هذا الرجل... ابوك 💚💜
🎆⭐الحلقة الثالثة عشر : القسم 2 ⭐🎆
💛💚💜
مضغ الفاضل شوية من اللحم ايلي اختارو وهو يخزر لاولادو الزوز ، كان طقس مزيان تحركت فيه شوية نسمة زاد خلاه ياخو راحتو " ماشاء الله اولادي قاعدين قدامي قد الجبل ...شكون قال هاك الزوز ايلي يتكعبرو باش يكبرو فيسع و نولي نخرج نفطر معاهم "
ناظم " لا ...الاصح يخلصو عليك فطور "
الفاضل " انت كل شي كبر فيك ...حتى من لسانك طوال....حتى كليت عليه طرايح وانت صغير باقي هو هو "
ناظم وهو يضحك " يابابا ...الحكاية موش حكاية ضرب وعنف ...لو عاملتني بطريقة احسن وربيتني تربية نموذجية من غير كف وتصرفيڨ ...كنت تراني حاجة اخرى توا "
ضيق الفاضل عينو " كنت نراك اعظم من هكا تقصد "
ضحك ناظم وكمل ياكل " ايه يابابا ...كي السبة خرجت معانا ...موش في العادة ...اه ...فهمت ...ظاهر فيها للا زينب قتلك اخرج معاهم ...نعرفك ماتمشي كان برايها "
الفاضل " نااااظم ...ايا احشم...." مط شفايفو " انا هوني باش نحكو رجال في بعضنا ...بما انكم كبرتو ...وليتو في عمر متاع زواج ....بون استنيتكم انتوما تفاتحوني وتقولولي عندنا شكون و نخممو نعرس بيهم ...اما مافمة شي ...اضطريت نبدا انا "
خزرلو احمد على جنب اما ناظم فركز اكثر وهو يسمع فيه يكمل " حبيت ناخولك نورس ...نعرف قداش انت تحبها وعينك فيها من توا موش من قبل "
تبسم ناظم بفرحة ، خزر الفاضل لولدو الصغير " وانت ...باش ناخولك ريما "
حط الفرشيطة ع الطاولة بنطرة " وشكون قالك خوذهالي "
عقد بوه حواجبو " الطفلة عينها فيك وبوها شريكي ...شنوة مشكلتك انت معاها "
حمار وجهو وبانو عروقو " المشكل انو الحياة هاذي حياتي ...موش حياتك انت باش تختار ...وزيد كيفاش تقرر في بلاصتي .....وانت تعرف مليح انو ها الطفلة لا نحبها ولا تعجبني ونزيدك...نكرها ومانطيقهاش "
بلع ناظم ريقو ، متوقع حاجة كيف هكا من خوه ، استغرب بوه من الحالة هاكي متاعو " ايه ....وبرا ماتحبهاش ...ياخا انا وعايلتي و خدمتي باش نتضضرو خاطر مشاعر سيادتك "
بهت احمد " مشاعر سيادتي ؟!...شبيها مشاعر سيادتي ...حاجة تافهة اه ما تستحقش تاقف معايا على خاطرها "
الفاضل " لانك انسان ماتخمم كان في روحك والعايلة ماتعنيكش ...واكبر دليل انك اخترت تعيش وحدك ودار بوك محلولة ...هاذي فرصتك الاولى باش تعمل حاجة لعايلتك وماتخليش بنت شريكي تستنى فيك بالفارغ "
"ايه ...وبالكي انا عندي شكون في حياتي غير بنت شريك....وبالكي انا واعدها بالعرس ...زعمة موش عيب نخليها تستنى فيا بالفارغ هي زادا ...والا حتى كيفي و مشاعري هاذي ماتسوى شي عندك "
"عندك شكون " خزر لناظم لقاه مهبط راسو وعامل روحو ياكل " وشكوني وعلاش مافيباليش "
أحمد " بابا ....انا مستحيل نعرس بريما ...ها الشي لازم تفهمو ..."
