💕أنت قلبي٢💕

الحلقة ٤٧

#انت_قلبي٢
#بوسي_مصطفى
_______________
الحلقة ٤٧

ندى : يلا واقفه عندك ليه؟؟
فريدة : طيب جايه امسكي بس جميلة
العبايه دي طويلة اوي مش عارفه امشي بيها.
ندى : علشان خسيتي الهدوم بقيت واسعه وكبيرة..
فريدة : يا سلام !!
ندى : ايوه مش مصدقاني ولا ايه؟
فريدة : مش لدرجة اني ادوس على هدومي وانا ماشيه
يا ندى.
ندى : هتخبطي ولا اخبط انا؟
فريدة : هتفرق ايه يعني؟؟
خبطي يا ندى.
سميرة تفتح الباب..
ندى ببتسامة : ازيك يا طنط؟
سميرة : الحمد لله
تسلمي يا ندى.
ونظرت ل فريدة : ادخلي
يا حبيبتي.
فريدة : ازيك يا طنط ألف سلامة على حضرتك.
سميرة : الحمد لله..
تعالي يا جميلة ل تيته.
اقعدوا استريحوا.
ندى : دي جميلة كانت عماله تعيط فوق..
عرفت بس إننا نازلين ل تيته
قعدت تهلل
مش كده يا فريدة؟
وتغمز ندى ل فريدة : اه حصل.
سميرة : هاتي العصير اللي على الرخامه جوه
في المطبخ يا ندى
ندى : حاضر.
سميرة : لسه كنت بعمل المانجا..
قولت لو حد من العيال ينزل
هياخد كوباية.. اهو من نصيبكم.
ندى : لسه المانجا طالعه.. بس كل اللي شوفته
اخضر لسه مستوتش.
سميرة : لا دا علاء اللي جايبها كلها مستويه
وطعمها زي العسل.
ندى : اشربي يا فريدة.
سميرة : عامله نفسها ضيفه بقى.
فريدة : لا ابدا بس حضرتك عارفه إني عندي
حساسيه من المانجا.
ندى : هو في احلى من المانجا.
سيبي كوبايتك هشربها ل جميلة.
سميرة : رجعتي شقتك؟؟
فريدة : ايوه رجعت وبعدين انا مكونتش سيبتها
يعني علشان ارجعها.
سميرة : متعرفيش تردي على قد السؤال؟!
فريدة : حاضر يا طنط.
سميرة : بنتك خاسه ابقى شبعيها.
فريدة : معتمدة على الرضاعه وبفكر افطمها بقى
علشان تاكل.
سميرة : حجة البليد مسح السبورة..
مش لو كنتي بتشبعيها الأول
انتي لا عايزة ترضعيها ولا بتسايسي البنت علشان تاكل
كل حاجه عندك عافيه كده.
فريدة : معلش ياطنط هطلع اروق الشقة بعد اذنك.
خلي جميلة معاكي يا ندى
وابقى هاتيها وانتي طالعه.
ندى : حاضر.
سميرة : ياريت تتعلمي الذوق
وازاي تحترمي اللي أكبر منك.
فريدة : الكلام دا ليه انا؟!
سميرة : امال تسمى ايه
اللي انتي بتعمليه دا
اكون بكلمك تقومي تمشي!!
فريدة ' حضرتك يا طنط عايزة تتخانقي معايا صح؟؟
سميرة : هتخانق معاكي ليه
يا مرات كريم.
انتي لو عارفه قيمة الراجل اللي متجوزاه مكونتيش
كلمتي مامته
بالاسلوب دا.
ندى : يا طنط فريدة مقالتش حاجه.
كل الحكاية إن الشقة عندها عايزة تتروق بس احنا
نزلنا نطمن على حضرتك الأول.
سميرة : لا كتر خيرها
عملت الواجب وزيادة.
فريدة : طب بعد اذنكم بقى.
وفتحت فريدة باب الشقة وخرجت.
سميرة : شايفه بنت عمك؟؟!
ندى سكتت ومردتش.
________

في محلات نادين...
هدى : لا مكونتيش تكلميها
عارفه ممكن تعند اكتر
بس اللي مخليني مطمنه
إن بابا مبيفكرش ابدا في الموضوع ده.
فيروز : انا مكونتش هتكلم هو الكلام بس جاب بعضه.
هدى ببتسامة : شوفي القمر اللي هل علينا ده.
فيروز ببتسامة وهي ناظره خارج المحل تلمح مليكه
وهي نازله من العربية.
خرجت فيروز تستقبل مليكة.
مليكة : الحمد لله.
ازيك يا روزه.
فيروز : تمام..
الحمد لله.
تعالي يا مليكة جوه..
تدخل مليكة تسلم على هدى وتقعد وتطلبلها حاجه تشربها.
في التليفون.. 📞
ياسمين : انتي يا بنتي مش قولتي جايه.. ايه كل دا في الطريق؟؟
مليكة : ما انا جيت فعلاً
بس قولت اعدي على طنط هدى اسلم عليها لاقيت طنط فيروز كمان جوه قعدت معاهم..
ياسمين : يعني هتفضلي عندك ولا ايه؟؟
مليكة : شوية كده يا ياسمين.
ياسمين : خلاص براحتك.
مليكة : ايه يا بنتي مالك؟؟
ياسمين : معرفش صاحيه مخنوقه ومش طايقه
نفسي يا مليكة.
مليكة ' ليه بس ايه اللي حصل؟؟
ياسمين : حوار كده هبقي اقولك لما تيجي
متتأخريش بقى.
مليكة : حاضر سلام.
ياسمين : مع السلامة.