Amiss Prayer (Zawgyi&Unicode) [Completed]

Part-21(ရက်စွဲများ)

For Unicode
ရက်စွဲများ


‌ပျော်ရဲ့လားသခင်လေး... အနာပေးလိုက် ဆေးပေးလိုက်နဲ့ ကျွန်တော့်ကိုကစားရတာ ပျော်ရဲ့လား..။ အမျိုးသမီးတစ်ဦးကို ခေတ္တမျှတွေ့ရုံနဲ့ သခင်လေးရဲ့စိတ်တွေ အရောင်ပြောင်းကုန်ပြီလား...။ ဟုတ်ရဲ့လားသခင်လေးရယ်.. ကျွန်တော်ချစ်ခဲ့တဲ့သခင်လေးက အင်မတန် တည်ကြည်တဲ့လူသားပါ..။ ဘာကြောင့်အချိန်တိုလေးအတွင်းမှာ ပြောင်းလဲသွားတာလဲ။

သခင်လေးနှင့်မိမိတို့ စကားအချေအတင် ပြောပြီးနောက် သခင်လေးနှင့်မိမိ မျက်နှာချင်းမဆိုင်ခဲ့တာ ယခုတွင်နှစ်ရက်မျှရှိပြီ။ သခင်လေးကလည်း မိမိအား‌ ခေါ်ဆိုခြင်းမရှိသကဲ့သို့ မိမိသည်ကလည်း သခင်လေးထံ ခစားခြင်းမရှိ။ စိမ်းရက်နိုင်သူသခင်လေးက မိမိအားမခေါ်မပြောဘဲ နေနိုင်သည်ရှိသော်လည်း မိမိသည်က မနေနိုင်။ မျက်နှာဆိုင်တွေ့လျှင် မမြင်ချင်ယောင်ဆောင်ထားသော်လည်း ကွယ်ရာတွင် သခင်လေးကို ခိုးကြည့်မိသည်။ သခင်လေးသည်က မိမိရှိသည်ကိုတောင် သတိထားမိဟန်မတူ။

ဟူး... နေရခက်လိုက်တာ...။ ကျွန်တော်ပြောတာများလွန်သွားတာလား။ ဖြေရှင်းလို့ရတဲ့ပြဿနာလေးကို တစ်ယောက်နဲ့တစ်ယောက် ဖြေရှင်းချက်တွေမပေးဘဲ အပြစ်တင်ရာက ကြီးမားသွားတဲ့ ပြဿနာငယ်‌ပါ။ ဘာလို့အခု‌လိုတွေ ခက်ထန်နေရတာလဲ။ တစ်ယောက်နဲ့တစ်ယောက်ဖြေရှင်းလိုက်ရင် ရရဲ့သားနဲ့ ရှောင်နေတာက မဖြစ်သင့်ဘူးမဟုတ်လား။ ထားပါလေ သူ့ဘက်က စမပြောတော့လည်း ကိုယ့်ကပဲစပြောရတာပေါ့။

ထိုသို့ စဉ်းစားခန်းဖွင့်ပြီးနောက် သခင်လေးရှိရာ ခြံ၀န်းထဲသို့လိုက်လာခဲ့သည်။

“ သခင်လေး... "

“ ပြော "

“ သခင်လေး ဘာလို့ကျွန်တော့်ကိုစကားမပြောတာလဲဟင် "

“ ငါက အချိန်တိုင်း မင်းကိုစကားလိုက်ပြောနေရမှာလား နန္ဒ "

“ အဲဒီလိုတော့လည်း မဟုတ်ပါဘူး...။ သခင်လေးက ကျွန်တော့်ကို လုံး၀စကား မပြောတာလေ "

“ အမှန်တိုင်းပြောရရင်တော့ မင်းက သွေးနထင်လွန်းလို့..။ နည်းနည်းလောက် အခွင့်ရေးလေးပေးတာနဲ့ သိပ်ရောက်တတ်လွန်းလို့..။ သခင်ကို ပမာမခန့်လုပ်လို့ စကားမပြောချင်တာ "

ပြတ်သားလွန်းသည့် သခင်လေး၏ စကားများသည် နောက်ပြောင်နေခြင်းဖြစ်ဟန်မတူ။ တည်ကြည်နေသည့်မျက်နှာက သူ၏စကားများသည် အလွန်လေးနက်နေကြောင်း သက်သေပြ‌နေသယောင်။ သခင်လေး၏ ပြတ်သားလှသော စကားများကို ကြားသည်နှင့် တစ်ပြိုင်နက် မိမိပြောချင်သည့် စကားလုံးတို့သည် ခေတ္တမျှပျောက်ရှကုန်သည်။

