Amiss Prayer (Zawgyi&Unicode) [Completed]

Part-28(ပြောင်းလဲခြင်း)

For Unicode

ပြောင်းလဲခြင်း

အဘ၏သေဆုံးမှုကို မည်သူမျှရေရေရာမပြောပြခဲ့။ တချို့ပြောသည်က လှေကားပေါ်မှ ခြေချော်ကျပြီး သေးဆုံးသည်၊ တချို့က သံရိုက်နေရင်း လဲကျသွားသည် စသည် စသည်ဖြင့် ပြောကြသည်။ သို့‌သော် အဘသေဆုံးမှုအဖို့ရာ တိကျသောအဖြေကို တစ်ရက်ကြာသည်အထိ မသိရသေးပေ။

ဘာကြောင့်လဲ .. ဘာကြောင့်လွဲနေရသေးတာလဲ။ အမှန်ဆို သူတို့ရှိနေတဲ့အချိန် အဘသေဆုံးတာမဟုတ်လား။ သူတို့တိတိကျကျသိရမှာပေါ့။ အတိအကျမဟုတ်ရင်တောင် အဖြေအနည်းငယ်က တူနေသင့်တယ်မဟုတ်လား။ တစ်ယောက်တစ်ပေါက်နဲ့ ပြောနေတဲ့ သူတို့စကားကို ကျွန်တော်မယုံချင်ဘူး။ အဖြေမတူပုံကိုထောက်ရရင် အဘရဲ့သေဆုံးမှုမှာ နောက်ကွယ်ကတစ်ခုခုရှိနေပြီလား။ တရားမမျှတမှု တစ်ခုခုရှိနေပြီလား။ အားလုံးမပြောရဲပုံကိုထောက်ရင် အိမ်တော်ကြီးရဲ့ သခင်တွေထဲက တစ်ယောက်ယောက်ရဲ့ လက်ချက်လား။

အဘပြောဖူးသည်။ မှတ်မိပါသေးသည်။ သခင်လေးသည် အလွန်ရက်စက်သည်။ တစ်စုံတစ်ခု‌သောကိစ္စအား အမှားအမှန်မဆုံးဖြတ်ဘဲ အပြစ်ပေးတတ်သည်။

သခင်လေးများလား... မဟုတ်ဘူးမဟုတ်လား။ ကျွန်တော်မယုံချင်ဘူး။

မယုံကြောင်းသာ အော်ဟစ်နေသောလည်း နားထဲတွင်တော့ အဘပြောခဲ့သည့်စကားကိုမူ အထပ်ထပ်အခါခါ ကြားနေရသည်။

သေချာတာက အဘသေဆုံးခြင်းက တရားမျှတမှုမရှိဘူး။ သေဆုံးသူအတွက် နာရေးမလုပ်ပေးဘဲ သက်ပျောက်ဆွမ်းသာ ကပ်တယ်တဲ့လား။ ဘာကြောင့် နာရေးမလုပ်ရလဲ မေးမိပါသေးတယ်။ ဖြေလိုက်တဲ့ အိမ်ရှင်သခင်တွေဆီက တူညီတဲ့စကားသံတစ်ခု ထွက်လာပါရဲ့။

အကြင်နာတရားမရှိတဲ့စကားလေးက ‘သခင်လေး မင်္ဂလာပွဲရှိနေလို့ နာရေးမလုပ်အပ်ဘူး’ တဲ့လား။ မလုပ်အပ်တဲ့နာရေးဆိုတာ ရှိတယ်လား။ ကျွန်တော်မသိဘူးရယ်။ သခင်ရဲ့မင်္ဂလာပွဲရှိနေလို့ ကျွန်တစ်‌ယောက်ရဲ့နာရေးက မလုပ်အပ်တဲ့အရာလား။ နိယာမအသစ်အဆန်းတွေ ဖန်တီးလှချီလား သခင်တို့ရယ်။

မည်သူမှ ပူဆွေးခြင်းမရှိ။ လုပ်မြဲတိုင်း အလုပ်ကိုသာ ကိုယ်စီဆောင်ရွက်နေချိန် နန္ဒသည် အပူလုံးကိုရင်၀ယ်ပိုက်လျက် မည်သည့်အရာကိုမျှ မလုပ်နိုင်။