💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌹الحلقة14 : القسـ3ــم🌹

هذا الرجل.. ابوك💚💙
🎆⭐الحلقة الرابعة عشر : القسم 3 ⭐🎆
💙💚
خزرت من البلار ايلي يحل ع تيراس اخضر واسع ،منظى مزيان ومستحقة تشوف مع السخانة متاع الصيف ، شافت ااوقت من تاليفونها لقاتها الخمسة ...ياخا لواه لتوا لا جات صفاء والبنات ...عطاتها الرستو والوقت و هي ماورتش وجها ...تنهدت بصوت مسموع وعاودت خزرت بعيد للتيراس "الله لا ينهدك "
خزرت للواقف قدامها وهو يتبسم "انت ؟! ...شتعمل هوني "
جبد كرسي وقعد بكل اريحية "مانيش ...انت ...انا اركان ...شفت مااحلاه اسمي "
زمت شفايفها " يا سيد...عندي في شكون نستنى ...تفضل يعيشك "
ضحك " انجم نعرف شكون "
"حاجة ماتخصكش"
ضحك مرة اخرى وهو يخزرلها " تكونش ...صفاء ...هكا اسمها يظهرلي ...بون ...باش نصراحك لذا شد روحك ...صفاء هاذي سبة وبرا ...يعني باش انا نشوفك ...هي الواسطة "
حلت فمها مستغربة " ص...صفاء ...وانت منين تعرفها. ..وعلاش تعمل هكا معايا ...ياخا موش قتلك معادش تتعرضلي "
"هكاكا إسألها هي ...و بخصوص اش قتلي . ....انا راني نسمع ونفلت .."
ضربت الطاولة ووقفت " اقعد اسمع مالا ...ها الفازات متاع المراهقين كبرت عليهم راك "
تقلبت ضحكتو لجد " كيف نكون انا ع الطاولة ...حد ماياقف منها قبل ماانا نقلو "
حطت يديها الزوز ومال ناحيتو وهي تهز في حواجبها " في كل حاجة لازم فمة المرة الاولى ....وهاذي زادا احسبها المرة الاولى ايلي ياقف فيها حد من طاولتك قبل ماتقلو سيادتك "
هزتو وحطتو ومشات ، قعد يتبع فيها بعينيه وهي ماشية تبعد...من بعد ضحك ...شنوة هاذي...كل مايقول حلها معاها يلقاها زادت تعقدت اكثر واكثر ...اعترف بينو وبين روحو" ظهرت ماكش ساهلة سندريلا " وقف بدورو وشرب كاس العصير ايلي هبطتو هي فرد المرة " ع الاقل نحلل فلوسي ...حرام نخلص حاجة ماشربتهاش" بحكم هي خرجت فهو ايلي باش يخلص العصير ايلي طلبتو ،حط اكثر من الاديسيون وخرج بدورو .
وقفت قدام الكافيتيريا تستنى في تاكسي ،تحكي مع صفاء وكشاكشها طالعة " انت هبلت !؟...كيفاش تعمل حاجة كيف هكا ....تعرف ايلي عملتو قداش باش يعملي مشاكل ماهو ...اسكت صفاء مانحبش نسمع منك حتى عذر " علقت وهي تنفخ ، تالمون مشغشبة ماشلقتش بالكرهبة ايلي حبست بجنبها وهبط منها حد ، ما حست كان بيد تجبدها وتدخلها بالقوة ، خزرتلو لقاتو اركان " فاش تعمل !؟...واعي بالشي هذا. .ياخا باش تخطفني ، كان اقوى منها اضعاف وقت كبس عليها فكساها ع الكرسي و ريطلها السنتيرة ، تململت وهي تحاول تحلها وقت حلتها وهمت باش تهبط ،لقاتو هو قدام الفولون و الباب تسكر ساياي ما يتحل كان من عندو ، سكر البلار وهو يضحك " قتلي لازم تكون اول مرة لاي حاجة . " غمزها " وانا هاذي اول مرة نخطف طفلة " صفر " بصراحة احساس موش عادي "
خدم كرهبتو وطار بيها وهي تخرنن وتسب و ساعات تضربو ، وهو ماعلى بالو ، ع العكس يضحك وعامل جو ، راق شيحها ومانجمت تعمل شي قدامو ، وكيف وقف بيها نڨزت عليه وعضتو من زندو وكملت خبشتلو رقبتو ، صاح وبعدها عليه " شبيك مكلوبة "
" سيبني خير ما نلم عليك الناس ، ضحك وهبط وشافها هي زادا تحل الباب وتهز الصاك وتهرب ،اما من زهرها جات عندو لانو قرى مخها وعرفها باش تعمل اكاكا ، دزتو بغل " يا مريض ...سيبني ..ياخا بالقوة "
