#من_حقي_نعيش

الجزء الثامن

#من_حقي_نعيش

لي #ابتسام_حمزة_المصراتي

الحلقة الثامنة و الاخيرة (8)

بعد ايام احمد بدي يحس برجليه بعدما كان ميحسش بيهم نهائي فرحوا العيلة لان هذا مؤشر كويس ليه و في امل في علاجه وممكن حتي يرجع يمشي من جديد ..

بوه مأيسش من علاجه قعد يدور بيه من دكتور لدكتور ومافيش دكتور عطاه نسبة كبيرة في نجاح العملية ف قرر يديرله تقرير ويطلعه بيه البرا ..

جري عالتقرير وكمله بعته بالفاكس والدكاترة برا شافوه و اعطوه امل كبير انه يرجع يمشي من جديد .. حصل الموافقة عليه بمعرفة ناس صحابه وتحدد يوم بعد اسبوعين يكون موعد سفر احمد وبوه للعلاج ..

في يوم عشية احمد يهدرز علي امه قلها :-
يمه نبيك تمشي تعطي كلمة في مريم قبل ما نمشي نسافر .. اني مرات نعطل برا ومنبيش نمشي من غير ما نخطبها واضيع من بين يديا البنت .. نبي نخطبها قبل ما نمشي ..

ام احمد وافقت وقتله :- تمام حاضر يا وليدي اعطيني رقم ام مريم نتصل بيها و نحدد موعد ونمشي اني وخواتك ..

أحمد اتصل بمريم ونسق هو واياها وعطاته رقم امها باش يعطيه لأمه ..

ام احمد اتصلت باهل مريم وطلبت تزورهم وتتعرف علي مريم وعيلتها ..
اهل مريم حددوا يوم وكان يوم خميس ..

وفي يوم الخميس مريم فرحانة وتخطط هي خواتها كيف حيكون التقديم وشن حتلبس مريم .. قعدوا يجهزوا في كل شي ..

جهزت مريم نفسها لبست قفطان حلو وخلت شعرها مفتوح .. وتعطرت وفرحانة بتطير من الفرحة بأم احمد وخواته .. وبالذات مودة لان احمد يحكيلها علاها ..

وفي حوش احمد تجهيزات و أجواء حلوة ام احمد بعتت راجلها يجيب سفرة بكلاوة و باكو شكلاطة يرفعوه معاهم لما ماشيين يشوفوا مريم .. ام احمد تسال في بناتها شن تلبس وخوات احمد يجهزو في روحهم فرحانين بيديروا كنة ..

احمد متوتر يطل علي خواته يناشب فيهم وفرحان ويقول لمودة بصوت واطي باش مايسمعه حد .. اسمعي سلميلي علاها باهي راك تنسي ..!! وصوري انتي واياها نبي نشوف شن لابسة وكل مرة يقول حاجة من فرحته...

فجأة يسمعوا في كلاكص بيب بيب .. بو احمد جي بيرفعهم.. طلعوا وتوكلوا علي الله ..

وصلوا واستقبلتهم ام مريم واختها رحبوا بيهم ودخلوهم لصالون.. وضيفوهم وداروا الواجب معاهم ..

ام احمد سألت علي مريم وام مريم بعتت اخت مريم تناديها .. و شوية وخشت مريم بكروستها..

مريم اول ما شافتها ام احمد انعجبت بيها هلبا وقعدت تبوس فيها وتقولها وهي تضحك سلم بنتي .. عنده الحق ولدي احمد هذا وين فهمت .. ماشاء الله عليك زي الغزالة ..