ထို့နောက် ဆယ်စက္ကန့်မျှတိတ်ဆိတ်သွားသော ပတ်၀န်းကျင်ကို နန္ဒဘက်မှ စတင်ဖြိုခွဲလိုက်သည်။

“ သခင်လေး... မရှင်းလို့မေးချင်တာရှိတယ်။ သခင်လေးနဲ့ ကျွန်တော်တို့ကြားက ပြဿနာက အဲဒီလောက်ခက်ထန်စရာ လိုလို့လား။ ကျွန်တော်က သွေးနထင်ရောက်တယ်.. ပမာမခန့်လုပ်တယ်လို့ ပြောတယ်နော်။ ကျွန်တော်ဘာအပြစ်လုပ်ထားလို့ အဲဒီလိုပြောရတာလဲ သခင်လေး "

ကောင်လေးက တကယ်စကားတတ်သည်။ သူ၏အပြောများအကြား သူ့ကိုအပြစ်တင်ရန် တစ်စွန်းတစ်စ ရှာမိသည်။ အတော်ကိုပင် ရှာယူရပါသည်။

“ မင်း.. မနေ့ကပြောသွားတာကို မင်းမမှတ်မိဘူးလားနန္ဒ "

“ ကျွန်တော်ကောင်ကောင်းကြီး မှတ်မိပါတယ်သခင်လေး။ ကျွန်တော်မှတ်မိရသလောက်ကတော့ ကျွန်တော်မမှားဘူး ထင်ပါတယ် "

ထိုစကား ကြားသည်နှင့်တစ်ပြိုင်နက် စိုင်းထွဋ်ခေါင်သည် စိတ်တိုသော အမူအရာဖြင့် ထိုင်နေရာမှ ထလိုက်ကာ နန္ဒအား တင်းမာသော လေသံဖြင့်စကားပြောသည်။

“ မင်းပြောတာက ငါမှားနေတာပေါ့လေ "

“ သခင်လေးမှားတယ်လို့ ကျွန်တော်မဆိုလိုဘူး။ သခင်လေးနဲ့ကျွန်တော်နဲ့ကြားက ပြဿနာက အဲဒီလောက်ကြီးစရာလိုလို့လား‌ တွေးမိရုံပါ "

ဟုတ်ပါတယ်.. အဲဒီလောက်ကြီးစရာမလိုတဲ့ပြဿနာကို ကိုယ်က ပုံကြီးချဲ့တာပါ။ အကြောင်းရင်းကတော့ တစ်ခုတည်းပါ။ လက်တွဲခွင့်မရတော့တဲ့သူကို မျှော်လင့်ချက်တွေ ဆက်မပေးချင်ဘူး။ သူဒီထက်ပိုပြီး နာကျင်နေမှာကို ကျွန်တော်မလိုလားတာမို့ သူကျွန်တော့်ကို မုန်းသွားပါစေ‌တော့ ဆိုတဲ့ရည်ရွယ်ချက်နဲ့ ဒီလိုပြောမိခဲ့တာပါ။

“ သခင်လေး ကျွန်တော်ကို အကြောင်းပြချက်မရှိဘဲ ဘာကြောင့်ဒီလိုပြောနေတာလဲ.. ကျွန်တော်မသိ‌တော့ဘူး..။ ဒါပေမဲ့.. သခင်လေးကို ကျွန်တော်ပြောချင်တာက ကျွန်တော်က သခင်လေးရဲ့ကျွန်ပါ။ ကျွန်တစ်ယောက်ဖြစ်တာမို့ ကျွန်တော့်ရဲ့ခံစားချက်တွေကိုလျစ်လျူရှုတာမျိုးတော့ မလုပ်ပါနဲ့...။ ကျွန်တော်လည်း လူသားတစ်ယောက်ပါ ခံစားချက်ရှိပါတယ်..။ နှလုံးသား ရှိပါတယ်..။ နာကျင်တတ်ပါတယ်..။ ကစားလို့ကောင်းတဲ့အရာထဲမှာ နှလုံးသားနဲ့ခံစားချက်မပါတာကို သခင်လေးသိပါစေ "

နန္ဒ၏စကားအဆုံး၌ စိုင်းထွဋ်ခေါင်သည် လှောင်‌သော အ‌ပြုံးတစ်ပွင့်ကို ဆင်မြန်းလျက် ဆိုလာသည့်စကားသည် နန္ဒအား ၀မ်းနည်းမှုတို့ကို ဖန်တီးပေးသည်။

“ ဟက်... ဘယ်လိုလုပ်ရမလဲ..။ ငါက နှလုံးသားနဲ့ ခံစားချက်တွေကို ကစားရတာ သိပ်သဘောကျနေတာ "

