Amiss Prayer (Zawgyi&Unicode) [Completed]

Part-25(ပင်ပန်းမှု)

For Unicode
ပင်ပန်းမှု

တိုင်ပင်ဆွေးနွေးခြင်းမရှိ.. သူတို့၏သ‌ဘောအတိုင်းဆောင်ရွက်မည့် အချစ်မပါသော အိမ်ထောင်ရေး..။ ပေါ့ပျက်ပျက်နှင့် ခြောက်ကပ်ကပ်နိုင်လှသည်။

မချစ်ရသူနှင့် ပေါင်းဖက်ရသည်ထက် ချစ်ရသူနှင့် ကွေကွင်းခြင်းသည် ပို၍နာကျင်ရသည်။ ရှေ့ဆက်ဖို့ရာလည်းမဖြစ်နိုင်..။ မိမိမှာလည်း မိသားစုနှင့်.. သူ့မှာလည်း ဘ၀နှင့်...။ ထိုအတားအဆီးများသာ မရှိခဲ့လျှင် မိမိနှင့်သူ ရှေ့ဆက်၍ရင်ဆိုင်မိဦးမည်ထင်သည်။

ဤသည်ကို ကောင်လေးနားမလည်။ မိမိ၏အခက်အခဲကို ကောင်လေးမသိ...။ သိရန်လည်းမပြောပြချင်..။ မိမိအပူများသူထံသို့ မကူးလို..။ မိမိကြောင့် သူ၏နှလုံးသား နာကျင်နေကို သိပါသည်။ သို့သော် ဘ၀တစ်ခုလုံးဆုံးရှုံးရမည်ထက် ပို၍သင့်တော်ပါသေးသည်။ ထို့ကြောင့်သာ သူ့ကို‌ကြည့်နေခွင့်သာ ရတော့မည်။ စဉ်းစားမိရုံနှင့် အလွန်စိတ်ပျက်စရာကောင်းလှသည်။ နှလုံးသားသည် မွန်းကျပ်လှလေသည်။

မွန်းကျပ်မှုတို့ ပြေပျောက်လို ပြေပျောက်ငြား ဆေးလိပ်ကိုဖွာမိသည်။ ဆေးလိပ်တစ်ချက်ဖွာ၍ ရှူထုတ်လိုက်သည့် အငွေ့များထဲတွင် မွန်းကျပ်မှုတို့ ပါသွားလျှင် မည်မျှကောင်းလိုက်မည်နည်း။

ဆေးလိပ်သည် နှုတ်ဖျားပေါ်တွင်သာနေရာယူထားသည်။ ရှိုက်လိုက်သောအခါ အဆုတ်ကိုတော့ထိနေမည်။ သို့သော် နှလုံးသား၏အနက်ရှိုင်းဆုံးနေရာသို့ မရောက်..။ ထို့ကြောင့်သာ မွန်းကျပ်မှုတို့သည့် ပါသွားရန် အကြောင်းမရှိ။ ထိုအချိန်မှစကာ ဆေးလိပ်သောက်လျှင် စိတ်‌ညစ်မှုတို့ကို အနည်းငယ်သက်သာစေသည်ဟူသော အများလက်ခံမှုအား ကျွန်တော်လက်မခံတော့ပေ။

ကျွန်တော့်၏ မွန်းကျပ်မှုကိုဖြေဖျောက်ရန်အတွက်မူ နှလုံးသား၏အနက်ရှိုင်းဆုံး နေရာအထိ ရောက်နိုင်သူသာလိုအပ်သည်။ လိုအပ်သူသည် တခြားသူမဟုတ်ပေ။ နန္ဒသာဖြစ်သည်။ သို့သော် ကောင်လေးကို မွန်းကျပ်မှုတို့အား ထုတ်မပြောရက်။ မွန်းကျပ်မှုကို ဖြေဖျောက်ရန် ချစ်ရသူအား မိမိဘ၀ထဲသို့ ဆွဲမခေါ်ရက်..။

ချစ်ရသူပျော်ရွှင်ပါစေတော့..

