" يا حازم... يا حازم قوم بقا هتتاخر "
- بس خلاص صحيت اوف.... انسانة مزعجة، وبعدين انا كام مرة اقولك متصحينيش
- اصل طنت مش فاضية بتع.....
- يبقى لما تفضى تيجي هي تصحيني
- مش فاهمة ايه المشكلة لما اصحيك
- يومي بيبوظ - فعلا!!! طيب، انا اوعدك مش هصحيك تاني عشان يومك ميبوظش
ايه ده يا ربي، اكتر انسان سمج شوفته في حياتي ... داللي هتتجوزه ليها الجنة ، مش فاهمة عمال يتتنك على ايه ، عايزة اعرف الكائن ده طالع لمين، ده عمو وطنت واخته ناس زي السكر...
- ايه يا سمر مالك متعصبة ليه ... انتي صحيتي حازم؟
- ايوة صحيته
- وقالك ايه ضايقك اوي كده؟
- البيه ابنك مش عاجبه اني انا بصحيه... عاوز حضرتك اللي تصحيه، حتى لو مشغولة تفضي نفسك
- معلش يا حبيبتي متزعليش، هو خايف عليكي.
- خايف عليا!!! ليه؟، هو اول لما بيصحى بيقلب مصاص دماء ولا ايه
- هو مين ده اللي اول لما بيصحى بيقلب مصاص دماء؟
ضحكت بصوت عالي وشاورت عليه
- مش هلوم واحدة ملقتش حد يربيها!
وقفت وقلتلهم: عن اذنكم انا هدخل انام، منمتش كويس امبارح
للاسف حازم عنده حق، انا فعلا ماما وبابا اتطلقوا من زمان... كان عندي 5 سنين، انا بنتهم الوحيدة ، عمو سمير اخو بابا اقترح عليه انه ياخدني اعيش معاه ... بابا وماما كانوا دايما بيرفضوا، بابا كان دايما بيتتريق على عمو ويقول عليه (عم الشيخ) عشان هو متدين ، وماما كانت شايفة طنت ست مملة وجاهلة ، لما اتطلقوا كان كل واحد بياخدني شوية... ولما كنت بعمل حاجة غلط كل واحد بيتهم التاني بالتقصير، وآخر مرة عمو طلب ياخدني كانت من 3 شهور واخيرا وافقوا، بس حازم كان رافض الموضوع ده تماما... باين جدا من تصرفاته
- طنت قالتلي عاللي حازم قاله، متقلقيش ، هحرمه من المصروف
- هههه احسن يستاهل
انتي فكراني بهزر ... انا هعمل كده بجد على فكرة
- ايه ده لا مش للدرجادي يعني
- عشان يتعلم الادب ، المهم قومي عشان نلحق الفطار عشان لو استنينا اكتر من كده تسنيم وطنت هيخلصوه
- بتاكلوا من غيرنا
- لا طبعا دي ماما هي اللي قالتلي تعالي ندوق الاكل يمكن يكون في حاجة مش مظبوطة
ضحكت "انا مصدقاكي"
------------------------------------------------
"يا طنت موبايل حضرتك بيرن ... يا طنت...."
ده حازم ... اكيد حاجة مهمة...
فتحت التليفون وقبل ما ارد لقيته بيقول: ايه يا ماما كل ده... بقالي ساعة برن، المهم خلي تسنيم تنزل تجيبلي كتاب هبعتلها اسمه عشان معيش فلوس، ابهات آخر زمن ، والله اللي بيحصل فيا ده حرام.
انا عارفة ان اللي عمو عمله مع حازم ده كارثة، خصوصا ان حازم لما خلص كليته اشتغل في كذا مكان بس مكملش ، عشان كده هو معندوش مصدر دخل ثابت خاص بيه، والنهاردة هيروح شغل جديد، والطبيعي انه يكون معاه فلوس كفاية، يا ترى اتحسبن فيا كام مرة دلوقتي
- السلام عليكم
" وعليكم السلام "
- فين ماما وتسنيم؟
" طنت في الدار عندها حلقة وتسنيم بتجيب حاجة من المكتبة "
- طيب، انا هروح انام
" استنا احضرلك الغدا
- لا شكرا
-------------------------
" عمو عمو عمو "
- عايزة ايه يا تافهة
ضحكت " عاوزاك ترجع تدي حازم فلوس "
-طب مانا بديله
" يا عمو هي الفلوس اللي حضرتك بتديهاله دي فلوس، دانا بيتهيالي ان حضرتك لما كنت في سنه كنت بتاخد اكتر من كده
ضحك ( هفكر )
- هتفكر في ايه يا بابا ها ها
- سمر عاوزاني ارجع ادي حازم فلوس
- نعم!!! لا طبعا ... بصراحة يعني انا مشوفتش حد في قلة ذوق ابنك... ده حتى مفكرش يعتذرلها
" خلاص يا تسنيم انا مش عاوزاه يعتذرلي اصلا... الموضوع خلص وانا مش زعلانة "
لقيناه داخل ومعاه بوكيه ورد قمر ( انا اسف بجد مكنتش اقصد اضايقك، انا بس كنت صاحي متوتر عشان الشغل )
ابتسمت " حصل خير "
