#رحم_من_النار 🔥 1 (المقدمه)
(جزء من الماضي )
في ليلة كانت هاديه نضت ع صوت الريح برا كأنه بداية عاصفه خديت تلفوني من فوق الطاوله وولعت الكاشف ونزلت من السرير ونا طالعه جت عيوني ع سرير اختي الي مقابلني بزبط ....نشوف في كمية الدم الي ملطخه السرير كله وكمية الدم المتناثره ع الحيط الي جنب السرير كنت عارفه انها ماتت خلاص بي تباعد الاسئله الي في راسي علاش؟ وكيف ؟ قربت من السرير نشوف في قطعة كأنه كتلة دم حطيت يدي ع فمي بصدمه ونا نشوف في الدم الي ينزف من اختي وفهمت انه الكتلة عباره ع جنين ...يعني اختي كانت حامل؟ وحامل بالحرام؟💔
مستحيل ننسا اليوم هدا مستحيل ننسا اليوم الي كتشفنا فيه انه اقرب الناس لينا هيا اكبر عدو واجهنا 💔💔
العاصفه عمرها ماكانت صوت بالعكس.... العاصفه الي صارت الليله هادي عرفتها حاتكلفنا هلبا🤷♀️
قصة حقيقيه 70% من واقع ليبي💔
______________
الحاضر :-
قمر:لابسه سروال اسود جينز وبلوزه قصيره شفاف فوقها بالطو ووشاح خفيف 💙
كنت واقفه بين زحمة الممرضات زي كل يوم عادي خدمه مستمره وكنت تعبانه من ضغط الخدمه. ...ومش مسموح لي اي ممرضه انها ترتاح قبل ماتكمل خدمتها ....ونا كنت من بينهم نطبع في اسماء الاشخاص المتوفين ونحط فيهم في ملفات باش نسلموهم مع الجثث ....من بين الاسماء الي نطبع فها قريت اسم لشخص كنت انا مسؤوله ع حالته ...ياربي مستحيل يكون مات كييف صار هكي؟ ونا امس طمنت اهله عليه وانه حالته في تحسن؟ ....في شي داخلي وصاني أنه نمشي ونشوفه كأنه نبي نتأكد ونصدق التقرير الي بين يديا ؟ حطيت الملف متعه ع باقي الملفات بدون مانأكد عليه انه متوفي ....ونضت وطلعت من الغرفه هادي ع طول لغرفته 💔
____________
رانيا:كنت لابسه لبسة محدش يحبها لانها خاصة بي مساجين بس وماسكه شنطه فها باقي لحوايج ليا ....خشيت لمكان مضلم مافيش نقطة ضوء كأنه ممر طويل ونسمع في اصوات سلاسل يتخابطو في بعض لكن الصوت هدا مكانش بعيد عليا كانت السلسله مربوطه في يديا الاتنين وكانو جنبي اتنين من الحررس ونا في راسي ادور هلبا افكار؟ وصلوني لبداية بابا السجن و اول ماخشيت شفت المسجونات كلهم نصهم يتغذو ونص يرتبو وفي الي راقدين ونا كل مره تجي عيني ع بنت كنت نبي نتفصحص فيهم تخطيت خطواتي ووقفت جنبهم في الي ابتسمولي وكأنهم فرحانين بي ضيفة الجديده الي جتهم وفي الي نقرو حواجبهم وفي الي يشبحولي ومداروش اي ردت فعل اتجاهي قعمزت ع اقرب سرير مني ....وقلت في خاطري زعما ي رانيا حاتنجحي في المهمه الي كلفوك بها وتربحي المبلغ ؟🔥
____________
مرام:كنت ماسكه كتاب في يدي ونكتب في هلبا تفاصيل ع حياتنا كنت كل مانضايق من الشي ع طول نجري للمكتبه متعي وناخد لكتاب ونقعد نكتب فيه ع طول نرتاح وكأنه مصارتش معايه ولا حاجه كنت نحب الكتابه ونحب الهدوء أكتر شي كان اكتر شي يفرح فيا لما نكتب ع اخواتي كنت نكتب عليهم بي شغف ....قاطع صوت تفكيري طقات ع الباب خفيفه ع طول حطيت البيرو في الدرج ورجعت لكتاب تحت الكتب متعي ...ونزلت من ع كرسي فتحت الباب