ထိုသို့ဖြင့် စိုင်းထွဋ်ခေါင်၏အတွေးငယ်တို့သည် နန္ဒထံသို့အလည်သွား‌မိသည်။ အလည်သွားမှုလွန်ခြင်းကြောင့်ပင် သူ၏ဘေးတွင် နန္ဒရောက်နေသည်ကို သတိမထားမိခဲ့။ နန္ဒသည်လည်း စိုင်းထွဋ်ခေါင်၏လက်ထဲမှ ဆေးလိပ်ကို ရုတ်တရက်လုယူလိုက်ကာ စိုင်းထွဋ်ခေါင်နှင့် စကားပြောခဲ့သည်။

“ မသောက်ဖူးဘဲ ဘာလို့သောက်နေတာလဲသခင်လေး.. “

“ ငါမသောက်ဖူးဘူးလို့ မင်းကိုဘယ်သူပြောသလဲ”

“ မပြောပေမဲ့ သိနေတယ်လေဗျာ..။ ဒီကိုပြန်ရောက်ကတည်းက သခင်လေး‌ဆေးလိပ်သောက်တာကို ကျွန်တော်မမြင်ဖူးပါဘူး။ ဘာလဲ... စိတ်ညစ်စရာတွေရှိနေလို့လား.. “

“ စိတ်ညစ်တိုင်း ဆေးလိပ်သောက်ရမယ်လို့ မင်းကိုဘယ်သူပြောလဲ.. “

“ ကြားမိတာပါ... တချို့လူတွေက သောက်စမရှိဘဲ ရုတ်တရက်ထသောက်ရင် စိတ်ညစ်တာတွေကို ဖြေဖျောက်ချင်လို့သောက်တာတဲ့လေ..။ ရှူထုတ်လိုက်တဲ့ အငွေ့တွေထဲမှာ စိတ်ညစ်စရာတွေများ ပါသွားမလားဆိုတဲ့ ကလေးအသိနဲ့ပေါ့..။ အဲဒီမှာ လူတွေ အ တာကို တစ်ချက်သိသွားတာပဲ..။ ဆေးလိပ်သောက်တာက အဆုတ်ကိုတော့ ရောက်ပါရဲ့ နှလုံးသားရဲ့အတွင်းနက်နက်ထိကိုတော့ မရောက်ဘူးလေ..။ မရောက်တဲ့အတွက်.. စိတ်ညစ်မှုတွေကလည်း ရှူထုတ်လိုက်တဲ့အငွေ့တွေထဲမှာ ပါသွားစရာ အကြောင်းမှမရှိတာ..။ အဲဒါကို သိပ်မတွေးမိဘူးထင်တယ်..။ အဲဒီလို ကလေးဆန်ဆန် တွေးတဲ့လူတွေထဲမှာ သခင်လေးကို မပါစေချင်လို့ ဆေးလိပ်သောက်တာကို တမင်တားလိုက်တာလေ.. “

“ အဲဒီတော့.. မင်းက ငါ့ကို ကလေးဆန်ဆန်တွေးနေတယ်လို့ ပြောချင်တာလား..”

“ အဲဒါကတော့... သခင်ရဲ့ အတွေးပေါ်မှာ မူတည်နေတယ်.. “

“ အကုန်သိသလိုလိုနဲ့.. ဘာလို့ သူများအကြောင်းတွေကို စွပ်စွဲနေတာလဲနန္ဒ “

“ မစွပ်စွဲရဲပါဘူးဗျာ.. မစွပ်စွဲခဲ့ရင်တောင်မှ အစကတည်းက သခင်လေးရဲ့မျက်နှာကို ကျွန်တော်က အရိပ်တကြည့်ကြည့်နဲ့ ချစ်ခဲ့ရတာမို့လို့ သခင်လေးမျက်နှာပေါ်က မသာယာမှုတွေကိုကြည့်တာနဲ့ ဒီရင်ဘတ်ကြီးထဲက သခင်လေးစိတ်ညစ်နေတာကို အလိုလိုသိတယ်.. “

ရင်ဘတ်ကိုလက်ဖြင့်ထုကာ စကားပြောနေသော မိမိ၏အကြည်ဓာတ်လေးသည် အချစ်အတွက် အရာရာကိုရင်ဆိုင်ရန် အသင့်ရှိသည့် သတ္တိခဲလူသားလေးပင်ဖြစ်သည်။ မိမိသည်က ထိုသို့မဟုတ်။ သူနာကျင်မည့် ကိစ္စအဖို့ရာ သတ္တိမရှိခဲ့။

