#حرب_المشاعر🥀🥀🥀🥀
الحلقة 19:
عند نور ..
بعدما خذات فؤاد للحضانة رجعت للدار
غير دخلت من باب الجنينة ..لمحت واحد قاعد على الكرسي عاطيها بظهرو ...قربت منو تمشي بخطوات مترددة ..كأنو عارفة شكون هو ...كيفاه متعرفوش و هي فواحد الوقت كان حافظاتو حفظ ...طريقة لبسو ..اكلو المفضل ...لون لي يحب كلش عليه ...كيفاه يرقد ...واش يكره ...حتى كي كان يحب عفراء ولا نقولو يعشق فعفراء و تراب لي تمشي عليه .. الوحيدة لي كانت تعرف بحبو ليه بلا ما يبوح بيه... كانت تشوف اللمعة فعيونو كي يجيبو سيرتها ولا كي تكون حاضرة حتى فهاد اللحظة مزال تلمح هاديك اللمعة كي يجبدو سيرتها حتى و هي ميتة ...نزلت دمعة سخونة تحرق على خدها و هي تتذكر فختها ...كي ماتت مات كلش معاها ...كانت راضية و هي تشوف فعيون ليام الحب و العشق لي يكنو لختها ...أما أنو يستغلها و يستغفلها لمصالحو الخاصة قهرتها و وجعتها ...مثل عليها الحب و أنو حاب يبدا معاها من جديد أما هو استعملها وسيلة لمصالحو منها أنو يكون قريب من لؤي ...
وصلت لعندو و نطقت بسيف ...غالبتها خنقة البكا ...مسحت الدمعة لي طاحت و قابلاتو بوجه جامد خالي من أي تعبير
نور : علاش جيت و واش تحب ؟؟ احكي بلا لف و لا دوران ..
دور وجهو على صوتها
ضحك و ناض من بلاصتو كي شافها
ليام : أهلا نور ..مليح الله يسلمك
ترسمت علامات الزعاف على وجهها بلا ما تنطق
و طلعت حاجبها
ليام : أحم اوكي مراحش نكذب عليك و نقولك توحشتك و ندمت و بلا بلا بلا ...أما حاب نشوف ولدي
نور بعياط : ولدك ...؟؟؟ ولدك لي مهتميتش بوجودو من عدمو و دوك جاي تحوس عليه بأي صفة هاا ..قربت منو و طلعت يديها تضرب فيه على صدرو
بأي وجه قول ..متحشمش على روحك ...معندكش إحساس ...بعدت منو تحكي بعصبية ...اما متخافش نجوم السما أقربلك و لا تشوف فؤاد و لا تلمحو حتى ...زيد هو يعرف أنو نتا ميت ...فهمممممت ميت ...نتا ما تسوى والو عندو و دوك طير من قدامي أحسنلك
قلب عينو بفدة و نطق
كملتي ؟؟ مراحش نسيف عليك حاجة ..مع أنو نقدر نبدا الإجراءات القانونية و ندي وليدي منك تعرفي عندي معارف كبار بجلسة وحدة نديه ...اما مراحش ندير هك ..وحدك وحدك راح ترجعيلي يا نور ...كمل كلامو و دار رايح
على تلفيتتو جاه بوكس على وجهو خلاه يفقد توازنو لأنو مكانش جاهز ليه
شهقت نور كي شافت آدم ضرب ليام
رفع راسو حسبتلو راح يلقا أنس فوجهو أما ظهر آدم
ضحك على جنب و ناض ينفض روحو و فنفس الوقت يمسح الدم من شفتو المجروحة
نطقت نور بخوف وهي خايفة إذا تشابكو مع بعض وحدها مراحش تقدر تمنعهم و راح يخرجو يا قاتل يا مقتول
قعدو يتخازرو وقت مليح بين بعضاهم
ليام حسبتلو البوكس جزء من التمثيلية اما آدم فضربو تاع صح ...قرب منو و نور زربت وقفت بيناتهم
آدم خطيك متوسخش يديك بيه ميستاهلش
بعدها على جنب و حضنها بيد و رفع يدو لوخرى يهدد فليام
آخر مرة إذا لقيتك قريب منها مانخليش عظم صحيح فيك و نمسح بيك اللرض اشفى على كلامي
غمزو ليام بطرف عينو و نطق ...نشوفو
قال كلمتو و راح
نور دارت لعندو و حطت يدها على خدو
مهما درت منوفيكش حقك مرسي على وقوفك جنبي ...آدم إكتفى ببسمة خفيفة على وجهو ومسح على خدها حتى هو وحضنها ...راح نكون جنبك دايمن..
أنت تقرأ
حرب المشاعر {من تأليفي Macilia Ch}
Casualeهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
