💕أنت قلبي٢💕

الحلقة ٣٠

#انت_قلبي٢
#بوسي_مصطفى
_____________
الحلقة ٣٠

هنادي قامت وعاوزه تخرج تمسك داليا ايدها.
داليا : تعالي بس يا هنادي رايحه فين؟؟
انتي زعلتي من كلامي ولا ايه؟؟!
هنادي بتبكي
داليا : يييييه عليكي يا هنادي بتعيطي ليه بس دلوقت؟؟
خلاص حقك عليه متزعليش مني
انا كنت بضحك معاكي.
بلاش طالما مش عايزة.
هنادي : انا جيت افضفض معاكي يا داليا انا بجد حاسه
إن طاقتي خلصت خلاص
عماله اجري علشان اخلص الطريق اللي ماشية في دا
وانهيه بقى واستريح بس
حاسه إني مبقتش قادرة أكمله لوحدي
مش عارفه انا عايزة حد معايا
ولا انا بتلكك وخلاص
وخايفه اللي يجي يساندني علشان أكمله.
يوقفني في نص الطريق
واتوه بعدها ملقيش نفسي
ولا الاقي الهدف اللي كنت عايزة اوصله اتحقق.
داليا : انتي بتفكري بس خايفه تاخدي الخطوة دي صح؟؟
صدقيني يا هنادي انا بكلمك لمصلحتك
انتي محتاجه راجل معاكي بجد
راجل يحميكي ويساعدك علشان تكملي طريقك زي
ما قولتي
الدنيا بقيت صعبه واديكي شايفه الناس عماله تنهش
في لحم
بعض  ازاي!
هنادي : يعني اللي مفروض لحمهم وعرضهم يا داليا عملوا فيه كده
هيجي الغريب دا ويحافظ عليه وعلي ولادي
داليا : يا ستي محدش يعرف
يمكن الغريب دا يكون احن على ولادك من اللي من دمهم.
هنادي : ممكن يعني احتمال يحصل او لأ
وقتها اعمل ايه يا داليا
بعد ما اضحي واقبل ادخل راجل غريب بيتي وابقى
متجوزه واحد تاني غير الراجل اللي حبيته
يطلع وحش بقى
ابص ازاي في وش طارق لما نتقابل يا داليا.. هه
قوليلي ابص في وشه ازاي؟؟
داليا : طب حاولي تهدي
اقعدي هعملك حاجه تهدي أعصابك.
هنادي : لا انا مروحه
داليا : يا بنتي استنى بس
طب اقولك تعالي نقعد في البلكونه تشمي شوية
هوا بدل الخنقه اللي هنا دي
هنادي يا هنادي اسمعيني
كانت هنادي بتفتح باب الشقة وخارجه.
انتصار : هو في ايه يا داليا؟؟
داليا بحزن : دي هنادي خرجت يا ماما
إنتصار : مالها يا بنتي سامعاها بتعيط
انتي قولتلها حاجه زعلتها ولا ايه؟؟
داليا : في دكتور زميل ليها في الكلية بيحبها وعاوز
يتقدملها
إنتصار : طب وايه المشكلة
داليا : خايفه تاخد الخطوة دي
إنتصار : يااختي تتجوز وتعيش حياتها دي لسه صغيرة
بس لو من سنها إنما لو كبير بلاش.
داليا : هو عنده حوالي أربعين سنه
إنتصار : كويس خليها توافق
داليا : بس هي كانت بتحب جوزها اوي يا ماما.
إنتصار : طب وفيها ايه بس؟!
وهي كده هتخونه لما تتجوز يا داليا؟!
هي بتتجوز علشان تحمي نفسها وولادها طالما الراجل
كويس
و يسألوا ويتأكدوا برضه
اما لو مش تمام بلاش خالص منه
داليا : يعني لو حضرتك رجع بيكي الزمن بعد وفاة
عمو يعني
كان ممكن توافقي تتجوزي.
إنتصار : لأ.. وهقولك ليه
الزمن يا حبيبتي بقى غير الزمن
الست دلوقت لازم يبقى معاها راجل
صحيح في ستات عايشة لوحدها وعارفه تصرف أمورها وواقفه على رجلها بس انتي عارفه بيتعرضوا ل ايه
عايشين حياتهم ازاي
الست لوحدها بتبقى ماشيه تتلفت حواليها يا بنتي
لكن لو ماشيه مع راجلها بتبقى مطمنه
زمان كنتي تلاقي الناس قافله بيوتها بالشكل ده؟!
دي كانت الشقق مفتحه على بعض والجيران كده زي الأخوات
تعالي دلوقت كل واحد بقى خايف من التاني
وكل واحدة خايفه على عيالها
ولا جوزها لصاحبتها تاخده منها
كان في حدود في التعامل بس بقى بعد ما الناس بقوا سايبنها سداح مداح كده
تلاقي دا يبص لمرات صاحبه ودا معرفش يبص لمين
دا كانت جارتي في البيت القديم
زي الأخوات كده مع بعض ناكل سوا ونقعد مع بعض طول اليوم لكن أول ما يجي ميعاد رجوع جوزها من الشغل تاخد بعضها ولا انا اخرج من عندها على طول
عمره ما جه ولاقاني موجوده عندها.
بقولك كده ليه
علشان دلوقت الحلو اتلخبط في الوحش
والناس مبقتش تفرق
ويقولك الستات كلها زي بعض
لا صوابعك مش زي بعضها
والست لما تكون وحدانيه بيطمع فيها دا سلو بلدنا
اللي مش عارفين نغيره
علشان كده بقولك في زمنا دا لازم صاحبتك يبقى معاها راجل.
داليا : قولت نفس الكلام دا يا ماما
بس ارجع واقول القرار دا اتأخر شوية علشان عندها بنت كمان
إنتصار : سنها كام سنه
داليا : من سن مروان ابني
عندها حداشر سنه
إنتصار : ما انا بقول لو راجل كويس تتجوز يا بنتي
اديكي شايفه عم ولادها عمل معاها ايه
داليا بحزن : صعبانه عليه اوى
غلبانه وطيبه وعايزة تعيش في حالها بس هما مش سايبنها في حالها.
إنتصار : عارفه لو هتقبل كلامي
ومش هتتحرج مني كنت كلمتها.
داليا : هي اكيد هتفكر واللي هتوصل ليه اكيد هيبقى
من وجهة نظرها صح
مش عايزة اضغط عليها اكتر من كده علشان مترجعش
تقولي انتي قولتي وعملتي.
خليها بقى براحتها.
إنتصار : طيب انزلي هاتي طلبات البيت قبل ما ولادك
يرجعوا من المدرسة.
داليا : حاضر هدخل اخد الشنطة من جوه.
__________