عودة الماضي

ازاي نقدر نتجاوز الماضي ونعيش في المستقبل بكل أريحية لو الماضي مش راضي يخلينا نتجاوزه ونعديه، لو الماضي مش راضي يخلص ازاي هيكون في حاضر ومستقبل!!
انا طالب عادي اسمي عز عبد السلام مقدرش اقول ان حياتي عاديه زيي او حتى ان انا هفضل شخص عادي زي ما كنت في طفولتي! يا ترى لو كنت مكاني هتعمل ايه.. انك في يوم وليله تصحي بمعلومات انت مكنتش تعرف عنها اي حاجه والمعلومات دي ممكن تخليك تكره حياتك يا ترى هتحاول تعرف اكتر عشان تقدر بالمعلومات اللي عندك دي تنقذ نفسك ولا هتتغاضي عن الامر وتقول دي مجرد حكاوي وتخاريف!؟
انا طالب في كليه حقوق صراحه الكليه مش كانت هدفي لكن لما دخلتها حبيتها جدا ولقيت فيها ناس كويسين جدا ان كان من صحابي او من الدكاتره يعني تقدروا تقولوا إني مبسوط.. قبل ما احكي لكم قصتي وحياتي لازم تعرفوا انا مين وليه عايز اتكلم عن نفسي! طبعا الماضي لما بيخلص، بيخلص بكل مشاكله أو أفراحه وأحزانه كل ده بيتنسى بعد فتره لكن هتعمل ايه لما تلاقي إن الماضي بتاعك او ماضي عيلتك هو اللي مش راضي ينساك! هو اللي عايز يجيلك وبيطاردك!! هتعمل ايه لما تعرف إن عقدتك في الحياه وإن مشكلتك الوحيدة في الحياة إنك إتولدت في عيله ماضيها مكانش ابيض!!
هتقولي ازاي يعني مكانش أبيض!؟ ايه يعني عيلتك تجار مخدرات او مثلا فيهم ناس قتالين!! بالعكس أنا عيلتي كانت من أحسن العائلات في قريتي كانت عيلة مشهود لها بالخير والكرم والعطاء وجدي الكبير عبد الرحمن قبل ما يتجوز كمان كان شغال في علاج المس بالقران! طب ازاي! ازاي نقدر نقول على العيله دي إنها وحشه! طبعا دوام الحال من المحال طبعا، لاكن عيلتي في يوم وليله أو نقدر نقول بين ايام انقلب حالها تماما وبقيت من عيله مشهود لها بالخير وعائله محبوبه بين كل الناس الى عيله مكروهة ومنفور منها من الجميع!!
جدي الكبير عبد الرحمن والد جدي محمد وهو عنده 22 سنه يعتبر السبب الرئيسي في قلب كيان العيلة وطبعا مش لوحده!! هو بدأ علاج بالقرآن من وهو عنده تقريبا 17 سنه على يد أحد المشايخ ولأنه شاف إن الموضوع يستاهل تعبه فعلا وسهره بالليالي من الرعب بسبب الحاجات اللي بيشوفها والأصوات اللي بيسمعها دايما كانت بتأثر عليه بالسلب!! كل ده مقابل ابتسامه وشكر من ناس مظلومين او ناس عيانه لكن بيخفوا بإذن الله وبمساعدة الشيخ عبد الرحمن وشيخه عبد المحسن؛
الشيخ عبد المحسن كان عنده حوالي 45 سنه وتوفي لما جدي عبد الرحمن وصل 21 سنه، وترك عبد الرحمن عشان يخوض التجربه ويكمل مسيرته في العلاج من الجن لوحده الشيخ!
...
صحيت من النوم في يوم كان عندي فيه دراسه لكني كنت تعبان شويه ومقدرتش أروح، وأهلي كلهم كانوا خرجوا ومن هنا بدأت حكايتي! لسه قاعد ع السرير وفجأة سمعت صوت غريب تحت السرير! كان زي صوت كلاب بيتخانقوا تحت سريري!! بصيت تحت السرير بسرعة لكن ملقتش حاجه وقفت وبصيت تاني عند الباب لقيت ديل أسود شبه ديل الكلب خارج من الاوضة!! أنا عارف إن والدتي وأختي الصغيرة نسمة بيخافوا جدا من الحيوانات الأليفة زي القطط والكلاب ودائما بيتأكدوا إن شبابيك وأبواب البيت كلها متقفلة قبل ما يخرجوا عشان مفيش حاجه تدخل!
