💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💙الحلقة 13 : القســ1م💙

هذا الرجل... ابوك💚💙
🎆⭐الحلقة الثالثة عشر : القسم 1 ⭐🎆
💙💚
دخل أحمد للصالون واول ماراتو نڨزت جات عندو وهي تتغنج بصوت فيه بارشا غنج " حمووودي "
بعدها عليه شوية وهو يخزرلها بشطر عين " حمودي !؟ موش على اساس ...سي ...أحمد ...و صحح الورقة ...وداخلة تعفس فينا يا ...للا تولين "
تململ بدلال" موش قلنا الخدمة تبقى خدمة..ماندخلوهاش في بعضها .... وزيد متفاهمين مانخلو حد يشك في العلاقة ايلي بيناتنا "
"سامحني وقت جيتني للبيرو كنا وحدنا ...علاش مالا دخلتها بعضها "
فسرتلو " لانو وقتها وقت خدمة ...وكيف وفى الوقت ورجعنا للدار ...نرجعو نرمال "
"وكيف وفى الوقت علاش ما استنتنيش نروحو مع بعضنا ،ضربت عليك ما لقيتكش"
"خذيت تاكسي وسبقتك ...باش وانت مروح من الخدمة تلقى شكون يستنى فيك "
هز حاجب بحاجب " بربي ...فهمتك "
بعد من بحذاها وقعد قدام التلفزة ،جات بجنبو " ياخا تغششت ...شنوة فيها هاذي ...انا هذا الكل نعمل فيه عليك انت باش حد ما يلاحظ عليك حاجة و تولي على سيرة كل لسان في ناز "
طفاها وبدل الشان ايلي كانت تتفرج فيها " حمووووودة تي شنوة توا ..تعرفني ما نطيقش غشك "
ماعطاهوش قلبو يخليها اكاكا ،فيسع مانسى غشو ،دارلها " نقطة ضعفي ايلي بعمرها ما كانت عندي هي انك تقلي حمودة ...ماتخلنيش نذوب جملة ..مازال الليل طويل "
ضحكت وهي تتحكك عليه " نعرفك حنين وقلبك رهيف "
✴✴✴✴✴✴✴✴
عدات يدها ع التصاور المفروشين قدامها ، مسحت دموعها ايلي هابطين مطر ...ماوقفوش من وقت ايلي تولين خلتها ومشات ...وخلت كل شي وراها ..دبشها ...تاليفونها ...مشات من غير حتى شي ...خلتها تغفص في دموعها وتلوج على سبب يشفي غليلها ويفسر هروب بنتها ...خبت عليها ايه ...اما من خوفها عليها ...ماحبتلهاش الوجيعة ...وقت ايلي سعات باش تبعدها على عايلة الفاضل كانت عارفة شنوة ممكن يصير ....طالما هو و جنات فم ...الحقيقة باش تظهر ...واذا هي سكتت وبعدت عليهم ...فلأنو باش تخبي ها الحقيقة ، خزرت لوجه تولين في التصويرة وهي في عمر صغير ...كانت واقفة وشادة يدها مليح ، كابسة عليها وخايفة تاقف قدام المصور وحدها...شكون قال ها الطفلة الصغيرة باش تكبر ويتقلب ها الخوف لعشق كبير للاضواء والكاميراوات حتى انها اختارتو طريق لحياتها ونجاحها ، تنهدت بالقوي من اعماقها وتمتمت بينها وبين روحها " شنوة باش نعمل ....شنوة باش نتصرف ...نحكي ايلي في قلبي ونخليه يتحرق والا نرضى ببعدك هذا..... المهم انت تعيش لاباس عليك وما يعاودش قلبك يتجرح ...انا نخاف وقت تعرف امك وبوك شكون تخليني وتنساني ...لكن بطبيعتك بديت تنساني ....ياربي ...نورلي بصيرتي ودلني ع الطريق الصحيح "