اسف
شبحتله بصدمة😳😳سراج اعتذر توا!!
-شارب حاجة اليوم؟!
-لا
-بالك الصنة مدوخاتك؟
-لا!
-بالك حرارتك مرتفعة انت مريض صح؟
-لا مترفعيليش ضغطي
-بالك...
-خلاص صكري فمك😡
سكتت ولا كلمة بعدين ابتسمت وبست راسه .. وصلتي لحوش خالتي ولما جيت بننزل عطاني شكلاطة من دون لا يشوف لي واني خديتها وقتله صحيت وسكرت الباب وخشيت داخل طول...
زحمة من قبل سبوع العرس الناس همها كان تفرح وتفرهد ومفكرتش انها تضايق غيرها ووك
مشيت لخالاتي نسلم عليهم وبعدين سلمت على خالتي سليمة نباركلها وبعدين ركبت للبنات فوق...
سارة-اوووووو انوار خلوك الأسود هدوكوا تجي
منى-والله انهم مختلين ماعادا رواد
اني-مش حتاخديه ريحي روحك
شفت وحدة جديدة قلت-هادي منو؟!
مرام-هادي سيرين أمها بنت عن امي لكن يسكنوا في طرابلس ميجوناش ديما
اني-تشرفت
سيرين-بيك اكثر
وقعمزنا نهدرزوا اني ومنى ومرام وسارة وسيرين وقريب يجيوا الباقية
وريتهم صورة القفطان قالولي طالع عليك حلوو البسيه يوم السهرية