Sold Her Virginity (R18+)

Chapter 4

ILANG KATOK PA lang ang nagagawa ni Shanelle nang bumukas ang pinto. Nakita niya ang kaibigan na si Fatima na nagpupunas ng buhok na halatang bagong paligo.

"Oh, anong ginagawa mo rito? May kailangan ka ba?"

"Nagmamakaawa ako, Fatima. Baka may alam kang pagkakakitaan diyan. Kahit ano pa iyan ay papasukin ko. Nagmamakaawa ako, Fatima. Kailangan ko lang talaga matustusan ang pangangailangan ni papa."

Bumuntong-hininga ang kaibigan. "Pasok ka," nakangiti nitong wika.

Tumango siya at pumasok sa apartment na inuukopa nito. Hindi naman kalakihan at kaliitan, sapat lang para sa isang tao. Iginaya siya ni Fatima sa sofa at doon siya umupo.

"M-May alam ka bang pagkakakitaan?" tanong niya.

Sana naman ay mayroon.

"Uhm..." Umupo ito sa harap niya at pinagigitnaan nila ang isang maliit na lamesa. "Ilegal kasi iyon, Shanelle—" Ngumiwi ito. "—hindi saklaw ng gobyerno ang trabahong iyon," dagdag pa nito.

Kaagad na nangunot ang noo niya. "Ano ba iyan? Kahit ano pa iyan, papatulan ko na."

"Ibibigay mo lang naman ang sarili mo sa isang lalaki. Ang iyong virginity, i-ibibigay mo sa kaniya at malaki ang bayadan doon."

Kaagad siyang napatayo dahil sa sinabi nito. Ganito rin ang pinasok ni Pamela noong nakaraang araw at ni hindi na niya ito nakita. Ibinenta rin nito ang sarili at base sa eksplansyon ni Aling Decing sa kaniya, para itong kinawawa. Hindi, hindi niya ibibigay ang kaniyang sarili. Ibibigay niya ang kaniyang pagkababae sa lalaking mahal niya at hindi niya ibebenta iyon para sa pera.

"Hindi!" Natatawang umiling siya. "Gawin ko na ang lahat ng trabaho sa mundo't huwag lang iyan. Hindi ko ipagkakanulo ang sarili ko. Hindi. Hindi ko ib—"

Natigilan siya nang magsalita si Fatima.

"Paano ang papa mo? Kung hindi ka gagawa ng paraan, baka mawala siya. Shanelle, gusto ko lang sabihin na mahirap humanap ng pera ngayon kahit piso. Sige nga, saan ka kukuha ng pera pambayad sa operasyon ng papa mo?"

Natahimik siya nang maisip ang papa niya. Sinabi niya sa sarili na gagawin niya ang lahat para lang mabuhay ang papa niya kahit ano mang trabaho ang kaniyang suungin. Pero hindi niya matanggap ang sinabi ni Fatima sa kaniya. Na hindi niya ibebenta ang sarili— kung para sa kapakanan ni papa, bakit hindi? Biglang bulong ng isip niya.

"Paano mo nalaman ang trabahong iyon?" naguguluhan niyang tanong at muling umupo kapagkuwan.

"Kanina ko lang iyon nalaman. Habang naglalakad ako, may nagbigay sa akin nito."

Umangat ang kamay ni Fatima at sinundan naman niya iyon. Sa lamesang pinagigitnaan nila, saka lang niya napagtanto na may folder at... at katulad lang din ng folder na ibinigay sa kaniya ni Aling Decing. Kapagkuwan ay kinuha iyon ng kaibigan at inabot sa kaniya. Kinuha niya iyon at binasa ang nakatala sa iisang papel. Hindi na bago para sa kaniya dahil kung ano ang nabasa niya noon, ganoon at ganoon pa rin.

Huminga siya nang malalim kapagkuwan ay tiningnan ito sa mga mata. "P-Parang hindi ko ito kaya, Fatima. Nangako ako sa sarili ko na hindi ko ito papasukin pero... pero kung ito ang paraan para gumaling si papa—"

"—bakit hindi mo tanggapin?" pagtatapos ni Fatima sa kaniya.

"Fatima, nangako ako na hindi ko ibebenta ang sarili ko. Nangako ako sa sarili ko na ibibigay ko ang pagkababae ko sa lalaking mahal ko. Hindi ko alam, Fatima. Parang sasabog na yata itong utak ko."

Tumayo ang kaibigan niya at lumapit sa kaniya saka umupo sa tabi niya. Kinuha nito ang folder niyang hawak saka ibinalik sa lamesa. Matamnan siya nitong pinakatitigan. Ang mga mata nito'y nangungusap. Simula't sapol, mabuti ng kaibigan si Fatima sa kaniya kaya alam niyang pinipilit siya nito para sa kapakanan ng papa niya.