ماضي لا ينتهي

الحلقة ٦٦

#ماضي_لا_ينتهي
#بوسي_مصطفى
_______________
الحلقة ٦٦

في شقة والد ناريمان.
انجي : يا شيخه في داهيه الحب
اللي يذل البني آدم بالشكل دا.
انتي كنتي عايزاه يقولك ايه
يا نيمو؟؟
يلا نروح نكتب الكتاب ونتجوز؟!
ولا يقولك تعالي نضرب ورقتين عرفي
علشان مراتي متعرفش
إني هتجوز عليها ..
ولا يتسلى بيكي ويقولك بحبك
ونتقابل وكلام من دا.
واحد و جه معاكي دوغري
مخدعكيش..
انتي اللي خدعتني نفسك.
واتوهمتي إنه بيحبك و دا مش حقيقي.
ناريمان : خلاص خلصتي كلامك
خرجتي كل اللي جواكي.
دبحتيني و انا محتاجه اللي يطبطب عليه ويواسيني
في اللي انا فيه دا.
انجي : ايه اللي انتي فيه مش فاهمه؟؟!
يا بنتي فوقي لنفسك بقى.
انتي اللي بتضحكي على نفسك.
مازن مش خايف من مراته زي
ما انتي فاهمه.
مازن محبكيش يا نيمو..
ولازم تفوقي بقى.
ناريمان : بس انا حبيته.
انجي : طب وبعدين آخرة الحب دا ايه؟؟!
اعقلي بقى وشوفي نفسك
وانسى مازن.
و الصح اللي تعمليه دلوقت تستقيلي اقولك
انتي متعتبيش الشركة دي تاني..
وتعالى اشتغلي في الشركة اللي انا شغاله فيها..
مرتب كويس.. وشغل مريح
وكمان الشغل فيه سفر كتير وانتي بتحبي الجو ده.
واحفظي كرامتك بقى علشان خاطري.
أنا عمري ما شوفتك ضعيفه بالشكل
دا غير إن من وقت
ما شوفتي مازن ورجلك دخلت الشركة دي
وحالك بقى غير الحال خالص.
انسي يا نيمو.. انسي يا حبيبتي.
ناريمان : بتقولي كده علشان مجربتيش الحب .
انجي : ومش عايزة اجربه لو بالشكل دا..
أنا يا حبيبتي مش ناقصه وجع قلب.
ناريمان : اخرجي يا انجي وسبيني لوحدي.
انجي : انا فعلا
نازله الشغل.. سلام.
________________

