هذا الرجل ابوك 💛💚
🎆⭐الحلقة الثالثة عشر : القسم 3 ⭐🎆
💚💙💜
نفخ بقوة " ياخا لواه تقرر وتحكم وحدك...." سكت لحظات" هذا علاش انت وامك متعاركين ...يعني انت ونزهة "
شاورت براسها ايه " ماعنديش بارشا ملي عرفت ها الحقيقة ...تصدمت وانا نقرا في حكم التبني "
كانت تحكي بحرقة خلاتو يفهم ايلي تعاني فيه ويفسر حالاتها النفسية ايلي تعدت بيهم من وقت ما جات بحذاه " انا من رايي ...موش نزهة ايلي لازم تعاقبها ...المرا وحسب ما شفت ترعش عليك ...خمم لو ماجاتش هي ...شنوة كان ينجم يصير فيك....وزيد تجري من بلاصة لبلاصة وقلبها محروق عليك "
"نعرف ....اما هي خبت عليا ...لو حكاتلي حقيقتي من قبل ماكنتش نقاطعها ولا نبعد عليها ...كنت كيما تقول انت نخمم شنوة ينجم يصير فيا لولاها هي ....تتصور حقيقة اني متبنية موش باش يعرفها حد....يكفي انو حد يبربش شوية تو يعرف ...اذا انا معملة ننجح في ها الطريق ...لازم نعرف نقاط ضعفي وقوتي باش نواجه ...تخيل لو واجهوني بحقيقتي وانا مانعرفهاش ...كنت نبقى غافلة حياتي الكل و ناكل صدمة حياتي ونخسر كل حاجة بنيتها "
" والحل...تقعد مقاطعتها "
"لازم تعرف انو هي غلطت ...وزيد مستحقة وقت باش انجم نصدق ايلي ريتو ...وهي مستحقة وقت تراجع فيه روحها ..." خزرتلو " مازالت عندي حرب كبيرة ...وهي اني نعرف امي وبابا شكون ....نوصل لحلمتي ...احمد ...مازال بارشا ع الوقت ايلي لازم نخمم فيه ع العرس ...وانت زادا ...خمم اذا انت تقبل تكمل حياتك مع وحدة مجهولة النسب كيفي "
حك شعرو " تولييين ...انا ...ماخممتش حتى مرة في كونو اصلك والا ....والديك والا ظروف حياتك تنجم تكون عايق بيناتنا ....ماتنجمش تحكم على روحك مجهولة النسب قبل ماتسأل وتعرف ....ربما انت عندك بوك وامك ولتوا حيين ...ولظروف بعدو عليك ...ربما هوما مايعرفوش انك انت حية من اصلو ...."
ضحكت " قداش الحياة عندك وردية ....انا متبنية لانو هوما تخلو عليا ...والسبب هو اني جيت في غلطة ....الحقيقة مرة ...اما كل دواء مر ...يشفي الجروح فيسع"
تنهد بصوت مسموع " وانا وانت ؟!..باش نقعدو هكا !؟...متخبين !....اوكي انجم نفهمك ماتقبلش فكرة العرس توا ...اما ...ع الاقل خلينا نكونو مع بعضنا قدام عينين الناس ...موش لازم كل حد يمشي للخدمة وحدو ويروح وحدو ...وتعاملني عرف ونعاملك مجرد عارضة ...اوكي الخدمة خدمة اما ..موش لدرجة مانعرفكش....تولين ...انا قابلك كيف ماانت ...لا امك ولا بوك و لا ماضيك يهمني ..."
تبسمت وعنقتو " ممكن لهذا الشي انا نحبك...و خليت كل شي وجيتك نجري ...ليك انت اكاهاو ..." خذات نفس طويل " اوكي ...خلي الناس الكل تعرف ...انو انا وانت مع بعضنا "
✴✴✴✴✴✴✴
قعدت زينب مقابلة راجلها ،شافتو شارد ويفرك في صوابعو مبين انو موش على بعضو " عزيزي "
خزرلها بعين ذابلة ،جات جنبو وقعدت ،مسدت اكتافو بحنية " شبيك...موش على بعضك ...شنوة صار كي فطرت مع الاولاد ..."
حطت يدها على مكمن الداء ...نفخ بقوة " ولدك ...باش يجيب اخرتي كان هو ...."
"شكون من اولادي "
"احمد....احمد يالا قالك لا حاجتي بريما ولا عيني فيها ...ونقلك...قال ميت فاني على وحدة ...تحب تعرف شكون ...تولين...العارضة ايلي دخلتها لداري ...سلبتلو عقلو ..."
