💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💚الحلقة10 : القســ3ـم 💚

هذا الرجل.... ابوك💚💙
🎆الحلقة العاشرة : القسم 3 🎆
🌸💚💙🌸
حبس الكرهبة قدام الدار وخزرلها " كنا زدنا قعدنا شوية مع بعضنا ..مازلت ما شبعتش منك "
تبسمت " انت ديما ماتشبعش"
"الله غالب مكراش شوية ،شعندي نعمل تره "
ضحكت" مالا لازمك تتعلم تصيم شوية ،ع الاقل من هوني لغدوة ...لانو باش نرجع لغدوة "
خذى يدها بين صوابعو " تولين ...تنجم تزيد ترتاح اذا ساقك مازالت توجع فيك والا مقلقتك "
كبست على صوابعو وحطت يدها الثانية عليه " لاباس عليا ...ضربت النوم لين قلقلت ...وزيد كملت اكزامانات الفاك...وباش نتلهى بناز توا وقت كامل "
"كيف ماتحب ...اما لازمك تعرف انو فاي وقت تحس روحك ماكش نرمال وتاعبة تنجم تروح وتاخو ايامات "
ضيقت عينها " وعلاش تحبني نزيد نقعد....امم يا وحيد تحب تشلل عينيك بالعارضات في غيابي "
ضحك " تعرفها صنعتي "
"ايه...مالا كيفاش عرفتني "
"نفكرك انو انا عرفتك قبل ماتكون عارضة...وقت كنت محمد علي كلاي "
"نعم ...انا محمد علي كلاي "
"ايه ...موش هديت عليا وعلى وليد صغير وقتها "
صونى تاليفونو وكيف لقاه الخدمة حطو سيلسيون " لازم تمشي.... من بكري وهوما يطلبو فيك ...كل حاجة وليها وقتها "
"المشكل موش منجم نخليك ...تولين ...شقولك ناخذ كونجي انا وانت و نمشاو نسافرو....موش انت تحب تسافر وزيد توا الصيف دخل ...ماذبيا نصيف معاك "
ضحكت "ايه...وقتها يبعثلولنا الانتربول من ناز . .توا الخدمة الصحيحة وجاي تاخو في كونجي ....هيا امشي ارجع للخدمة " باستو من خدو وهي تنزل بقوة شمت معاها ريحتو البنينة ايلي تموت عليها ، خزرلها بحب لو يلقي يقعد معاك العمر الكل هكا ، حلت الباب وهبطت ،بيبتلو وهو يدور كرهبتو ويمشي ...كانت وحدة من الجيران واقفة وتطل عليها من السطح ...الله الله ولت بالتوصيل الحكاية ...تمتمت " ربي يعطينا جار بلا عينين " تمنات من قلبها تنقل وتبعد من ها البلاصة ايلي يعسو فيها على بعضهم اكثر ملي يعسو فيه على رواحهم ، دخلت للدار و خزرت لاجنابها ....توا عندها وقت يكفي باش تشوف وتلوج فم ...اكيد تلقى حاجة تدلها ع العلاقة بين امها وجنات وقبل ما تعرف الحكاية لازم تقعد ساكتة وماتحكيش حتى كلمة ...تعلمت في اادنيا تواجه بالبروفة موش بالكلام ...بدات بالصالة لازم تلوج في التراكن الكل ومن بعد تتعدى لبيت نوم امها واذا مالقاتش في هاكم الزوز الف بالماية تكون مخبية حاجة في الكوجينة ....ماتستغربش لانو امها عقلية قديمة ...عقلية الجدة ايلي تنجم تخبي حاجتها حتى في حكة السكر .
