💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🍁الحلقة 11 : القســ3ـم🍁

هذا الرجل... ابوك💙💚
🎆⭐الحلقة الحادية عشر : القسم 3 ⭐🎆
💚💙
حطت يدها تحت راسها ، كمشت ساقيها و قربتها لكرشها ، تالمون بكات معادش عندها دموع باش تهبطهم ...لكن قلبها مازال مقسوم على نصين ...موش منجمة تفهم ...ولا حتى تصدق ...انها بلا ام وبلا بو...انها قطعة حبل جايبها واد...هزت راسها وخزرتلو وقت غطاها بملحفة " تبرد الصباح..."
غطى اكتافها "هوكا حذاك الماء ...واذا استحقيت اي حاجة وفي اي وقت ...كلمني ...و ...تنجم تسكر الباب من داخل ...موش باش نجم نحلو الا ...اذا انت حليتو "
"مانيش خايفة منك ..."
تبسم " اما انا خايف منك "
كان صادق...رغم انو عداها بضحكة ...خايف منها تخليه يضعف ...و ينسى روحو معاها ...وماينجمش يتحكم في مشاعرو ورغبتو فيها ،شدت يدو وقت دار خارج " خليك....ها الليلة برك ...مانحبكش ترقد بعيد...الفرش يهزنا الزوز ...."
اخ تولين ...علاش هكا ...ها الكلام هذا  ربطلي يديا ...بالسيف عليا نولي نتحرق بجنبك وتاكلني يدي بلا ما نسمح لروحي نحطها عليك ...ثيقتك هاذي ...تخليني ناخو عهد على روحي مانفوتش حدي معاك ....طلع ع الفرش بجنبها وتمد ...حاول يبقى ع الاطرف قد ما ينجم ...خلى اكبر مسافة بيناتهم ...لكن هي ما حبتش تخلي هاك المسافة ...قربت منو وسمحت لروحها تاخذ ذراعو وسادة ليها ،غمضت عينها براحة وهي تتكمش عندو ...غمض عينو بخوف ....اذا نجم يعدي ها الليلة على خير ...فمعناها هو راجل قوي و يستحق ثيقتها .
*******
تحركت رموشو بشوية وتململ دوبلاش ،حبس وقت تفكر انو هي راقدة عندو وبين يديه ، خزرلها لقاها مازالت راقدة و مكبشة فيه ...قعد يثبت فيها ...يقولو انو كي تحب انسان تتمنى انك تراه راقد ...وهو ماكانش عندو الوقت باش يتمنى لقى روحو يعيشها من غير سابق انذار...بعدلها راسها بالشوية باش يقوم ...لكن هي حلت عينيها ،ذابلين بالنوم ،تمتمت " أحمد "
امان ...موش بها النبرة ...ايلي فيني مكفيني "هيا قوم...وقيت بتي داج ع البحر قبل ما تسخن الشمس"
غطت وجها " خليني راقدة "
هز حاجبو " ابون ...ياخا انت كل يوم تفيق بالسيف هكا "
" امممممم "
"مسكينة امك "
نحات الغطاء ،تحلت عينها على كبرها وتعبات بالدموع ..." تولين...سامحني ...كايني قلت حاجة موش في بلاصتها "
عضت على شفتها باش ماتبكيش ،جبدها عندو وكبس عليها " شفت ...خياري ساكت "
تملمت عندو موش موافقة علي قالو ،لكن مانجمتش تتكلم لانو صوتها كان غالبو البكاء .
*****
وقفت الخديمة قدام جناة وهي تشرب في قهوتها " مدام جنات عندك ضيفة ...تستنى فيك في الجنينة  "
عقدت حواجبها " ضيفة ليا انا !؟ شكون ؟"
هزت الخديمة اكتافها " مانعرفش ..."
حطت الفنجان ع الطاولة وقامت باش تخرج ،ريڨلت شعرها وخذات طريقها للجنينة ، هزت راسها وقت قربت باش تشوف شكون ...تصدمت كيف شافت نزهة تمشي وتجي ع الڨازون وباين عليها الغش والتنرفيز ...هرولت ناحيتها " انت اش صار لعقلك ...وينو مخك....موش نبهت عليك معادش تحط ساقك في ها الدار "
شدتها من دبشها وخنقتها " شنوة ايلي قلتو لتولين ...شنوة الخرافة ايلي عبيتلها بيها راسها ...ياخا انا موش نبهتك وقتلك رد بالك تجي على حالها "
حمار وجها وهي تحاول تفكلها صوابعها على رقبتها " مجنوو....نة ....سيبني " دزتها بعدتها عليها وقعدت تلهث وتتنفس بالقوي " ماكش نرمال ..  قريب تقطع عليا النفس "
صاحت "تكلم بنتي ويني ...شنوة ايلي عملتو فيها "
"وانا منين نعرف عليها ...موش تبات وتصبح عندك ..انا ايلي لازم نسألك وينهي ".
