Amiss Prayer (Zawgyi&Unicode) [Completed]

Part-33(နွေးထွေးမှု)

For Unicode
နွေးထွေးမှု

ဆေးရုံ၏အနံ့နှင့် မွန်းကျပ်မှုတို့မှ လွန်မြောက်ပြီးနောက် မြတ်သူသည် အိမ်ကြီးရှိ အချစ်ဇာတ်လမ်း မွန်းကျပ်မှုတို့ထံ ပြန်သွားရဦးမည်။

မွန်းကျပ်မှုများအကြား နေသားကျနေသည့်ကျွန်တော်သည် အိမ်ကြီးထံသို့ ပြန်ချင်လှပါသည်။ စိုင်းထွဋ်ခေါင်ကို လွမ်းလှပါသည်။ အတိတ်နေ့ရက်များမှ နာကျင်မှုများကို လျစ်လျူရှု၍သာ..။

ထိုသို့ လျစ်လျူရှုရန် မည်မျှကြိုးစားခဲ့ရသည် ဟုထင်သနည်း။ ‌မိမိနှင့် ဘ၀ချင်းမတူသူအား ချစ်မိခဲ့ခြင်းသည် မည်မျှခက်ခဲသည်ဟု ထင်သနည်း။

ခက်ခဲသည်။ သိပ်ခက်ခဲသည်။ ဆုံးဖြတ်ချက်တို့မခိုင်မာခင်က သိပ်နာကျင်ရသည်။ မေ့ရန်ကြိုးစားဖူးသည်။ ရှေ့ဆက်မတိုးရန် နှလုံးသားတို့ကို ပိတ်ပင်ခဲ့ဖူးသည်။ သို့သော်.. မရာမထင်။ မေ့ဖျောက်ရန်ကြိုးစားတိုင်းတွင် နာကျင်နေသည့် နှလုံးသားကြောင့် အခက်တွေ့ရလေသည်။ ပင်ပန်းရပါသည်။

ပင်ပန်းမှုကို ကျွန်တော်မုန်းသည်။ ထို့ကြောင့်သာ ကျွန်တော်သည် သူ့ကိုမေ့ဖျောက်ရန်မကြိုးစားတော့ပေ။ တစ်သက်တာလုံး ဦးနှောက်၏စေခိုင်းမှုများအကြား ပုံစံခွက်ထဲ၌ နေဖူးပြီးပါပြီ။ တစ်ကြိမ်တစ်ခါမျှ နှလုံးသား၏အလိုဆန္ဒကို လိုက်လျောသင့်သည်ဟုထင်ပါသည်။ တစ်ခါလောက် မိုက်ရူးရဲဆန်ကြည့်ဦးမည်။ ထို့ကြောင့်သာ ကျွန်တော်ခင်ဗျားကို ဆက်ချစ်ရန် ဆုံးဖြတ်လိုက်သည်။

ကျွန်တော့်ဆုံးဖြတ်ချက်တွေကို မမှားကြောင်း သက်သေပြပေးမယ်မဟုတ်လား သခင်လေးစိုင်းထွဋ်ခေါင်...။

မိမိသည်သူ့အား တွေ့ချင်လှပါသည်။ သူသည်က မိမိကိုတွေ့ချင်ပါ့မည်‌လော။ သူ.. မတွေ့ချင်သည်ဖြစ်လင့်ကစား မိမိသည် တွေ့အောင်ရှာမိမည်။ သူ့ထံမှ ဖြေရှင်းချက်တချို့ ကြားချင်သေးသည်။ အတိတ်ဘ၀မှ မပွင့်လင်းမှုကြောင့် မကြားခဲ့ရသည့် သူမိမိကို မည်မျှချစ်ကြောင်းကို စာဖွဲ့ခိုင်းဦးမည်။