وتيني_انت
#قصة_حقيقيه_للكاتبة_ام_ناي
#البارت_الاول
هذه صوره تشبه الابطال الحقيقين للقصه بشكل موطبيعي
وتيني انته اذا انقطع فارقت الحياه
....
شلونكم يمه شخباركم اني طبعا حبيت اكتبلكم قصتي ... وراح تساعدني #ام_ناي بسرد تفاصيل القصه...
ابداية القصه راح اعرفكم عن نفسي
اسمي ورد مواليد 1965 من عائلة جبيره وعشيره معروفه عايشه ويه والدي ووالدتي و احنه 7بنات 2 اخوان طبعا والدي متزوج 2نسوان واحنه عايشين ابيت واحد ع حب الله امي من اهل بغداد وهي الزوجه الثانيه لابوي خلفتله ثلاث بنات و ولد
ومن امي الجبيره ابوي عنده 4بنات وولد
اني الصغيره بزر الكعده خريجه متوسطه
مدلله كلش ابوي الله يرحمه كلش داراني وماخلاني بعازة شي ابوي جان كصاب معروف وعنده جواخير وحلال وعنده بيوت و عقارات ومحلات وخير من الله الناس بذاك الوكت جانت تحجي بخير ابوي ومن امشي العالم اتهابني جنت كلش مداريه ابوي خصوصا من اتمرض وصار بي شلل بسبب لعبة كرة القدم جان العراق يلعب ويه الكويت بوكتها وابوي انفعل علمود اللعبه و ارتفع ضغطه وصار بي شلل نصفي خواتي كلهم متزوجات ومحد بالبيت بس اني وابوي وامهاتي واختي متزوجه و عايشه ويانه لان زوجها عسكري وبغير محافظه
بيوم اني مليت من كعدت البيت كلت لاختي تشوفلي وظيفه وهي عدها معارف وواسطه بذاك وكت الحزب ..
وصدك اشتغلت بالمستشفى اداريه وجان دوامي مرات من صبح للعصر ب3 ومرات ب1ظهر لل8بالليل
جنت اول ما اكعد الصبح انظف البيت واطلع الزبل (تكرمون) للبلديه
واحضر ريوك ابوي و انطي علاجه و اطلع لدوامي
خلي احجيلكم مواصفاتي اني حنطاويه و شعري طويل واصل لاسفل ظهري وعيوني كبار سود ايشبهوني بالممثله الكويتيه هيفاء عادل القديمه
و اني مو ضعيفه لا جنت متروسه
وجنت من اروح للدوام ع حبايه ونص اني مو بحاجة فلوس لا بس علمود اقضي وقت واطلع
بالدوام جنت البس تنوره قصيره وحذاء برغي وبلوز ومرات البس نفنوف وجنت دائما اخلي مشط صفح وارفع شعري ليفوك والبس تراجي بلون ملابسي جانت عمتي تجيبلي هاي الشغلات من الكويت
جانت حياتي كلش هادئه وحلوه ومجان شاغل بالي شي جنت عمري 25 سنه وبيوم من الايام ....
احنه نكعد نتريك كلنه الموظفين هاي الي تجيب عروك و هاي الي تسوي مخلمه وهاي تجيب كيمر و هاي تسوي بيذنجان كلي ونكعد ع ميز ناكل ونسولف جنت اني كلش مجامله واضحك واسولف ويه الكل شويه و اجت زميلتي نضال اسمها وياها 2 شباب لابسين زي عسكري
كالتلهم تعالو تفضلوا اجيتوا بوقتكم الريوك جاهز هسه اصبلكم جاي
كعدوا ع سفره
بنات شباب اعرفكم هذا وائل اخوي وهذا احمد صديقه مثلما تشوفون همه ضباط استخبارات واليوم صار عدهم شغله بالمستشفى ومروا عليه
طبعا اني مارتاحيت لاحمد ولنظراته الي ولا نزل عينه من عليه
بيني وبين نفسي اكول هاي شنو مايستحي اووف خلي اكوم منا
وكتلهم سفره دايمه اترخص
نضال:وين عيني بعد كلشي ما اكلتي
ورد:لا والله اكلت بالعافيه كملو ريوككم
وطلعت وظليت امشي بالممر حتى اطلع للحديقه ورا شويه طلع وراي احمد ايباوعلي واقترب مني كال احس ضجتي خوما بيج شي خاف احنه زعجناكم و خربنه كعدتكم
لا ماكو شي ليش اضوج
من رخصتك اني عندي شغل
لحظه الشغل مو بالحديقه الا اذا تشتغلين فلاحه 😂😂😂
حظرتك شنو تنكت 🙄🙄
وعفته وخرت من يمه حسيت بي تافه
خلي احجيلكم عني اني احمد مواليد 1968 من عائله بسيطه عندي 2اخوان و 2خوات والدي متوفي واني عسكري بالبصره واهلي ابغداد قبل لا اجي لدوام رحت اخطب بنيه الي احبه لكن انصدمت برفضها هي واهلها وكالو انتو مو من مستوانا المادي واحنه مننطي واحد فكر بوقتها كلش ضجت لان خدعتني و طلعت تكذب عليه وكلت الله يعوضني خير ومن سافرت و داومت صار عدنه مهمه بالمستشفى مال ورد و مرينه ع اخت صديقي وائل و شفتها كلش عجبتني جانت تضحك وتسولف بس فجأه سكتت و را شويه كامت وطلعت وراها ...