********
شمس سخونة ....وطقس صيافي بامتياز ....مازال في اول جوان ،باش يكون صيف سخون بلڨدا ...وها الصيف ممكن يبدلو بارشا حاجات في حياتو ، حط الكاس متاعو ع الطاولة و خذى الورقة الصغيرة بين اطراف يدو ، اسم تولين وادراسها ونومروها ....قرر يطفيها وينحيها من بالو اما ديما الحاجة ايلي نحبو ننسوها نلقاو المخ عامل بلعاني و يفكرنا بيها في كل وقت ، تنهد وهو ياخو تاليفونو ويقيد النومرو ويطلب ...لازمو يكون عادي ....بالاخير هو اركان ...من اي ناحية ماتنجمش ترفضو ولا ترفض اي عرض يقدمو ...
تلهات تفتوش وتلوج بين الدبش والقجورات في الصيكان واواراق واكتب الخدمة ....لازم فمة حاجة صغيرة تفهم منها شنوة العلاقة بينهم الزوز ...فبرا تاليفونها في جيب سروالها ...باز هذا احمد وصل وحاب يطمن عليها ...تبسمت للفكرة ...اخ منك حمودة تقتل بها الفازات متاع الحب واللهوة ...لكن النومرو كان خاطي ....هذا باز واحد من الصحافة والا الفان متاعها ...موش وقتو جملة ...علقت وطيشتو في اقرب طاولة ليها ...الاهم توا نفركس وتربح الوقت قبل ما تروح امها ....والا موش باش تلقى فرصة كيف هكا ...هي باش ترجع للخدمة وامها باش تاخو عطلة الصيف ...مالازمش تضيع الوقت .
ضحك ...شي يضحك بالطبيعة ...يعني...توا علقت عليه ...توا رفضت انها تحكي معاه...طفلة ع الكوكب هذا ماتحبش تحكي معاه ....هو ايلي ياما عارضة جات وترمات عليه وماكانتش طالبة منو غير انها تكون معاه ...لكن سندريلا هاذي سكرت كل باب يحل عليها ...اذا تاليفون وعلقت عليه ودارها ماهيش موجودة فيها ...كيفاش باش يوصللها ...جبد كاسو و شربو للاخير ...كان قوي بارشا متاع رشفة وحدة موش يشربو فرد المرة ، تحل الباب ودخلت وفاء وكيف رات الدبوزة و الكاس استغربت " من وقتاش انت تشرب في النهار والقايلة "
خزرلها بطرفة عين " وانت من وقتاش تحكي معايا ع الشرب وتناقشني "
خزر للروب متاعها ايلي فوق الركبة ببارشا وبروتالها كاشف اكتافها و بارتي من صدرها " برا بدل ها الشوالق "
"شوالق !؟...قتلي شوالق ...تعرف قداش شاح ريقي وانا نلوج فيهم "
خزرلها بغش وتعرف شنوة يصير اذا ناقشتو اكثر "باهي ....انت ماكش خارج ...هيا نمشاو نعملو عومة صغرونة في البيسين شمس مااحلاها "
"تو نخلط "
"اركاااان "
ڨحرلها " شنوة تحب "
" علاش متغشش "
نفخ " ترى فيا منرفز ....هذيكا خليقتي وزيد .....انت اش يهمك ! اتلهى في الموضة متاعك "
"زعمة تولين ...ماعندها حتى دخل "
حمارو عينيه ولمعو بشر ، رعش بدنها بكلو وهي ترى فيه ياقف " انا موش موصيك ماتحلش فمك في حاجاتي ومشاكلي الخاصة "
"باهي باهي ....انا هاني ماشية "
دارت تجري وخرجت ،خلتو واقف وعينيه مازالت مليانة شر ، تولين ...شكوني اصلا ها المرا باش انا نتغشش وتأثر في نفسيتي ...تلفت للدبوزة و حلها ...شرب طول منها من غير ما يصب في الكاس ، حرقتلو ڨراجمو خلاتو يحبس لحظات ومن بعد يرجع للشرب منها .