اصر بوه " قتلك شكوني "
قعد ساكت لحظات من بعد وقف " تولين ....العارضة تولين ايلي دخلتها لدارك و ضيفتها ...عرفت توا شكون ...يعيشك...مادخلش حياتي في صفقات خدمتك وتعمل منها مشروع للربح "
خزر لناظم ومن بعد لفاضل " بالشفاء ليكم "
خلاهم وهز تاليفونو ومفاتح كرهبتو ومشى ، قعد بوه حال فمو مصدوم من الشي ايلي سمعو تلفت لناظم " وانت !؟ في بالك موش هكا "
" لا...مافيباليش ...ديجا تعرف احمد سكوتي ما يضوي شي "
كان عارف انو يكذب ومشلق على روحو زادا " موش مشكل ...انا نعرف كيفاش نتصرف فيك وفيه "
✴✴✴✴✴✴✴✴
قعد يسوق قريب الساعتين وهو في الطريق من غير ما يكون عندو بلاصة يمشيلها ، لقى روحو يمشي في نفس الشارع ويعاود يرجع فيه ...فماش ما يخف التنرفيز متاعو . .موش عارف بالضبط شنوة ايلي مقلقو الا مخليه مغشش بالطريقة هاكي ...موضوع بوه يتصرف معاه تقول وليد صغير وياخو في القرارات في بلاصتو والا موضوع تولين وفكرة انو يبعد عليها ...اختار بلاصة ع البحر وقعد ...نسمة بطبيعتها هايلة ...الموج فكرو بيها كانت تسرح معاه وتضيع فيه...على ذكرها لقاها تطلب فيه ...كان لازم يروح عندو ساعة هاكي علاه حبت تطمن ، بما انها تحب البحر ماعندوش حل اخر غير انو يخليها تجيه لفم ...منها يعدو وقيت مع بعضهم لبرا ومنها هي ترتاح ومنها زادا هو ينحي التنرفيز متاعو ، لقاتها من الجنة الناس ، بدلت دبشها ومية و حكاية اربعة دراج كانت حذاه ، طلعت الحجر وهي تناديلو "نرمالمون تجي تعاوني "
تبسم وخزرلها وهي تاقف بحذاه "الليل عادك بيه طاح ...لواه مازلت قاعد لهوني "
"مالا لواه جاية كي الليل قريب يطيح "
"لانو الحال صيف ونرمال اذا طاح الليل "
"اه. ..عليك انت اكاهاو الصيف اما انا لا "
فاق انو ماعداش دقيقة ملي جات بجنبو وتقلبت حالتو وارتاحت نفسيتو ،خزرتلو لقاتو مثبت فيها ببهتة " شفمة !؟ "
هز حاجبو "والو ....غير ...نحب نتأملك "
"امممممم...."
تلفتت للبحر خلاتو ينطق من جنابو " لا امان ...ليوم بالذات اخزرلي انا ...اخطاك منو ..."
"باهي ...تفضل "
دارت في قعدتها ناحيتو ، بلع ريقو و لقى صعوبة يحكي ...موش عارف اصلا اش يقول ...هو علاش طلب منها تجيه لفم ،نفخ بقوة وهرب بعينيه بعيد ، استغرب من حالتو هاكي " شفمة احمد....ماكش كيف العادة "
خذى نفس طويل وعاود خزرلها " تولين ...اذا ...نقلك نعرسو شنوة يكون ردة فعلك "
اطرشقت بالضحك وضربتو على كتفو " لا انت خجيت "
"واذا هاذي نيتي ...ونحكي بجدي "
تقلب وجها ورجع جدي " شنوة معناها !؟ "
"يعني ...نعرسو ويوفى كل شي "
"احمد ....انا ....ماانجمش ...مازلت كي حطيت ساقي في الدنيا ...اذا عرست توا ...حلمتي في اني نكون مودال عالمية باش يمشي في الريح ...وغير هذا ...انت ماتعرف عليا شي ...لا اصلي ولا فصلي ...مازالت بارشا حاجات ماحكيناش فيها ...اصلا مازلنا ماعرفناش بعضنا مليح "
"ابون ...توا ولينا مانعرفوش بعضنا "
هبطت راسها "ايه مانعرفوش ....انت مثلا ...تعرف انو انا ...." سكتت وخزرت للبحر ، مد يدو لوجها ودورو ناحيتو " انت شنية !؟ "
"اني ....مانيش بنت نزهة ....مانعرفش شكون بابا وشكون امي ...أحمد انا متبنية "
قعد لحظات ساكت يثبت منها اذا تفذلك والا تحكي بجدها ، ضحكت بمرارة " متوقعة منك ردة فعل كي هكا "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