هبطت راسها خلاتو يستغرب " تقوليش ...انت زادا في بالك "
خزرتلو " ايه في بالي ...مالا انا لواه قتلك احكي معاه ...لانو مانحبوش يكون مع هاك الطفلة "
"ولدك ...يحبها يالا ...احمد بعمرو لا قال اه قدامي ...وليوم وقف وتحداني ..وقال باهي يا لا ...شنوة باش نعرسولو بالسيف "
"اه ...تقليش باش تاخو بخاطرو وتعرسلو بيها ". وقفت وبانو عروق وجها " معناها فرصة ً.....تتفكر اياماتك مع امها "
تصدم من الحديث ايلي سمعو ،وقف مقابلها " شتقصد بكلامك "
تحدتو " نقصد ايلي انا غلطت غلطت عمري ...ودخلت الاكس متاع راجلي لداري وحطيت بنتها العارضة متاعي...وتوا ....نحب كل شي يتصلح ....وقرارك توا باش يخليني نعرف انت شحاجتك بالضبط ...يا اما تختار الماضي متاعك واتبع ولدك وتخليه يدخل الطفلة هاكي لدارنا وهكاكا تخسرني انا وعايلتك ...يا تاقف في وجهو و تمنعو من الشي هذا ونكملو حياتنا كايني ماصار شي ...قرر ...وخوذ وقتك "
جات باش تمشي وقفها بيدو " من وقتاش تحكي كلمة وتمشي... من وقتاش تخلي حديثنا في الوسط يالا...والاهم ...من وقتاش تبربش ورايا ....كايني تحاسب فيا !....على شنوة بربي!؟ ...هاك طلعت حكاية من راسك ورديتني متوحش الاكس!.... زينب ...انا وانت عشرة توا ...وقت اخترتك تكون ام اولادي مانيش نلعب ...وايلي باش يخمم يفتت ها العايلة باش يلقاني في وجهو ...الماضي يقعد في الماضي ...لازم تعرف انو انا ...مايساعدنيش انو ولدي يكون مع الطفلة هاكي.... قراري واضح..."
خلاها واقفة وخرج طالع لبيروه ، تحسست جبينها وكبست على نواظرها "تحمل زينب ...لازم تخمم بالعقل ....وتخرج عايلتك من ها الورطة "
✴✴✴✴✴✴✴
كبس على صوابعها بقوة وهوما ياقفو قدام باب ناز "عزيزتي ...شنوة تفاهمنا !؟...مالازمش نشوف وجهك مقلوب هكا ...احنا مع بعضنا وحد ماعندو الحق يتدخل فينا ...داكوغ "
بلت شفايفها باطرف لسانها وشاورتلو براسها باهي ، تبسم " مالا اعطيني هاك الضحكة ايلي تخلي عينيك تلمع من تحت ليناتك هاذي "
ضحكت و ودخلت صوابعها بين صوابعو اكثر ، مشاو خطوات وهوما داخلين خلو الناس الكل يخزرولهم ، ايلي هذا مال على صاحبو يوشوش وفيهم ايلي وقف مصدوم ويخزر موش مصدق ، تبسمت بقوة وهي تمشي بجنبو اما هو كان هادي ع الاخير ..ويمشي براحة ومبين على وجهو قداش فرحان ...وقت وصل قدام الاستوديو متاع التصوير دورها قدامو ،كان عارف انو الناس الكل يخزرولو بحكم ايلي كل شي بلار هاكي علاه حب يوصل ميساج للناس الكل انها هي ملكو ، مال عليها وباسها من خدها ،شاف وجها يحمار ،وشوشتلو " احمد...بالغت راك "
"اشششش...تبعني وانت ساكتة ...هيا بون كوراج وبون ترافاي "
تبسمت "وانت زادا "
خلاها لين تدخل وشاف بهتتة العارضات ولمتهم في كوكشة وهوما يخزرولهم وخطف الدورة ماشي لبيروه ،جاء كف وغرزة مع ناظم "أحمد !...شنوة ايلي عملتو ...اليد في اليد ...ياخا هبلت ...كان ناوي تتحدى بوك وتعمل عليه بلعاني نقلك راك غالط...الشي ما يجيش هكا "
"اممم...كيفاش يجي ...نخبيها ...والا نكذب ونقول مابيناتنا شي...لانو ...ماعنديش في قاموسي الحل الاخر ايلي في بالك وبال بوك ...انا ...مع تولين ...حبيتو والا كرهتو "
جاء صوت صياح من اخر الكلوار "احمدددد " تلفتو وراهم لقاو ريما جاية تهد و مبين انو متغششة ع الاخير ، اول ما وصلتلهم دزت احمد ع الحيط " داخلين اليد في اليد ...ماعلى بالكم بحد ...قتلك ابعد عليها ...مشيت تتمعشق معاها " كانت تصيح على طول صوتها ،خلت الناس الكل تطل بروسها وتشوف شفمة
صاح ناظم " كل حد يتلهى في روحو يلا "
ركح احمد حالتو و نظم دبشو بدم بارد من بعد خزرلها وهي تلهث " المرة الجاية ...اذا تصرفت ها التصرف ...باش نعملك تقرير ونعديك ع المجلس التأديبي...كابيتو "
دزها من قدامو وكمل طريقو خلاها تصيح وراه " والله مااندمك ع النهار ايلي خزرتلها فيا ...انت ماتنجمش تعمل حاجة كي هكا فيا "
حاول ناظم يهديها " ريما ...يزي ...في الشركة رانا "
ڨحرتلو " هذا وعدك ماهو....باهي ...العين بالعين سي ناظم ...كل واحد فيكم باش نخليه ياكل صوابعو ندم خاطرو وقف في صف هاك الفقسة "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Cerita Pendek★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
