هذا الرجل ....ابوك 💙💚
🎆⭐الحلقة الحادية عشر : القسم 4 ⭐🎆
💚💙
حاس روحو خفيف ...خفة يعرف سببها تولين ...وجودها معاه عطاها بارشا طاقة ايجابية ونشاط يلزموه ...صبحو عليه ايلي يخدمو في الريسيبسيون وهو جاوبهم وفمو يتبسم ...مشى خطوات قبل ما يوقفو صوت " سي احمد "
خزر وراه لقاها نزهة ،الشي الصراحة بهتو " مدام ...نزهة ...لاباس"
"سامحني سي احمد ...كنت متمنية نقابلك في البيرو موش في كلوار هكا ....قالولي ما انجمش نقابلك من غير موعد ...فاضطريت نستناك هوني "
"لاباس !؟..."
"في الحقيقة ...حبيت نسألك على تولين ...وعندكمش عرض وهي فيه ...لازمني نراها ضروري "
قعد يخزرلها ومن بعد سألها " تحب تشوف تولين "
" ايه ...البارح ماباتتش بحذايا ...ماحكيناش..وانا عندي مانقلها "
موش لازم تفسير ...عارف انو مشكلة تولين مع امها والا ماكانتش بكت الصباح وقت جبدها قدامها ...وبحكم هي هربتلو باش تاخو وقت مع روحها وتبعد ...فمعناها مالازمش يقلها وين ولا يضويلها " بصراحة ...ماعنديش فكرة ...وايلي نعرفو انو تولين خذات ايامات اخرين كونجي ...يعني مازالت ماهيش باش ترجع توا لناز "
شافها تتوتر ووجها يصفار وحدو " باهي ...يعطيك الصحة ...يعيش ولدي "
تبسملها بحنية وهو يرى فيها تاخو طريق الخروج ...سخفتو وهو يرى فيها محروقة على بنتها ...لكن حتى تولين محروقة كيفها. ..بون مالازموش يتدخل في ها الحكاية الا اذا طلبت منو هي ...
"شنوة حكايتها ام تولين ...الصباح هادة ع الدار وتوا على ناز " .
خزر وراه ليلي تحدث " ناظم !؟...ياخا وقتاش جيت "
لعب بحواجبو "توا " مال ناحيتو ووشوشلو وهو يغمز بعينو " اما نجمت نسمعها وهي تسأل فيك على بنتها "
نفخ بقلة صبر..حب يفهم منو " وعلاه جات نزهة للدار "
هز اكتافو " تلوج على بنتها ....امممم اما انت علاش ما قلتلهاش انها معاك وفي دارك...المرا ظاهرة متقلقة عليها "
حل فمو مصدوم " ياخا شدخلك ومنين جبت ها الكلام "
ضحك " اخ يا خويا الصغير "
"شوف نقلك ....خليك بعيد على تولين وعلى امها ...وخاصة عليا انا " قبل ما يدور شاورلو بصبعو "....اه ....مركيلها ايامات اخرين كونجي ...ماهيش راجعة ليوم "
كمل طريقو للبيرو لكن ناظم وقفو وهو يشدو من مرفقو " احمد ....ياخا تحبها ها الطفلة بالحق والا نزوة وتتعدى ..نسأل فيك باش نعرف كيفاش نتصرف معاها "فسرلو " لانو لو انت تحبها. ..فانا مضطر نعاملها على اساس مرت خويا ...واذا انت تعدي في وقيت معاها ...باش تكون عارضة عادية كيفها كيف البقية "
"ياولدي شنوة دخلك فيا وفي حكايتي معاها ! ...من وقتاش نحكو في حياتنا الخاصة انا وانت "
زم شفايفو "صحيح مانحكوش ...لانو ...هاذي هي المرة الاولى يكون عندك حياة خاصة "
مسد لحيتو وشعرو " ناظم....قتلك خليك بعيد على تولين ...كلامي واضح ...اكثر من هكا ماتستنى مني شي "
"امممممم....واضح ...معناها ...تحبها "
كمل طريقو وطفاه ....ها الموضوع متفاهم هو وياها مايحكو فيه لحد في الوقت الحالي ...رغم انو مستعد...يواجه الناس.و .يحكي على علاقتهم لكن هز مضطر يسكت ويحترم رايها
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