أنا فاكر موقف من زمان حصل وانا عندي 14 سنه وكن في أوضتي، وأختي نسمة كان عندها بس 6 سنين، ووالدتي كانت في المطبخ فجأة سمعت صويت جاي من أوضة أختي وجريت! لقيت قطه سوداء واقفه على سرير أختي في نهايته واختي قاعدة في أول السرير و عماله تصوت وكانت متخشبة مش قادرة تتحرك وكأنها ميته من الرعب!! والدتي كمان واقفه بره الاوضه مش قادره حتى تدخل! هي كمان خايفة تدخل وعماله تقول خرجوها خرجوها!! كنت مستغرب جدا إزاي خايفين من قطة بالشكل دا وافترضت إنها عشان سودا وفعلا كانت مخيفة بعنيها الواحدة دي والتانية مقفولة!! والدي بسرعة جري على القطة وحاول يمشيها وقامت هربت ونطت من الشباك.. كان في فتحة صغيرة لكن ده غريب لاننا متعودين نقفل الشبابيك كلها قبل ما ننام ومحدش قال إنه فتح الشباك بلليل حتي أختي قالت إنها نايمة وهو مقفول! انا فهمت بكدا إن اختي وامي عندهم الخوف الرهيب ده من القطط وبرده في موقف ثاني مع كلب أختي وهي راجعة من المدرسة وهي عندها 8 سنين مع والدتي، شافوا كلب أسود قدام البيت مجرد ما شافهم فضل يهوهو عليهم كتير وكان وقتها هيموتوا من الرعب! بس انا كنت بلعب مع اصحابي برا البيت وشوفتهم فبسرعة جريت عليهم لما شفتهم ورميت على الكلب ده طوبة.. الكلب وقتها بصلي بطريقه غريبه مكنتش بصة حيوان عادي إترمي عليه طوبة والمفروض يجري وعينيه كانت بتطق شرار غريب وكانه بيقول لي هرجعلك!! منكرش إني وقتها كنت ميت من الرعب بسبب الكلب ده وفضلت فتره فعلا حوالي سنه او سنتين خايف من كل الكلاب!
لكن ولإن صاحبي كان عنده كلب كنت بزوره كتير في بعد فتره مبقاش عندي الخوف من الكلاب ومعنديش الخوف من القطط خالص؛
ذكريات جت ع بالي وأنا بدور ع الكلب ال شوفت ديله وال فجاة اتبخر!! أنا مشفتش الكلب فعلا لكن انا عارف و متأكد إن ده كان ديل كلب وكمان الصوت ال سمعته ف الأوضة! دورت كثير في أماكن كثيرة من البيت فجأة سمعت صوت غريب في الحمام وكان همس! دي مش هوهوة ولا نونوة قطه ده همس بينادي بإسمي بصوت تخين ومرعب جدا لكن الصوت كان واطي!! الباب كان في الاول متوارب أخذت بالي من ديل لكن ده مش دي الكلب دا ديل قطة لكن بنفس اللون الاسود اللي انا شفته خارج من الاوضة!! بحاول أفتح الباب بهدوء وفجأة الديل أتحرك لقدام وفتحت الباب بسرعة ملقتش حاجه في الحمام والصوت كمان اختفى وشباك الحمام مقفول!
رجعت أوضتي بسرعة وانا خايف..
انا متاكد من اللي شفته لكن ازاي.. ازاي الكائن ده ايًا كان قط أو كلب اختفي بكل بساطة ومنين خرج!!؟ وانا راجع على الاوضه الاثاث مكنش في مكانه الصحيح! شكل الاثاث وأماكنها كمان اتغيرت بمجرد وصولي للحمام ورجوعي للأوضه!! ده غير إن كان في بعض الأثاث مرتفع عن الارض زي كرسي فأوضه والدي ووالدتي، لكن كنت خايف أدخل الأوضة وأفهم ازاي دا بيحصله!!
وكمان المروحة ال اشتغلت لوحدها وكان هواها سخن جدا وحركتها في إتجاه حركتي بالظبط ولو وقفت تقف معايا!!