ايلي زاد شعل نارها هو انو يضحك وعامل جو ، هزها بين هواء وفضاء و حطها على كتفو تقول هاز علوش ، ماسلمتش قعدت تضرب فيه على ظهرو و تسب تحبو يهبطها ،اما هو كابس على ساقيها ومخليها موش منجمة تتملص منو ، قعد هازها اكاكا وهو يمشي نرمال ع الاخير ويلي يراه يقعد باهت فيه ، الناس الكل في لوتيل مصدومة وهوما يشوفو فيها تتخبط وتصيح ، وقت وصل للسويت متاعو هبطها" استخيلتك اخف من هكا "
ضربتو على صدرو بقوة " ياحيوان والله مانباسيك "
قهقه وهو يقعد ع الكاناباي ويشعل سيڨارو ، جرات للباب تحل فيه لقاتو مسكر ، رجعتلو " حل الباب خيرلك...تحرك حلي الباب ...تعرف شنوة ايلي عملتو انت ...راك باش تتباسى ...." نفخ الدخان بطريقة زادت طلعتلها الدم صاحت باعلى صوتها " ياخا شكونك يا هم ...شبيك تتصرف معايا هكا...والله مانشكي بيك وندكك في الحبس "
هز حاجبو وهو يثبت فيها ويتبسم ، زاد دخلها بعضها ، كيف لقات دمو بارد وموش باش ينفع معاه لا صياح ولا تهديد ...رجعت للباب وبدات تدق فيه وتعيط للسرفورية ولاي حد متعدي فماش ما يعاونها
❇✴✴✴✴✴✴
مد يدو للراجل ايلي كان معاه لداخل في قاعة الاجتماعات وسلم عليه وهو يتبسم ، ماصدق لربي كملت ها الرينيون ، طول جبد تاليفونو و قبل ماينزل يطلبها شاف ريما جاية ناحيتو ، كز سنونو بغلبة ،شنوة نحيبها هاذي ، تبسمت وهي تقرب منو " قعدتو بارشا لداخل "
حاولت تجبدلو انتباهو وقت راتو رجع لتاليفونو " باش تكلم تولين موش هكا "
نفخ " وانت علاش تسأل وزيد لواه ماروحتش لتوا ...نرمالمون انتوما العارضات راكم في دياركم توا "
"لانو ....سخفت عليك وجيت باش نفيقك "
عقد حواجبو " شنوة اللعبة ايلي تحضر فيها زعمة "
"لعبة !؟...اما لعبة ...يا أحمد....انا بطلت لعب ملي كبرت ..." تبسمت وهي تجبد تاليفونها وتوريه تصاور " شوف مثلا. ..هاالتصويرات. ..ثبت زادا في الدات ...هوكا الكاميرا مخلية الوقت بالدقيقة ....امممم....الخمسة وعشرة دقايق ....موش هاكي تولين ...وشكون الراجل ايلي معاها ....خوها !؟....لا ...حسب ماسألت ...ماعندو حتى صلة قرابة بيها ...باهي ...شوف التصويرة هاذي ...الوقت قداش ....الستة وسبعة ...ساعة ونص بعد التصويرة الاولى ...وتيل وتولين والراجل هذا ....شنوة ماكش مصدقني ..." رجعت تاليفونها لجيبها " تنجم تطلبها و تسألها تو تقلك هي وين ...اه....اذا هي صريحة معاك ....اي ...ماتستغربش علاش انا في يديا التصاور هاذم....الاوتيل متاع بابا وانا عندي فيه بارشا حبيبات كيف يراو حاجة غريبة يوصلوهالي ...اما ملا صدفة ...شوف ...جات تولين في ااحكاية ...اه...حويجة اخرى ...الراجل سألت عليه كيما قتلك...ظهر رجل اعمال دوبل ناسيوناليتي ...تونسي فرنساوي ...و عندو اسم برفان ماركا عالمية ...مانعرفش عاد...اذ ايلي بينو وبين ...صاحبتك ...خدمة ...والا حاجة اخرى "
"انت وحدة...مريضة ومعادش فيك حل ...تولين ومهما عملت انا عندي الثقة فيها "
شاورتلو بيدها " بيبااااي ..."
دارت راجعة منين جات متأكدة انها شعلت نار كبيرة فيه ....مستحيل بعد التصاور هاكم مايدخلش قلبو الشك ...اول ما بعدت ومعادش منجم يشوفها رجع لتاليفونو وطلبها ...يشوف ردها شنية ...مالازموش يتسرع ويحكم طول .