رواية
بقلم الكاتبة نِـجـمـة و كٓـمـُر
..............
رشا : گعدت على صوت القران الي مشغلتة امي ومعلية صوته
نهضت من مكاني كبل على كنتوري طلعت ملابسي
مال المدرسة وحضرت جنطتي لميت اقلامي من على الميز حطيتهن بالمحفظة مال الاقلام
طلعت يوميتي الي نطتنياها امي من الليل حتى الصبح خاف تنسى ومتنطيني حطيتها بالجنطة واخذت ملابسي ورحت للحمام
اخذت شور سريع و لبست ملابس المدرسة
قميص ابيض تلث ارباع الردن قماش والباقي تور ينزل على اصابعي
واضافري المصبوغة بلون وردي فاتح شكد ااحبهن
بيني وبين اضافري علاقة حب تاكدت هنة بسلام ومحد مكسور منهن ههه
وصدرية نيلي طويلة مخصرة ومفصلة جسمي
فرشت اسناني ورجعت للغرفة طلعت ماشات نيلية
وطلعت المشط
رحت للمطبخ لكيت امي دتسوي ريوك
_صباح الخير ماما
_صباح الورد والياسمين على بنيتي الحلووة
_ ماما مشطيلي شعري
_ صار جيبي المشط
اخذت المشط من وانطيتها ضهري بدت تمشط بشعري واني ركباتي تكسرت من الكعدة بالكاع
لان شعري طول ومتكدر امي تسيطر علية الا اكعد على ركباتي وهي تنزل بي بالمشط
كملت وظفرتة كتلها ماما لا فدوة لتضفرييي
_اسكتي اخاف علية يتكطع اذا تخلي ما مظفور
اخذت الماشات من ايدي وحطتهن فوگ الظفيرة
كمت كعدت على الميز واني مطنكرة لان امي ظفرتلي شعري واني اريد اسوي ذيل حصان علمود اتباهة بي كدام البنات لان هو بسل كلش ولونة جوزي فاتح ويوصل لنص فخذي
حطتلي امي بيض مسلوك وجبن وكلاص جاي
اكلت واني ضايجة علمود شعري
كعد بابا كاشخ ومتعطر علمود دوامة هو قاضي يداوم بالمحكمة باوع بوجهي وتقرب باس خدي
_شبيها بنيتي زعلانة من وجه الصبح
_وووف بابا امي متقبل اسوي شعري ذيل حصان متقبل الا تظفرة يومية
_ولج غير اخاف علية يتكطع
_يي بابا خلي ظفيرة احلى
_ لا مو حلوة هيج بس انتوا تكولون حلوة
_لاحلوة ويلة استعجلي علمود اوصلج بطريقي
كمت غسلت بالسنك ورجعت لغرفتي حطيت عطر واخذت حذائي وجنطتي وطلعت لبستهن وانتضرت بابا بالطرمة يم سيارتة ثواني طلع
