خربشة قصة

القصه 30

#خربشة قصة

   #قوتي_أنت

اليوم المفروض اضحك فيه من قلبي ، المفروض ابتسامتي من الضرس للضرس بقى لي اسوأ يوم في حياتي

اسوأ شنو ؟! كابوووس بحلم بيه وعايزه اصحى منو باي طريقه

الناس حوليني فرحانه تكبر وتزغرت وانا بجاي بحاول بس ما انزل دموعي  او اصرخ واقول ما عايزه اعرس
خلوني ،انا بحب واحد تاني

بس سكت وبقيت اعاين ليهم بحرقه ،
كنت بتمنى اللحظه دي تكون مع البحبو بس لا حاعرس واحد ما شفتو الا مره واحده وصوره كمان ...

ليه الاقدار ضددي كدا ؟!! ليه انا حظي كعب ؟!!

دموعي جرت شديد  وقت خلااص قالو العريس وصل يسوقك

كنت ببكي بحرقه والحوليني زادو الزغاريت اكتر واكتر ...

مفتكرين دي دموع الفرحه  ولا دموع الوداع وووو

بس عكس الجواي كنت بالجد بموت وسكاكين بتقرز فيني .

ساقني  من يدي وانا ما رفعت نظري حتى اشوفو  ، دموعي ابت تقيف ومكياجي شبه باظ بس ما يهمني ابدا .

وصلنا محل التصوير واول من دخلت
يا ريت ما دخلت ، تخيلو حبيبي الكنت بقول عليه حبيب واقف يتصور مع واحده... صدمه!! ، صدمتنين !!

عيوني طلعت من محلهم ، جا قاطعني  وماسك يدها وفرحان من الضرس للضرس كانو ما يعرفني ...

في شنو   ودي منو ...من طلعتهم وفرحتهم عرفت دي خطيبتو

خطيبتو ؟؟!! طيب كيف ؟!! ومتين وليه !؟؟

ما عارفه وقتها متين اتصورنا  ولا متين مشينا ولا متين اصلا دخلنا الشقه ، مااا عارفه حاجه

قعدت وانا ما عارفه اني اصلا حيه ولا ميته
يعني كان بيستقفلني ويقشني ؟!!

لمن قلت ليه جابو لي عريس  كان كذاب يعني في رده فعلو ؟!!

ما حسيت الا زوجي  جا قعد في الارض وحضني ...

اتصدمت حبه من فعلتو وتاني ما عارفه ، كنت محتاجه بالجد لحضن زول
حضنتو وبكيت

بكيت وطلعت كل الجواي ...مكسووره ومقهووره .

طلعت من حضنو وفضلت اعاين فيه ،لو تصدقو اول مره اشوف وشو مباشره ...

عاينت ليه وتاني انتبهت لنفسي ونزلت عيوني  .

من غير كلمه قام من محلو ومشا دخل مويه للحمام وقال

( ادخلي استحمي وتعالي )

قمت بصعوبه ودخلت قعدت نص ساعه في الحمام وانا ببكي ، في الاخير طلعت ماشه بتكاسل ، رفعت عيني لقيت  اكل وجنبو عصير  .

مسكني من يدي من غير كلمه وقعدني

مسك الاكل وبدا يأكلني بيدو 
رفضت مليون مره بس برضو اصر مليونين ...

في الاخير استسلمت  وخليتو يأكلني ، بصراحه كنت خحلانه شديد ، نظراتو  لي عقدتني  ، قشعريره مشت في طول جسمي

في اخر لقمه قلت
( شبعت )

وقتها نزل اللقمه وفضل يعاين لي  ، هربت من نظراتو 
بعدها ابتسم وقام

اترددت اتكلم واقول ليه انت ليه ما اكلت  في الاخير قلت ..

( انت ما عايز تاكل؟!! )

رجع قعد  جنبي  وفضل يعاين لي وبعدين قال بعد ابتسامه

( تهانى ، انتي ما بتعرفيني يمكن ولا شفتيني ، بس انا بعرفك وشفتك وحبيتك كمان )

رفعت عيني بسرعه وتاني نزلتها بفرك يدي

( انا من رجعت البلد دي شفتك في الجامعه  ، من وقتها وعايز اعرف البت دي منو لحدي ما عرفتك

بس الواقف في طريقي انك مرتبطه ، اتكسرت ايوا بس برضو  صبرت

ما عرفت اشوف بت غيرك ، حاولت بس ما قدرت ...

تعرفي الخلاني اتقدم واعجل العرس شنو ؟!!

عشان علي الاقل راسك يبقى مرفوع لمن تعرفي  انو حبيبك خطب ...)

عاينت ليه  ودموعي جاريه عايزه افهم هو عرف كيف

( عرفت عايز يخطب لانو البت الحيخطبا  بت جيرانا  )

دموعي جرت اكتر واكتر ، لحدي ما لقيت زول يحضني ويطبطب علي ..

( ما بستاهلك  فما تزعلي كتير عليه انا جنبك ، ايوا ما بتعرفيني بس ما مهم عندنا العمر كلو نعرف بعض ، صدقيني دموعك دي لمن تنزل بتأذيني انا وكأنها تلومني لاني ملزم ابعد الدموع وازرع الفرحه )

مسح دموعي وفضل يعاين لي  وقال

( اتكلمي وسمعيني صوتك يااخ ، اممم شكل لازم تعيشي دور العروس الخجوله وكداا برااحتك يا توتو )

ضحكت لتوتو دي ونزلت عيوني منو
رفع ذقني وقال

( البسمه دي هي الوقعتني وما عرفت اقوم  من تاني )

ايوا عرستو وما بعرفو ، ما شفتو 
ما عرفتو قبل كدا وما حبيتو

بس مع الوقت  عرفت انو الحب ما كلام واقول زي ما غشاني داك السميتو حبيبي ، سميتو حبيب وما بقى قدر الاسم

سميتو اماني وهو اول من شال سكينه وحاول يطعني في ضهري وغدر بي .

بالرغم من اني  في البدايه كنت متأزمه نفسيا  بس وقف معاي وما استسلم  يطلعني من همي

حبيتو لحبو لي وامانو ودعمو الخلاني بالجد افاخر بيه ...
افتخر بالزوج الم قصر معاي وسندني

لقيت السند لي والرفعني ودعمني ، عرفت معاه الحب البجد ،الحب الحلال، الحب اليخليك تحب نفسك ودنيتك.

عرفت انو دا هو قوتي ...

قعدت جنبو وقلت  ببسمة

( قوتي انت )