*****"""****
خزرت لوجها في المرايا ...كانت مرا مزيانة ....قامت بواجبها كمرت فاضل على اتم ما يكون ....كانت ام باهية وتلهات باولادها كيف ما يلزم ....مام حتى في خدمتها كانت مصممة مشهورة وخدمت مليح ....لكن علاش في ها اللحظة تاقف ضعيفة وحاسة بنقص كبير ....شنوة الشي الغالط في حياتها خلاها تقابل الاكس متاع راجلها وتقبلها في دارها ....موش عارفة شكون تلوم ...في ها ااحكاية ...رتجلها ماكان عندو حتى دخل ...كان واضح معاها ...قبل مايعرس بيها حكالها علي كان معاها وكيفاش وفات حكايتهم ...وكان في كل ها السنين فيدال ومازاغتش عينو جملة عليها ...هي زادا كانت فيدال و مانجمتش تتخلى عليه وعلى اولادهم ....غلطة شكون مالا !؟....غلطة احمد...هو ايلي اختار ها الطفلة ....هو ايلي دخلها لقلبو من غير مايعرف ماضيها ...ومالازمش يعرف ماضيها. .تتصور كل شي يجي الا تقبل بنت الاكس متاع راجلها كنة ليها ...مستحيل تخلي ها الشي يصير ومهما باش يكون الشي ايلي باش تعملو هي مجبورة تدافع على عايلتها .

*********
لوجت مليح في وسط الدبش من غير ما تفلت بلاصة ، وصلت يدها لصندوق صغير ،حلتو لقات فيه اوراق قديمة تخص عرسها الاول واوراق الطلاق متاع امها ...تكونش جنات عندها صيلة بها الطلاق ...توا تعدت سنين ملي مشى بوها وماتعرفش عليه اذا حي والا ميت ...كلمة بو بالنسبة ليها حاجة غريبة ماتعودتش تقولها ولا تحكي عليها ...ورقت الاوراق بين صوابعها وهي تقرى في كل وحدة ....مالازمش تفلت ديتاي صغير ...ها التعب الكل مالازمش يمشي خسارة ....تعقدت حواجبها وقت وصلت لورقة مكتوب عليها حكم تبني ....قرات اسم امها واسم بوها ...و ماكانتش تنجم تصدق اسم الصغير ....وتاريخ الحكم ....تولين ....والتاريخ عام بعد عام ولادتها ....هذا يعني انو هي ماهيش بنت نزهة ...ماهيش من لحمها ودمها ...كيفاش هذا الكل يقعد مخبي وهي تقعد غافلة ...رعشت يدها ومانجمت تبعد عينها عليها ً...كانت بلا احساس في هاك اللحظة ...مات فيها كل شي ...مام حتى قلبها ايلي كان يضرب بقوة ماسمعتوش دقان ...تحدثت ع الخذلان من قبل لاحمد ...لكن ما تصورتش انو ها الخذلان باش يهزها لطريق واعر ...لحقيقة مرة ...لكذبة وكابوس عايشتو لاكثر من عشرين عام ...نزهة هي المرا ايلي حلت عينيها معاها كبرت وتعلمت وهي بين يديها ...كانو يقولولها تشبهلك....حد ماقالها ولا لاحظ انو ماهيش من دمها ....لو حد حكالها وقالها انت بنية متبنية كانت تضحك عليه وتحسبو مجنون ...لكن الحكم قدامها مافماش مجال للشك .....حست بدموعها تهبط لين تبل الورقة بين يديها ....بلاش صوت ...دموع ساكتة ...دموع صدمة خلاتها تعيش في دوامة ....مانجمتش تعمل شي ....لا تقوم ...لا تقعد....لا تاقف لا تمشي ....حبست وحبس العالم معاها ....تولين ....انت بنية متبنية ....نزهة موش امك.....امك حد اخر وبوك...حد اخر ....الف بالمية انت بنية جات في غلطة ....لحظة نزوة ....وتخلو عليك من بعد.....انت عايشة كذبة ...عايشة في منامة ....توا تحطم قصر البلار ايلي كنت راقدة وتحلم فيه....فقت على وضعها ...انت حتى حد....انت لا شيء ....مجرد غلطة وتبناتك مرا ...لا اصل ...لا فصل ...لا اسم ...لا لقب ....وتحلم تكون عارضة ومشهورة ...