في شقة حنان..
حنان : وهي هتقولك الكلام دا ليه يا ميار؟
ميار : يا طنط انا في حالي حضرتك عارفه.
رانيا هي اللي من وقت ما جيت قعدت مع حضرتك هنا وبقيت لوحدها في شقتها وهي مش طايقاني.
وخصوصاً اليومين دول من وقت ما قعدت في الشقة فوق
وهي عماله ترمي عليه ب كلام زي السم كأني
هخطف جوزها.
وتقولي اتلمي وابعدي عننا وكلام من دا.
وانا معملتش أي حاجه.
حنان : مش هنخلص من وجع الدماغ ده.
ميار : ليه وليه بقولها وهي نازله من شقتها..
في هدوم ل البشمهندس يعني
وقت ما كنا متجوزين..
بقولها خديهم اغسليهم ويلبسهم.
ردت عليه بكلام ب أسلوب مش كويس
وانا مكانش قصدي حاجه..
دا انا حتى قولتلها علشان يعني انا مينفعش اغسلهم
وانشرهم عندي.. الجيران تتكلم.
حنان : لا كنتي قولتي ولا عيدتي يا ميار...
هي إن جيتي ل الحق بقى ليها تزعل.
ميار : خلاص يا طنط شوفي ايه اللي يرضيكي..
أنا غلطت اللي قولتلها كده يمكن
على رأيك ليها تزعل.
بس كمان متردش وتقولي الكلام دا.
حنان : خلاص تبقوا خالصين.
ميار : خالصين ازاي بس يا طنط
دا انا طالعه بالهدوم بقولها اتفضلي راحت رازعه الباب
في وشي.
حنان : ما انتي كمان بتستفزيها يا ميار.
ميار : و ايه الاستفزاز اللي فيها بس..
يعني كمان دا جزائي!!
حنان : اسمعي يا بنتي
لو ليكي نصيب في حاجه هتاخديها..
ميار ' مش فاهمه.
حنان : يعني مش هوضح اكتر من كده.
بس سيبي رانيا في حالها
وخليكي في حالك.
ميار : ما انا سايباها في حالها اهو يا طنط..
شكلها نازله.
خرجت حنان ووقفت قدام باب الشقة..
رانيا : صباح الخير.
حنان : صباح النور.. على فين
يا رانيا؟
رانيا : رايحه اتمشى شوية.
حنان : طب ما تيجي تدخلي ندردش مع بعض شوية.
رانيا : معلش يا طنط مرة تانية.
حنان : بقالك مدة تقوليلي طنط
راحت فين ماما
ما انتي دايما كنتي تقولهالي.
رانيا : علشان مفيش زي امي
ولا ينفع يتقال الكلمة دي لحد
غيرها.
حنان : كانت بتنفع زمان إيه
اللي تغير؟
رانيا : علشان امي عمرها ما هتنصر عليه اللي عايز
يأذيني
ويخرب بيتي.
حنان : و أنا بقى اللى بنصرهم عليكي؟
جرا ايه يا رانيا متعقلي كده
وتفكري في الكلام قبل ما تقوليه..
ولا دماغك لسعت؟
رانيا : اعتبريها كده يا طنط
بعد اذنك.
حنان : تصدقي انك قليلة الأدب ومتربتيش.
رجعت رانيا ل حنان بعد ما كانت وصلت لعند بوابة البيت.
رانيا : ايه حضرتك بتقولي ايه؟!
حنان : اظن سمعتي ومتكتريش في الكلام وغوري بقى
في داهيه شوفي انتي رايحه فين.
رانيا : معلش ليه راجل يترد عليه.
حنان : و راجلك دا بقى هيجي
يضربني قلمين ولا هيعمل ايه؟؟
لما يجي  يبقى يشوف صرفه معاكي.
علشان انتي زودتيها اوي.
رانيا : انا برضه اللي زودتها.
دا انتي بتتفنني ازاي تنكدي عليه حياتي.
من أول ما اقنعتي البيه ابنك إنه يتجوز عليه وجات الهانم سرقت فلوسه لحد ما رجع وهو ندمان
و عايزني انسى اللي فات
ورجعتي تاني بلتينا بيها.
حنان : اخرصي قطع لسانك
انا اللي بلتكوا برضه؟!
تصدقي يا رانيا انتي مش عايزة غير إنه يرجع يرميكي
انتي في الشارع.
رانيا : واترمي في الشارع ليه
عندي بيتي اروح اقعد فيه.
حنان : خلاص خدي الهدمتين بتوعك وغوري في داهيه يلا.
رانيا : ياااه دي اخرتها
بعد اتناشر سنه خدمه..طبيخ وغسيل وعايشه عندك خدامه
اقعد تحت رجليكي اشوف طلباتك..
خلاص اغور دلوقت..
بعد ما لاقيتي اللي تخدمك..
بس معلش بكره تتقلب عليكي
لما متنولش غرضها.
ميار قاعدة جوه هتطق من كلام رانيا وعايزة
تخرج ترد عليها
بس مش عايزة تزعل حنان منها
وعايزة تكسبها في صفها وفعلاً نجحت في دا..
رغم إن حنان عارفه ومتأكدة ان ميار عايزة
توصل ل الهدف ده
(إنها ترجع ل هيثم).