ထို့ကဲ့‌သို့ မိမိ၏စိတ်ကို အတွင်းကျကျ သိနေသော ကောင်လေးသည်သာလျှင် မိမိ၏မွန်းကျပ်မှုတို့ကို သက်သာစေမည်။ ‌ထိုအကြောင်းကို သူမသိ..။မိမိသည် မည်သို့သောအကြောင်းကြောင့် စိတ်ညစ်ရသည်ကိုလည်း သူမသိခဲ့ပေ။ ဖွင့်ပြောရန်လည်း အဆင်မပြေခဲ့ပေ။ မိမိ၏ အပူသောကများကို သူ့အား ထုတ်၍ မပြောချင်သောကြောင့်ဖြစ်သည်။ ထို့ကြောင့်သာ သူ၏စကားအား ဆက်၍ဟန်ဆောင်ကာ ငြင်းဆိုရဦးမည်။

“ ငါက ဆေးလိပ်ကို ကြိုက်လို့သောက်တာဆိုရင်ရော..”

“ မဖြစ်နိုင်တာဗျာ.. ကျန်းမာရေးလိုက်စားတဲ့သခင်လေးက ဆေးလိပ်သောက်တာကို ကြိုက်တယ်တဲ့လား “

“ ကြိုက်လို့သောက်တာပေါ့.. မကြိုက်ဘဲနဲ့.. ဘာလို့သောက်နေမှာလဲ.. “

“ ကြိုက်တယ်ပေါ့.. ဆေးလိပ်က မကောင်းမှန်းသိရဲ့နဲ့တောင် ကြိုက်တယ်ပေါ့.. “

“ အင်း.. “

“ ဒါဆို... ကျွန်တော်အဖြစ်က ဆေးလိပ်နှစ်သက်သူနဲ့ တူနေတာပေါ့နော်...။ ဆေးလိပ်နှစ်သက်သူတွေအတွက် ဆေးလိပ်က အဆိပ်ဖြစ်နေတာကို သိရဲ့နဲ့တောင် ဆေးလိပ်ကို လက်မလွှတ်နိုင်သလိုပဲ.. ကျွန်တော့်အတွက်.. သခင်လေးရဲ့အချစ်က အဆိပ်သင့်အချစ်မှန်း သိရဲ့နဲ့တောင်.. အခုချိန်ထိ လက်မလွှတ်နိုင်သေးဘူးရယ်..။ ဒီရင်ထဲမှာ သိမ်းထားတုန်းပဲ “

“ လက်လွှတ်လိုက်ပါ နန္ဒ.. “

“ ဟင့်အင်း... အဆိပ်ပင်လေးရှင်သန်ပါစေတော့..။ နှလုံးသားထဲမှာ အမြစ်တွယ်နေမယ့်အတူတူ မနှုတ်ဘဲ ဒီအတိုင်း ရှင်သန်ခွင့်ပေးလိုက်တာက ကျွန်တော့်အတွက် ပိုအ‌ဆင်ပြေလို့ပါ.. “

မပျိုးသင့်တဲ့အဆိပ်ပင်ကို မပျိုးပါနဲ့တော့လား.. မင်းအရမ်းနာကျင်နေရတော့မှာပဲ ကောင်လေးရယ်..။ မနက်ဖြန်ကြားရတော့မယ့် မင်္ဂလာသတင်းက မင်းနှလုံးသားအတွက် အမင်္ဂလာသတင်းဖြစ်နိုင်တယ်။

မျက်ရည်တို့သည် မျက်၀န်းထဲတွင်သာဥနေသည့် ပါးပြင်ပေါ်သို့ကျမလာခဲ့..။ အဝေးရှိ တောင်တန်းတို့ကိုကြည့်လျက် တည်ကြည်စွာပြောနေသည့် ကောင်လေးသည် ဆွေးမြေ့မှုအပြည့်နှင့်..။ သူ၏ဆွေးမြေ့မှုတို့သည် မိမိကိုယ်ပါ ကူးစက်စေပြန်သည်။

တောင်တန်းတို့ကို ငေးကြည့်လျက် ပြောနေသော နန္ဒ၏အချစ်သစ္စာသည် တောင်တန်းကဲ့သို့ ကြီးမားခိုင်မာတည်တံ့နေသည်ကို ရည်ညွှန်းကြောင်း စိုင်းထွဋ်ခေါင်မသိခဲ့ချေ...။