ورد ::
رجعت للبيت لكيت ابويه كاعد ع كرسي و يمه العوجيه مالته وامي الله يرحمها تسوي كليجه للعصريه وامي الجبيره تفلس التمر سلمت عليهم و صعدت لغرفتي بدلت و ارتاحيت و نزلت جنت ارجع ب4 ف جنت اتغده بالمستشفى
نزلت لكيت بنت اختي جايه عمره 8سنوات كولتلها تعالي وياي خلي ننظف الحديقه ونغسل باب الحوش صار هواي مغاسلي حتى اطكلج كم صوره بكامرتي الفوريه الجديده (جانت هوايتي التصوير ) وعندي كامرات هواي جانت امي الله يرحمها تجيبلي عدت الايام عاديه وكل يوم ظل احمد يجي للمستشفى و اني اتجنب وجوده واطلع ماريد التقي بي
ومره من المرات جنت لابسه بلوز بنفسجي وتنوره سوده للركبه و شعري اسود مدرج وطويل وطالعه كلش حلوه اني ما اخلي مكياج تدرون بذاك الوكت بنت البيت متخلي بس المتزوجه و اذا خلت ف شي كلش بسيط المهم بيومها صديقتي نضال جايبه اقلام حمره وكالت شوفي هذن حلوات اخذت قلم جربته و عجبني ومامسحته كتلها اريد منهن اشتري و اضم اني
فجأه و اندكت الباب و اجه وائل ع اخته من شفته طب طلعت رحت للردهه اشوف صديقتي عدها ولاده وانصدمت باحمد باوعلي وكال ..
صباح الخير
صباح نور
موعيب عليج ماتستحين تخلين مكياج وتفترين و شتكول عنج العالم
لا والله انته شعليك خطيبي قريبي اخوي رجلي والله يالله شكول شكول
هاج مسحي (طلع جفيه من جيبه )
باوعتلها 🙄🙄
لاتخافين ترى نظيفه مسحي الحمره بسرعه
واذا ما مسحتها
كال ها هجي اذا ممسحتي
كمش الجفيه و مسح حلكي بيده
كتله شدتسوي شنو تخبلت
كال هجي احلى انتي
وعفته ومشيت
رجعت للبيت واني اتذكر الي سواه واسئل نفسي ليش هجي صار
وطلعت للسطح اشر زوليه واشوفه واكف بالركن
ياااا صخام هذا شلون اندل البيت عزه بعينج نضال انتي جبتي ودليتي ماكو غيرج
رحت يوم ثاني للدوام شايطه عيوني صايرات براسي كون الزم نضال واطيح حظها ع الي سوته وصلت و شفته من بعيد واكف بالحديقه كمت غيرت طريقي و رحت لغير مكان حتى ليشوفني و مادخلت لغرفتي كولت للبنات خلونا نتجمع بغير غرفه اليوم كتغيير وفعلا تجمعنه وفجأه دخل وكال هاي وينج مختفيه شنو شارده مني اني من شفته انصدمت و ضجت
طلعت كتله شتريد مني كال اريدج ع سنة الله و رسوله كتله روح ذاك بيتنه تندله انت اخطبني كال سهله اليوم اني اروح لاختج للمدرسه واحجي وياها حتى تمهد الطريق لابوج كتله#وتيني_انت
#البارت_2
#ام_ناي
