Ang segundo ay parang minuto
Minutong katumbas ay oras
Oras na singtagal ng dantaon
Dantaon na pala akong nakabaon.
Bugbog sa sariling mga kamay
mata nalang ang walang latay
matang walang ginawa kundi
lumuha, tumangis sa bawat sandali.
Liwanag nasaan ka na?
ako'y hapong - hapo at hinihingal na
liwanag na dulot ay pag - asa
ikaw kaya'y darating pa?
Ako nga'y hindi nagkamali
sa iyong pagdating pagod ay dagling napawi
nakamit ang pinakahihintay na sandali
masinagan ang puso kong sawi.
Ngunit ako ay may takot
ang kasiyahan ay dagling maudlot
mapalitan na naman ito ng lungkot
ito pala'y isa ring salot.
Di ko na makakaya pa
masaktang muli at tuluyang madapa.
Iyo kayang pag ibig ay wagas
at mananatili hanggang wakas?
Pag-aalinlangan ay naisantabi
ika'y laging nasa aking tabi
naitama ang mga pagkakamali
nagliwanag ang animo'y laging gabi.
Ang segundo ay parang minuto
Minutong katumbas ay oras
oras na singtagal ng dantaon
pasakit man ang nadama noon
Pag ibig mo ang dala sa muling pagbangon.
