#حرب_المشاعر
💞الحلقة 2💞:
"إن أفظع ما في الأمر في نظري هو إنني فهمت كل شئ".-
بعد ما خرجت من الكلينيك....حكمت طاكسي رايحة لدارهم ...كارهة حياتها .....الشخص لي فتحت عينيها عليه...
لي قالت حتى لو تجاهلها ....يكنلها شوية مشاعر برك ...
أما هو ماشي سامع بيها قاع ....حاسة بالخنقة
...حاجة راهي تخنق فيها ماشي مخليتها تتنفس ...
.قلبها يوجع ...صعيب تحب واحد ماشي سامع بيك صعيب ...القلب يبقى لحمة ....حتى وكان قلت
...الحب تفاهة كبيرة أما كي يبدا قلبك يدق ...
مراحش تقدر توقفو ....ولا تقولو مادقش ..
..مقدرتش تتحمل و طرطقت بالبكا ....
.سيات تحبس دموعها مقدرتش ...شوفور تاع الطاكسي نخلع فيها ...مهما حاول يهدر معاها ولا يهديها مقدرش ...
قالتلو يحبس و حبطت..كانت مازال باش توصل لدارهم ...
قعدت تمشي و هي تبكي طول الطريق ...لي غاضو حالها...لي يستشفا ...و لي يضحك ...وصلت للدار بطلوع الروح بعدما فرغت هم قلبها فالبكا
...مسحت عينيها و تنفست مليح و دورت المفتاح فالباب .
.دخلت للداخل لقات السكات
حياة: ماما ،أمل ،بابا ...مكاين حتى واحد...حوست قاع الدار مالقات حتى واحد ....إستغربت فنفس الوقت خافت كاش ما صرا لكاش واحد ...تفكرت تلفونها ...خلاتو صامت و ماطلتش عليه من الصباح ...شافت الساعة المعلقة فالحيط ...راهي ثلاثة تع العشية
راحت للصاك تحوس على تلفونها ...جبداتو وشعلاتو ...لقات شحال من أبال ومساجات دخلت لأول مساج ..لقات أمل كاتبتلها
"حياة وين راكي ؟؟ رحنا عند لينا للصبيطار راح تولد " ..
حياة بعد المساج ما ستناتش و عيطت ليماها ..طمنتهم عليها ..و خرجت ديراكت للسبيطار عند ختها ....تمشي فالطريق تزرب تحوس على طاكسي و فنفس الوقت تدعي لختها تسلك على خير .
فالسبيطار وين كانو قاع على أعصابهم ...خرجت الطبيبة و طمنتهم على وضع الأم و بنتها ....تنفسو براحة و ضحكو فرحانين ....إلا وحدة ماشي عاجبها الحال ....
بعدما حطوهم فغرفة عادية .. تلمت العايلة قاع يرحبو بالفرد الجديد....رفدها باباها عمر ...راجل لينا... بلعقل وأذنلها في وذنها وسماها تسنيم ....فهاديك اللحظة دخلت حياة للغرفة ... تنفست كي شافت ختها بخير و سلامة ...خافت كشما راح يصرالها...ضحكت بفرحة كي شافت المولودة الجديدة رافدها باباها ....دخلت للداخل وقربت عند ختها و حضنتها
حياة: الحمدالله على سلامتك
لينا: الله يسلمك يا عمري ...وشبيه وجهك صفر ...تقولي نتي لي كنت تزيدي هههه ...ضحكو قاع على واش قالت لينا ...دورتها يماها وسقساتها وين كانت ووشبيها ...حياة ماحبتش تقلقهم عليها ...قالتلهم بلي راحت للبحر تشم شوية هواء نقي و نسات روحها ...بعدها قاع حبو يرفدو الصغيرة
حياة :يا عمري حلوة وتتاكل ...شبعتها بوس حتى داتها يماها بسيف من يديها ...فالوقت لي كانو قاع فرحانين و البسمة على وجوههم نطقت يماة عمر لي ماشي عاجبها الحال
فضيلة: النساء يجيبو فالدراري و نتي إقعدي جيبي فالبنات
فلحظة السكوت خيم على البلاصة ...مصدومين منها ...صح عمر تزوج لينا خارج إرادة يماه خاطر يحبها ..أما هي حبت تزوجلو بنت خالتو ...تغرغرو عينين لينا بالبكا ....صح تكرهها و ماطيقهاش ملي تزوجت من عمر ...أما ما عندهاش الحق تقولها هاد الكلام ...هذا مكتوب ربي و ماشي هي لي تحدد نسل الطفل إذا يجي ولد ولا بنت ....ما خلاتهاش حتى تفرح ببنتها ..حياة كانت راح تنطق حتى سبقها عمر و عيط عيطة زعزعت السبيطار
عمر: يمااا واش هاد الهدرة .....فايقة بروحك واش هدرتي؟؟؟...ردت عليه ...إيه فايقة واش هو ذنبي إذا حبيت حفيد
زفر عمر بغضب ...ذنبك كبير يا يما ...هذي مشيئة ربي ...شفتيني جيت شكيتلك ؟؟..لا لا صح ...هاد السوجي يتغلق هنا ...إذا زدتي جبدتيه لا أنا وليدك ولا نتي يما ....بزاف كل مرة تخرجي بكاش خرجة لهنا تحبس ...شافت فيه يماه بلوم ...هاكدا يا وليد كرشي ...ما بقاتش قعدة هنا ديجا راني رايحة ....رفدت صاكها و خرجت وتمتم بكلام ماشي مفهوم ...ملهيك حياة و يماها (فاطيمة) قاعدين يخففو على لينا لي ما قدرتش تفرح كي الناس ببنتها لي غير كيما زادت ...زيرت لينا على بنتها فحضنها وطاحت دمعة سخونة من عينيها دليل على كمية الوجع لي فقلبها .
أنت تقرأ
حرب المشاعر {من تأليفي Macilia Ch}
De Todoهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