ထိုအခါ နန္ဒသည် ၀မ်းနည်းမှုကို မျိုသိပ်လိုက်ကာ ဟန်ဆောင်အပြုံးလေး ဆင်မြန်းလျက် ဆိုလာသည့် စကားက စိုင်းထွဋ်ခေါင်အတွက် အထိနာလှသည်။

“ ဟုတ်ပါပြီ သခင်လေး..။ နှလုံးသားနဲ့ခံစားချက်တွေကို ကစားရတာ သခင်လေးသဘောကျတယ်ဆိုရင်လည်း ဆက်ကစားပါ..။ ဒါပေမဲ့ သခင်လေးရဲ့နှလုံးသားနဲ့ခံစားချက်တွေကိုပါ မကစားမိစေဖို့ ကျွန်တော်ဆုတောင်းပေးနေပါမယ် "

ဟုတ်ပါရဲ့ သူပြောမှပဲသတိထားမိတယ်။ ကိုယ်က သူ့နှလုံးသားကို ကစားမိရင် ကိုယ့်နှလုံးသားပါ ကစားခံရမယ်မဟုတ်လား။ ဘာကြောင့်ဆိုတော့ ကျွန်တော်က သူ့ကိုချစ်မိခဲ့တာမို့လို့ သူ့နှလုံးသားနဲ့ ကျွန်တော့်နှလုံးသားတို့က ထပ်တူကျနေတယ်လေ။ ဒါကိုကျွန်တော် သတိမထားမိလိုက်ဘူး။

ခံစားလိုက်ပါဦး စိုင်းထွဋ်ခေါင်..။ ဒါက ဖြူစင်တဲ့ကောင်လေးရဲ့နှလုံးသားကို နာကျင်နေစေမိလို့ ပြစ်ဒဏ်ပေးတဲ့အနေနဲ့ မင်းပါ နာကျင်လိုက်ပါဦးကွာ။

“ သခင်လေး ပန်းချီကားက ပြီးခါနီးနေပြီမို့လို့ ဆက်ဆွဲရအောင် "

အမှန်ကတော့ သခင်လေးနဲ့ စကားအချေအတင် ဆက်မပြောချင်တာမို့ စကားလမ်းကြောင်းလွှဲလိုက်တာပါ..။

“ ဒီနေ့တော့ ပန်းချီမဆွဲချင်ဘူးနန္ဒ..။ မင်းမေးခွန်းတွေမေးလို့ပြီးပြီလား.. ငါနားချင်နေပြီ "

“ နားနိုင်ပါတယ်သခင်လေး... တစ်ခုတော့ မှာလိုက်ပါရစေ...။ အပြစ်တင်တဲ့အခါ အကြောင်းပြချက်တို့ ခိုင်လုံပါစေ..။ ကျွန်တော့်ကိုနှင်ထုတ်ဖို့ ကြိုးစားနေတယ်ဆိုရင် လက်လျှော့လိုက်ပါသခင်လေး..။ ဘာအမှားမှ မလုပ်မိစေဘဲ သခင်လေးအနားမှာ အမြဲခစားနေမှာမို့လို့ "

ကောင်လေး... မင်းက ငါကို အပြုံးလှလှတွေနဲ့ပါ အနိုင်ယူရတာ အားမရလို့ စကားလုံးလှလှတွေနဲ့ပါ အနိုင်ယူတာလား။ မင်းအနိုင်မယူခင်ကတည်းက အရှုံးပေးပြီးသားပါ ကောင်လေး။ အနိုင်ယူဖို့ သိပ်မကြိုးစားပါနဲ့ ။ မင်းပင်ပန်းမှာစိုးမိတယ် ကောင်လေး။ မိသားစု၊ စီးပွားရေးဆိုတဲ့ အတားအဆီတွေသာ မပါခဲ့ရင် မင်းနဲ့တူတူ ဘ၀ကိုဆုံးခန်းတိုင် လျှောက်လှမ်းမိမယ်ထင်တယ်..။

ဒီဘ၀တော့ ဒီလောက်ပဲထင်ပါတယ်။ မင်းနာကျင်မှာကိုတော့မကြည့်ရက်ပေမဲ့ မင်းမုန်းသွားအောင် ဖန်တီးရမှာမို့လို့ အနည်းငယ်တော့ နာကျင်ရလိမ့်မယ်ကောင်လေး.. တောင်းပန်ပါတယ်။

