💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🔮الحلقة 9 : القسـ4ـم🔮

هذا الرجل .....ابوك💙💚
🎆الحلقة التاسعة : القسم 4 🎆
💚💙
طلت جنات براسها ع الصالون وين رات زينب تمشي تجي في وسط راجلها واولادها ، كانت تسمع في تخرنينها ملي كانت لوطة ، الظاهر انو العايلة الكريمة حشمتها قدام الضياف " يعني ظهرتو عبارة بعمرك لا كانت عندكم ضياف .. اول مرة ماهو احنا يجينا حد لدارنا ويتعشى !؟ سي راجلي يبهت ويقعد ساكت وهو يسلم ع المرا ...ولدي العزيز الكبير يسيب في ضمارو ...و ولدي الصغير في عوض يودعهم طار وغبر والله اعلم وين اتخبى الله الله عليكم ...والله برافو "
هز ناظم حاجبو وهو يوشوش لخوه " والله زينب ها المرة .....غير اي مرة ...كاسحة "
وقف احمد "انا باش نروح ...نخليكم ليلتكم زينة "
دارتلو " ترص فم ...وين مروح...باش تبات هوني "
مط شفايفو بضيق وهو يمسد لحيتو " أمي ...انا ....باش نروح "
وساعت عينها وهي موش فاهمة الاصرار متاعو ع اامرواح " وين ماشي ومخلينا "
احمد " امي ...مخليك في الصومال ...هاك مع راجلك وولدك...انا تعبت ونحب نرتاح في داري "
فاضل " سيب الطفل خليه على راحتو ...طبيعي يهرب بجلدو بعد العرض ايلي يرا في امو تعمل فيه "
زينب وهي تكتف يديها في استعداد لعركة " نعمل في الشو مالا انا "
وقف ناظم وهو يهز في يديه لفوق " روسيا ضربت امريكا ....فامريكا رجعت قنبلة ...وانا باش نبدل الشان ونهرب بجلدي " قص عليهم في وسطهم وخرج
فاضل يتمتم " وانا زادا هاني ماشي "
زينب " ياخا نرمال ...وين ماشي "
فاضل " والله يا مرتي العزيزة ...بحكم العشاء وضيافك ...اضطريت نقص على خدمتي و نأجلها ...وكان تسمح يا للا توا ...ماذبيا نطلع لبيرويا نكملها "
خزر بعيد وين وقفت جنات " جناااات ...خلطلي قهوة ..وماذبيا مرة..."
ڨحر لزينب وهي بدورها ڨحرتلو ماخلتهاش في قلبها ، قعدت في اقرب كرسي ليها وهي اتبع فيه يبعد ....بارشا حاجات لازم تبقى وحدها وتخمم فيهم وهاذي فرصتها بحكم كل حد هرب منها ومن تخرنينها.
صرفڨ باب بيروه ومانجمش يشد روحو ع التنرفيز ...يكفيه ليلة كاملة يرحي وحدو ..دقت جنات الباب ودخلت بطبق فيه فنجان قهوة وكاس ماء ،حطتهالو على الطاولة وهو استغل الفرصة ودور المفتاح في الباب ، خزرتلو مصدومة ...في الحقيقة كانت متوقعة منو حركة كيف هكا بعد هاك العشاء المحنون " جنااااات ...شنوة المهزلة ايلي صارت ليوم !؟...وينك انت حتى نزهة تجي وبساقيها للدار وغير هذا بنتها مصححة مع ناز ...وانا مافيباليش كي الاطرش في الزفة "
رمشت عينيها " ماكنتش انجم نعمل حتى شي ..مدام زينب شدت صحيح تضيفهم "
خذى مرفقها وجبدها بقوة خلاها تخاف " ايه. ...وانت وينك في هذا الكل ...ظاهر فيك نسيت انا لواه مخليك معايا ها السنين الكل "
توجعت " سي الفاضل. ..راك...وجعتني "
نطرلها يدها " انبه عليك...قبل ما نتصرف انا تصرف انت....نزهة وزينب مالازمش يتقابلو جملة مرة اخرى ...وبنتها ....تجيبلي كل شي عليها ....واضح "
"واااضح "
"امشي توا ...."
ترددت "سي الفاااضل ..."
"شفمة زادا ...فمة مصيبة اخرى "
"مدام زينب ....يظهرلي شكت في حاجة "
"شنوة !؟...وعلاش قلت هكا ...فاش باش تشك "
"وقت راتك ...تخزر لنزهة ...حسيت بيها ماهيش نرمال و كايني بدات تخمم علاش انت تصرفت اكاكا "
"خليها تنحي من بالها اي شك...جنات....انا عندي عايلة توا ....مانيش مستعد نرجع لتالي حتى خطوة ...ونزهة واي حاجة مربوط بيها لازم نرميه وكان لزم نعفس عليه "