💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

🌹الحلقة15 :القســ3ـم 🌹

الحلقة الخامسة عشر ..القسم 3

⭐⭐🎶⭐⭐
كمشت صوابعها على الروب ايلي لابسة وهي تستنى في زينب تبدا حديثها ...اختارت تشوفها في دارها موش في الخدمة...قالت لجناة تحضرلهم قهوة  واتركزت بيها  في الجنينة باش مايراها حد ..معقول باش يحكو على ديفيلاي  فم ؟!..ماتتصورش...اكيد فمة موضوع اخر ...دق قلبها بخوف وقت تخيلت السبب ...باز احمد... هي اكيد سمعت بايلي بيناتهم وجاية توا تثبت منها ...لتزمها تكون قوية .
تكلمت زينب اخيرا بعد ما ترشفت من قهوتها شوي "تولين "
تبسمت بصفورية "نعم ...مدام "
تنهدت وهي تحط ساق على ساق " نحبك تسمعني للاخير ...وماتقصش عليا "
رمشت شوافرها متوترة "با....هي"
محمحت قبل ماتبدا ومن بعد خزرتلها بكل ثيقة " انا نعرف انو انت واحمد مع بعضكم ..."
جات باش تتكلم وتوضح لكن زينب شاورتلها بيدها باش تسكت وكملت " وقتا ش  والا كيفاش صار هذا مانعرفش ...لكن ايلي يهمني هو ولدي...احمد ...ايلي ماعنديش مااغلى منو ...ها الشهور وانت بيناتنا اكيد رتك عرفت شنوما يعنولي ولادي ...وشنوة تعنيلي خدمتي ..وسمعتي ...انو عارضة صغيرة بلا خبرة تكون سبب في انو ماركة ناز تطيح قيمتها ...فهذت شي مايتقبلش ومالازموش يصير ...ممكن تكون نزوة من ولدي ...ممكن غلطة ...وممكن ...اول مرة يتعلق بمرا فاكيد موش عارف وين ماشية بيه السفينة ...وانا كأمو من واجبي ..نفيقو وانبهو ونستحفظ عليه.... احمد عندو خطيبتو ...ريما ...بنت شريكنا ...وفرد مستوى معانا ...انا وقفت بجنبك وخيرتك عليها في الخدمة ...لكن مستحيل نخيرلك علينا في حياة ولدي ...سامحني ...اما هذا الواقع... قصص الحب كان في الكتب ...انت بنية خدامة ...وعندك عزيمة باش توصل ليلي تحب ...لكن رد بالك تستغل ولدي باش تطلع وتتشهر ...انا مستحيل نخليك تستغلو ...هاكي علاه جبت ليوم ...انت لازم تبعد عليه ...حتى لو هو مايحبش ...ايلي قعد بينك وبين ناز هو شهرين خدمة ...فقط شهرين ويوفى الكنترا متاعك ...تنجم بعدها تمشي وين تحب ...وتصحح مع اي شركة ...لانو ...انا مانيش باش نجددلك الكونترا ..والسبب هو احمد...اكيد مستغربة انو زينب المرا الحنينة والكلاس تحكي كيف اي مرا تقليدية ...اما انا ام ...ومن حقي نحمي عايلتي واولادي "
عينيها معبية بالدموع ...تسمع في كلامها والسكاكن تضرب فيها من الشيرات الكل ...حروفها هابطين حنضل مانجمتش تعديه ولا تقبلو...كملت زينب خطابها من غير ما تتأثر "الليلة.... لازم تخرج من دارو ...مانحبش فضايح جرتك ...انت لازم تقصها معاه ...وتخلي حياتو كيف ماكانت...تخليه يرجع لعايلتو وخطيبتو ...ويرجع لخدمتو وعقلو مريڨل .. لا انا ولا بوه ...نقبلو بمرا اخرى غير ريما  ...بمعنى ماناش باش نوافقو عليك ...ومستحيل نوافقو عليك ...تحب السبب نقلك بوضوح ...لانك موش من طبقتنا ...لانك...مجرد غارضة نجحت ببدنها ...لانك جيت بعد ريما ...موش قبلها ...لانك ماكش باش تكون في مصلحة ولدي "
بلعت ريقها وهي تبلل في شفايفها الشايحين ...بدنها بكلو يرعش ...قلبها تقسم نصين ومارضاش يعاود يتلحم...حلت فيها جروح  ماتتصورش كان نهار يبرو ...مدت يدها لصاكها ع الطاولة وهزتو ...عقدت زينب حواجبها موش فاهمة شنوة باش تعمل ...راتها تهزو و تدور على جنبها باش تخرج "تولين "
وقفت وهي عاطيتها بالظهر ...دموعها ماكفتش  وساقيها بالسيف ما هازتها "ماتخافش مدام زينب ...ولدك ...تو نبعد عليه "
تنهدت براحة ...كانت متأكدة انها باش تختار الشهرة وخدمتها على انها تكون عدوتها جراير احمد ...ماهيش نادمة علي عملتو حتى وكان احمد باش يتعب ...لكن مصيرو ينساها ...الدنيا ماتاقف على حد ...تبعتها وهي تخرج لين غابت عليها ...تنفسحت براحة وقامت من بلاصتها باش ترجع لداخل لكن تصدمت وقت لقات ناظم قدامها ...باهت فيها وموش منجم يصدق انو ايلي كان يتكلم امو "امي !!...شنوة ايلي عملتو !"
غمضت عينيها وهي تحرك في شعرها بغل "ايلي كان لازم نعملو ..." هزت حاجب بحاجب"هاو نقلك وانبه عليك ...رد بالك تحكي حاحة لاحمد فهمتني...والا تعرف انو نورس في لحظة تلقاها عرست بولد عمها"
بلع ريقو "امي ...اذا احمد سمع ....مستحيل يسامحك "
تنهدت "شكون باش يقلو اذا موش انت ...ناظم....لازم يبعد عليها ...في مصلحتو ...ومصلحتنا الكل... بما فيها انت ونورس"
خلاتو واقف ودخلت ....اما هو فقعد متمسر في بلاصتو تقول صمبة ...معقول ايلي عملتو....بعمرها ماكانت بالمستوى هاكي...تخيلها مرا تقبل لي اختلاف و ماتدخلش في حياة اولادها ...لكن هي وبكل قسوة طلبت من المرا  ايلي يحبها خوه انها تبعد عليه.... شنوة لازمو يعمل ...كيفاش يتصرف ....
⭐🎶⭐