ناصر:كيف حالك ي بنتي اليوم؟
مرام:الحمدالله ي عمي
ناصر:الصغار رجعو من المدرسه نبيك تنزلي تشوفيهم لانه انا وامهم طالعين وبنتأخرو في الرجعه
مرام:تماام ي عمي تمشو وترجعو بسلامه.....و ولا يهمك متفكرش في شي حانهتم بيهم مابين مارجعتو
ناصر:ابتسم .....سلمك ي بنتي ....شكرا انا عارف انك تخافي عليهم وتحبيهم
مرام:اكيد ي عمي ولادك زي خواتي بزبط
ناصر:تمام ....قبل ماننسا هدا مفتاح المكتب متعي وهدا مفتاح الخزنهه الخاص بيا خليهم عندك امانه مابين ماروحنا ومتسلميهمش لحد
مرام:خديتهم منه واستغربت شويه قلت في خاطري اكيد صاير مع شي وخايف ينسرقو.....اوك عمي امانه وامانتك غاليه متوصيش
ناصر:تماام هي نستأذنك توا
مرام:بسلامه عمي.....نزلت وراه ع طول خشيت لغرفة الصغار كانو زوز بنات وولد كانو يحبوني هلباااا لأنه انا الخادمه متعهم من سنتين وكان عمي ناصر عاطي فيا ثقه كبيره ويعامل فيا زي بنته بزبط لدرجه مفكرتش يووم انه نسيب الخدمه عندهم وطبعا امهم اسمها بثينه كانت مريضة بي ورم بس قعد في بداية علاجها كانت كل فتره تمشي هيا وعمي ناصر للعلاج برا المنطقه ❤
🔥مـــيُـــلــو حــــسسـٰـــن🔥
🔥مـــــيُــــلــــووو حــــسـٰــن🔥
(أمال القط)عجيليه🔥
_________
قمر:اول ماوصلت لغرفة المريض ...وقفني صوت كلام ....هدا اخر شخص شاهد ع جريمة كلهم ماتو الا هدا لو قعد عايش حاننحبسو كلنا ضروري قبل مايوصلو اهله يموت وبدون ماتخلو دليل ع القتل ...رد عليه الدكتور....مافيش حل الا لو قلنا مات بسبب خطأ طبي وحايسألونا ع الدكتور المسؤول ع حالته
الراجل:ومن الدكتور المسؤول ؟ نقدرو نرشوه بمبلغ ويشهد معانا ويسلم التقرير
الدكتوره:لا مش دكتور هيا دكتوره اسمها قمر
الراجل:تمام مافيش وقت غير انك تجيبها هنايا ونتفاهمو معاها
الدكتور:احتمال كبير ترفض لانه الدكتوره قمر من اوفا واحسن الدكاتره في المصحه
الراجل:مافيش وفاء مدام عندنا سلاح ونقدرو نهددوها
الدكتور:اءء اي ممكن هكي توقف في صفنا
مرام:تنفست بدهشه ....بدون مانسمع لباقي حديثهم تلفتت ع طول ونا راجعه لغرفتي نفكر في الطريقه الي بنساعد فها المريض ؟ حتا ثواني بسيطه مفكرتش في نفسي او حتا كيف هما دارو هكي ؟اول ماوصلت لغرفتي وحطيت يدي ع مقبض جتني الفكره الي ح ننقض بها مصحه تامه....يتبع🔥
من الحلقه الجايه حانوضحو تفاصيل الماضي أكتر وليش وصلو للحاله هادي وكم سنة تفصلهم ع الماضي ....روايتي هادي كأنه قصتين قصة صارت في الماضي وقصة في الحاضر بسرد جديد وعبر جديده🔥
كلكم ديرو تاقات لصديقاتكم والناس الي تعرفوها وخلوهم يقرو لأنه قصه حلووهه🔥
أنت تقرأ
رحم من نار ( روايات ليبية )
Mystery / Thrillerرواية تجمع بين القوة والأكشن ومواجهة أقاربك بعد مرور فترة الطفوله وتفريق الاخوه لسبب وهل سايجمعهم سبب؟؟ ومن الشخص الي سوف يتذكر تفاصيل الماضي كله سوف نكتشفه خلال هده الروايه رحم من النار🔥 للكاتبة :- ميلو حسسسن