قاعد مع امو و بوه يشربو  في قهوة الصباح وقت وصلهم الحس ،خزر لامو مستغرب " امي ...شنوة هذا ؟...قاعد تسمع "
الفاضل " ابارامون بناتك ايلي جبتهم جدد ...كلاو بعضهم "
صوت الصياح الموش مفهوم مازال واصللهم ،قامت زينب وهي تمسح في فمها وخرج معاها ناظم اما الفاضل ،فقرر يكمل يشرب قهوتو بلا ما يدخل روحو في حكايات العرك والمعروك هاذي ، بهتت وقت شافت نزهة وجنات مواجهين بعضهم  وكل وحدة تصيح في وجه اخرى ،صفر ناظم " اوهووو...شنوة تعمل ام تولين هوني ع الصباح "
زينب وهي تاقف قريب منهم " ان شاء الله خير مدام نزهة ...ظاهر فيك حلمت بكابوس فيه جناة "
ناظم وهو يحكي مع جناة" شنوة قاعد يصير "
ركحت شعرها وحاوبت تحسن من هندامها " والله انا بيدي سي ناظم موش عارفة شقاعد يصير ، هاك ترى على عينك ، جات تعارك مانجمتش نعرف حتى شنوة الموضوع "
زينب وهي توجه كلامها نزهة " انجم نعرف ماهو شنوة قاعد يصير في داري ماهو "
ضيقت عينها وطبست تهز في صاكها ، هزت جنات وحطتها " اسأل ...البون متاعك ...لعل تنجم تفهمك مليح شقاعد يصير ...انا لو نحكيلك ....راسك يبات يوجع ويمكن حاجات اخرى توجع "
وساعت عين زينب من الكلام الملغز ، يكونش قصدها ع العلاقة ايلي كانت بينها وبين راجلها ، شافتها تدور و تاخو طريق الخروج ،خزرت لجناة بشطر عين " شنوة ...ماكش باش تحكي ايلي صار "
جناة " والله يا مدام موش فاهمة . .جات سألتني على بنتها قتلي وين "
ناظم " اممم ...ظاهر عندها خبر انو تولين ممكن تكون معانا هوني ...." تلفت لامو " ايا نخليكم توا ....وقيت خدمة "
زينب " استنى ....ع الاقل كمل فطورك "
ناظم "بس خلاص انا نفسي تسدت "
ڨحرت لجناة " الحديث موش توا ....الحديث من بعد ...عندي رونديفو ولازم نمشيلو ومن بعد يعمل الله "
شافت الفاضل جاي ناحيتهم " ورد بالك تقول لسي الفاضل انو نزهة كانت هوني واضح ..."
" حاضر مدام "
وصل الفاضل " اه ...شفمة يا جنات ها الحس "
زينب وهي تحط يدها في ذراعو " بالضبط البنيات الجدد...ماحملوش بعضهم ...لش عندي نعمل "
ضحك " مالا كنت حالة المسامح كريم "

ضحكت "اكاهاو "
تبسمت جناة بالسيف عليها وقت ڨحرتلها زينب " ايه....اش عندنا نعملولهم ..."
*********
وقفو مقابلين بعضهم وهو باش يخرج " موش كان قعدت معاك ليوم خير ...نحسك مازلت موش على بعضك "
شاورت براسها لا " لازمك تمشي للخدمة ...انا زادا لو  عندي حوايج نبدل بيهم كنت مشيت زادا ...تعرف انو ليوم من المفروض نرجع للخدمة "
"موش لازم زيد ارتاح ،انا تو نحكي مع ناظم ...و بخصوص الحوايج ...توا نبعثلك من ناز شكون يجيب تبديلات "
"لا امان ...ماتبعث حد...تو يراوني هوني و الناس الكل تعرف انو انا وانت ....يعني قاعدين فرد دار ....وقت تروح جيبهم في يدك ....انا تو ..." تبسمت " ناخو حاجة من ...دبشك ...بالطبيعة كان تسمح "
هز حواجبو وهو يرا فيها تتعوقل " بالطبيعة نسمح "
"هيا ...وقيت خدمة ...ربي معاك "
وقفت على اطرف صوابعها وباستو من خدو ، عض شفايفو وضحك " شبيك "
هز حواجبو " لا شيء ...اما ...اول مرة حد يبوسني وانا ماشي للخدمة "
ضحكت "هياااا...."
دار خارج وماعطاهوش قلبو مايخزرش وراه لقاها تبيبيلو ...كيف بعد سكرت الباب ورجعت لداخل ...لازمها دوش باهي ...وترتح مخها باش تخمم في مصيبتها وتعرف شنوة باش تتصرف .