အကြင်သူနှစ်ဦးတွင် တစ်ဦးမှာ ထိုသို့ သတ္တိနည်းနေသည်။ ကျန်တစ်ဦးမှာမူ အာအင်းအပြည့်နှင့် ရှေ့တိုးမည့်ခြေလှမ်းများကို ပြင်ဆင်နေလေသည်။

ကျွန်တော်ပြောတာ မှန်သွားလားသခင်လေး။ သခင်လေးကကျွန်တော့်ကို ပထုတ်ဖို့ ကြိုးစားနေတာမဟုတ်လား။ သခင်လေးဘယ်လိုပဲ ပထုတ်နေပါစေ ကျွန်တော်က ထွက်သွားဖို့ ဆန္ဒမရှိတာမို့.. သခင်လေးရှိရာ ဒီအိမ်တော်ကြီးထဲက တစ်ဖဝါးမှ ခွာမှာမဟုတ်ပါဘူး။

အခုတော့ အမြဲလိုလို သခင်လေးအနားမှာ ခစားနေတဲ့ ကျွန်တော့်ကိုနှင်ထုတ်လိုက်ပြီး ဆယ်နှစ်သားအရွယ်လှထွန်းလေးကို သခင်လေးအပါးတော်၀င်စေတယ်တဲ့လား။ ရယ်ရတယ်သခင်လေး.. ဆယ်နှစ်သားအရွယ် လှထွန်းလေးကို ခေါ်ခိုင်းတော့ ဘာတွေလုပ်တတ်မှာတဲ့လဲ။ သခင်လေးရဲ့ အလိုကျ ဘယ်လိုဖြည့်ဆည်းပေးမှာတဲ့လဲ.. သိချင်စမ်းပါရဲ့သခင်လေးရယ်။

အနည်းငယ်တော့ စိတ်ပူမိတယ်သခင်လေး။ အရင်လို သခင်လေးခံတွင်းမတွေ့တဲ့ ဟင်းတွေကိုချက်ထားတဲ့အခါ.. ဘယ်သူက အလိုက်တသိနဲ့ ဟင်းအသစ်ကိုပြင်ဆင်ပေးမှာလဲ။ သခင်လေးသဘောကျတဲ့ နှင်းဆီဖြူတွေကို.. ဘယ်သူက ပန်းအိုးထဲမှာ အလိုက်သတိပြင်ဆင်မှာလဲ။ သခင်လေး အပြင်သွားတဲ့အခါ.. ဘယ်သူက အလိုက်တသိ သခင်လေးရဲ့ အ၀တ်အစားတွေကို ထုတ်ပေးမှာလဲ။ ကျွန်တော့်ကို သခင်လေးအနားမှာမထားတော့တာကို တွေးပြီး၀မ်းနည်းမနေပါဘူး။ သခင်လေးက ကျွန်တော့်ကို နားချိန်ပေးတယ်လို့ သဘောထားပြီး ကျေးဇူးတင်နေမယ်။

အကြောင်းပြချက် ခိုင်ခိုင်လုံလုံမရှိဘဲ ပထုတ်လိုက်ကိုတော့ ကျွန်တော်သဘောမကျဘူး။ ဘာလို့အခုလိုလုပ်ရတယ်ဆိုတဲ့ အကြောင်းအရင်းကို ကျွန်တော်စူးစမ်းဦးမှာပါ။ သခင်လေးပေးတဲ့နားချိန်ကို ကျွန်တော်က အလကားသက်သက် အကုန်မခံပါဘူး။ သခင်လေးက ပန်းချီဆွဲဖို့ မပြောတော့ပေမဲ့.. ကျွန်တော့်ရဲ့အမြင်အာရုံထဲမှာ မှတ်သားပြီးသားဖြစ်တဲ့ သခင်လေးရဲ့ ပုံရိပ်တွေရှိနေတာမို့.. ကျွန်တော်တစ်ယောက်တည်း ဆွဲရလည်း အဆင်ပြေပါတယ်။

ထိုသို့အတွေးကမ္ဘာထဲ အလည်သွားကာ ခြံထဲ၌ ပန်းချီဆွဲနေသည့် နန္ဒသည် ပတ်၀န်းကျင်ကိုသတိမထားမိ။ သူ့အနားတွင် စိုင်းထွဋ်ခေါင်ရောက်နေသည်ကိုလည်း သူမသိ။

“ မင်းဘာလုပ်နေတာလဲနန္ဒ... "

“ ဪ... သခင်လေးရောက်နေတာလား ကျွန်တော်ပန်းချီဆွဲနေတာပါ "

“ မင်းလက်ထဲက ပန်းချီကားကို ငါ့ကိုပေး "

“ အမိန့်အတိုင်းပါ "

