💕أنت قلبي٢💕

الحلقة ٢٩

#انت_قلبي٢
#بوسي_مصطفى
____________
الحلقة ٢٩

في فيلا مراد
نورهان : خلاص يا حبيبي مش زعلانه
كانت امل نازله من فوق
نورهان : رايحه فين يا امل
نظرت امل ل هشام
هشام : نور انتي أكيد بايته معانا هنا
نورهان : لأ
هشام : ليه بس
نورهان : انت ناسي الولاد ولا ايه
هشام : ما هما هيباتوا معانا هنا
نورهان : معلش يا هشام مش هينفع
امل : ليه بقى الفيلا ضيقه
ولا حاجه
مفيهاش اوض ولا سرارير
نورهان : معلش يا امل سبيني براحتي.
هشام : عمر مسافر ودي فرصة تقضي معانا كام يوم
نورهان : كام يوم ايه يا هشام؟؟
هشام : طب خلاص باتي الليلة والصبح ابقى روحي بيتك
علشان بس عايزك في موضوع مهم.
نورهان : طيب ما تقوله دلوقت
هشام : معلش بس رايح انا وأمل نطمن على اسر
نورهان : ماله اسر.. هو تعبان؟؟
نورهان : تعبان شوية هنروح نشوفه ونيجي على طول
خليكي صاحيه بقى
نورهان : طيب كان بودي اجي معاكو بس مش هينفع علشان لازم حد يقعد مع الولاد.
هشام : مفيش مشكلة... يلا
يا امل.
امل : يلا يا هشام انا جاهزة
________________

في البلد
في منزل محسن الجديد
محسن بغضب : بقى اطرد من بيتي يا سعيد !!
سعيد : معلش يا محسن مشي امورك اليومين دول لحد بس ما امي تكتبلنا اللي ليها وبعد كده ابقى ارجع براحتك
بس تحب على ايد امك وتتأسف وقتها ممكن تسامحك
محسن : واني هستفيد ايه بقى من الموضوع بتاعك ده
سعيد : مش فاهم
محسن : ما هو كده كده امك مش هتكتبلي حاجه بعد اللي قالته بنت كامل قصاد اهل البلد
سعيد : متقلقش اني هقول ل امك ان الموضوع ده ملوش علاقة ب اللي هتكتبيه يا أمه لينا وإن لازم يكون في عدل بينا في التوزيع.
محسن : بقى انت هتقول الكلام ده يا سعيد
سعيد : ايوه امال ايه فاكرني هوافق اصلا لو متوزعتش علينا بالتساوي؟؟!
محسن : طب اما نشوف يا سعيد
سعيد : متقلقش ولادك في عنيه
وهدى هتخلي بالهم منهم فوتك بعافيه.
محسن : متبقاش تعوق عليه علشان بزهق من القعدة لوحدي
سعيد : ابقى مشي رجلك لحد الغيط.
محسن : مش عارف امشي في البلد من تحت راس بنت كامل
بلاقي الناس بيتودودوا ورايا.
سعيد : معلش استحمل بقى لحد ما الناس تنسى.. سلام عليكم.
محسن : وعليكم السلام.
اه يا بنت كامل بس اللي طولني زمارة رقبتك كنت قطمتها وخلصت منك
أني تعملي فيه كده
تخليني مسخة البلد.. ماشي الحساب يجمع وهتشوفي.
_______________
في فيلا اسر
في الغرفة فوق
اسر نايم على السرير وقعد على الكرسي اللي قصاد السرير هشام
و سهر واقفه على الباب منهاره وبتبكي.
اسر : يا سهر قولتلك انا كويس
ليه كل ده انا لسه مموتش علشان تعيطي بالشكل دا
هشام : بعيد الشر عليك يا اسر
متقلقيش يا سهر دي حاجه بسيطه خالص وهيخف ويبقى كويس.
سهر : هونت عليك تخبي عليه يا اسر
لو انا معرفتش مين اللي عاوزة يعرف
مين اللي هيبقى جنبك في وقت زي دا
امل جات وقربت من سهر
هشام : خديها يا امل خليها تهدا شوية
امل : تعالي معايا يا سهر
اخدتها امل من ايدها وخرجوا من الغرفة
سهر وهي بتبكي : مقاليش ياامل على أي حاجه
اعرف من ابن عمه؟؟!
يعني يروح للدكتور وميقوليش
يتفق على ميعاد عملية مفروض هاتتعمل الشهر الجاي ومقاليش
بيجهز ورقة وبيحضر نفسه للسفر
كل دا من غير ما اعرف
امل : يا حبيبتي اهدي بس
انتي لازم تبقى أقوى من كده علشان ولادك
لما تعملي في نفسك كده
عاوزاهم هما يعملوا ايه
ولازم تعرفي إن كل شيء قدر ومكتوب
يعني لا معرفتك هتقدم ولا هتأخر يا سهر
واكيد هو كان له أسبابه
محدش بيبقى عايز يكون لوحده غير علشان يبعد أي وجع عن الناس اللي بتحبه
يبقى لازم تعذريه.. مش سهل ابدا
ولا الوقت اللي فات دا عدى عليه كده
اكيد كان صعب بالنسباله إنه يخبي عليكي وانتي
اكتر واحدة هتخافي عليه وهتتوجعي بخبر زي دا.
سهر : وما هو ياما اتوجع عشاني يا امل
كنت بنام على السرير وهو ينام جنبي على الأرض
علشان بس ابقى مطمنه وهو موجود معايا
كنت في عز تعبي وبصرخ وبكسر كل حاجه قدامي بلاقي حضنه يضمني ويهديني
كنت بضربه ب ايدي وأنا مش داريه ب أي حاجه حواليه
كان بيستلم ليه وكان ايدي كانت بتطبطب عليه مبتضربش
وقف كتير معايا كان ابويه واخويا وابني وحبيبي
وكل حاجه ليه
امل : كان ايه بس يا سهر
بلاش اليأس دا وادعيله يقوم بالسلامة
سهر : خايفه اوي يا امل
أنا معرفش اعمل حاجه لوحدي
هو بيعملي كل حاجه
وباخد رأيه في كل حاجه
انا مينفعش اعيش من غيره
انا ممكن اموت.
امل : ليه كل دا يا سهر
عارفه بقى هو كان معاه حق إنه يخبي عليكي
طالما انتي ضعيفه بالشكل دا
ومش مستحمله تستقبلي خبر زي دا.
حبيبتي بابا مراد عمل نفس العملية دي وقام كويس
وانتي كنتي شايفه بنفسك
ليه بقى القلق دا؟؟
هو بس أهمل في صحته
مع اني كنت واخده بالي منه كويس اوي
بس العامل النفسي مهم اوي
يا سهر
لو مش هتدعميه نفسيا خليكي بعيد احسن بلاش
يبقى ليكي تأثير سلبي عليه
سهر : غصب عني يا امل
غصب عني.
امل : طب ايه رأيك بقى إني متفائلة وعندي احساس
قوي ان اسر هيرجع بالسلامة احسن من الأول كمان
سهر : ادعيله يا امل
امل : وانتي كمان تدعيله وتبطلي اللي انتي عملاه
في نفسك دا.
سهر : حاضر.
امل : ايوه كده امسحى دموعك
واهدي كده.. كله خير متقلقيش.
________