ထိုပန်းချီကားသည် သခင်လေး၏လက်ထဲသို့ရောက်သွားသောအခါ သခင်လေးပြောလာသည့်စကားသည် မိမိအား ဝမ်းနည်းမှုကို ဖြစ်ပေါ်စေသည်။

“ အသုံးမကျတဲ့လက်ရာတစ်ခုနဲ့ ငါ့ပုံတူကိုဆွဲဖို့မထိုက်တန်ဘူး "

“ ဗျာ.. "

ဒါကတော့ သခင်လေးအပြစ်ရှာနေတာ သိသာလွန်းပါတယ်။

“ မထိုက်တန်ရင်လည်း ကျွန်တော့်ကိုပြန်ပေးခဲ့ပါ။ ဆက်မဆွဲတော့ပါဘူး "

“ ငါ့ပုံတူက မင်းလက်ထဲမှာထားဖို့လည်း မထိုက်တန်ဘူး "

“ မထိုက်တန်မဲ့အတူတူ ဆွဲဖြဲလိုက်ပါလားသခင်လေး.. အခုဖြဲလိုက်ပါလား..။ ကျွန်တော် အမှိုက်ပစ်လို့ရအောင်လေ "

အရွဲ့တိုက်နေသည့်‌ ကောင်လေး၏မျက်နှာအမူအရာသည် ယုံကြည်မှုအပြည့်နှင့်။

“ နောက်မှ မီးရှို့ပစ်မယ် အခုတော့ယူသွားပြီ "

မင်းနဲ့ မနီးစပ်ရတော့မှာကိုသိနေတာမို့လို့ မနီးစပ်အောင် ကိုယ်ကဖန်တီးရမှာမို့လို့ နောက်ဆုံးအမှတ်တရပစ္စည်းအဖြစ် ဒီပန်းချီကားလေးကို သိမ်းထားပါရစေ။ မကြာခင်ကြားရတော့မယ့် မင်္ဂလာသတင်းက မင်းအတွက်တော့ မင်္ဂလာမရှိလောက်ဘူး ထင်တယ်။

မင်းနဲ့အတူတူရင်ဆိုင်ဖို့ ကိုယ့်မှာသတ္တိမရှိဘူး..။ မင်းနဲ့ အတူတူဘ၀ကိုရင်ဆိုင်တဲ့အခါ အဆုံးသတ်မှာ မင်းကပိုပြီးနာကျင်ရမှာ..။ မင်းနာကျင်ရမယ့် ကိစ္စအတွက် ကိုယ်သတ္တိမရှိဘူး..။ မချစ်လို့ အဝေးကိုတွန်းပို့တာာမဟုတ်ဘူးနော် ကောင်လေး..။ ချစ်လို့ မင်းနာကျင်မှာစိုးရိမ်လို့ပါ။

အရီးတော်ရဲ့ ရက်စက်မှုကို မင်းမသိဘူးထင်တယ်။ သူက ကိုယ်တို့မေတ္တာမျှနေကြောင်းကိုသိရင် ဒီအတိုင်းအလွတ်ပေးမယ်ထင်သလား..။ မဟုတ်ဘူးနော်..။ သေကွဲ‌ကွဲအောင် သူဖန်တီးမှာ။ သေကွဲတော့မကွဲချင်ဘူး ကောင်လေး။ သက်ရှိထင်ရှားရှိနေတဲ့ မင်းကို အဝေးကနေပဲ ချစ်ခွင့်ပေးပါ။

စိုင်းထွဋ်ခေါင်၏ ရင်တွင်း ဝန်ခံစကားကို နန္ဒမကြားရပေ။ ထို့အတူပင် နန္ဒရင်တွင်းစကားကိုလည်း စိုင်းထွဋ်ခေါင် မကြားရပေ။

ဒီတစ်ခါတော့ သခင်လေးဟန်ဆောင်တာညံ့တယ်။ ဘာလို့လဲ... ကိုယ်မနှစ်သက်တဲ့ ပန်းချီကားကို ဖျက်ဆီးလိုက်လို့ရရဲ့သားနဲ့ ဘာလို့ ယူသွားရတာလဲ။ ကလေးဆန်လိုက်တာဗျာ...။ မီးရှို့မယ်လို့ပြောပြီး သိမ်းထားမှာတော့ မဟုတ်ပါဘူးနော်။ သခင်လေးလည်း ကျွန်တော်ကိုချစ်ရဲ့သားနဲ့ ဘာလို့ဟန်ဆောင်နေရတာလဲ..။

ခံစားမှုကိုယ်စီနှင့် ထိုအကြင်သူနှစ်ဦးသည် ခက်ခဲလေသည်။