💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💖الحلقة 16 : القســـ1م💖

🎆الحلقة السادسة عشر : القســ1م 🎆
🌺🌺
في هاك اللحظة لقى روحو ينسى كل شي ...ينسى حتى الذكريات ايلي كانت مسيطرة عليه وقتها...حاجة برك تعنيه وايلي هي تولين و الحالة متاعها...عمل كل شي باش يفيقها اما هي كانت عبارة ميت ...تفجع لا تكون صارتلها حكاية هاكي علاه حملها وركبها في كرهبتو وطار بيها عجاجة للسبيطار ...عدوها للاستعجالي وين باش يكشف عليها الطبيب  ويشوف  شبيها وشنوة مرضها .
اما اركان فقعد يستنى فيها في الصال داتونت وايدو على قلبو ، صراحة هو خايف عليها ...الحكاية غريبة شوية اما وقت شافها ممدودة ومافي عينها بلة حس بقلبو عصر عليه ،كان مخمم ينساها ويمحيها من بالو اما اش يعمل تي هاي جاتو ليديه وحدها ..فيقتو من  سرحتو صوت الفرملية " مسيو "
هز راسو وكيف لقاها نفس الفرملية ايلي تلهات بتولين وقف وسألها بلهفة " شنوة احوالها لاباس ؟! ...كانت واقفة وفجأة طاحت لوطة...مانيش عارف شبيها ..."
تبسمت على حالتو وهو داخل بعضو و موش عارف اش يقول بالضبط " مسيوووو...هدي روحك المدام لاباس ...غير شويـة طاحتلها الطونسيون ..."
نفخ براحة ورجعت فيه الروح" الحمد الله " ماركزش مع كلمة المدام ...اما نجم يشوف وجه الفرملية ايلي يضحك ويبشر بخير ...لمعت عينيها وهي تحط يديها في جيوب طبليتها " مبروك مسيو...المدام اونسانت "
كيلي ماسمعش مليح ...والا ربما الفرملية غالطة في وحدة اخرى ...والا ينجم يكون هو سمع بالغالط "شنوة !؟ "
ضحكت وهي تتعدى بجنبو "اذا تحبو تثبتو اعملو تحليل وهكاكا  تتأكدو وتنحو الشك ..ايا ربي معاكم وان شاء الله تفرحو بيه "
مشات الفرملية  وهو قعد حال فمو وواقف ...ركايبو رعشت   وڨراجمو شاحت بالوقت ... يخزر للفراغ و عينيه مارمشتش حتى رمشة...اونسانت ...المرا ايلي اختارها قلبو ...طلعت حبلة وفي الحرام...كيفاش باش يتحمل ها الصدمة...اما كتف باش يهز ها الحمل واما قلب باش يقاوم ها الوجيعة...كان لازم يبعد من اول نهار رفضتو فيه...كان لازم يشد صحيح ومايتبعش وفاء لتونس...موش ناقص وجايع هو...ولا ناقص هم...ايلي عاشو من صغرو لتو يكفو ويوفو ...علاش بزهرو الاحرف يصير هذا الكل ...اما هذا كف باهي وقوي جاه...لعل يفيق على روحو ويبعد من طريقها ...ايه ...لازم يبعد ...يمشي بعيد...ورقة وحرقها ولازم يرمي رمادها مع الريح...
هزتو ساقيه من غير لايكون بوعيو وخرجتو من السبيطار ...علاش قاعد فم ...اش عندو يعمل بعد التكسيرة ايلي جاتو في ظهرو ...ماهيش بلاصتو ...خليها  ليلي زرع زريعتو في كرشها ...ركب في كرهبتو وطار بيها بعيد...تقول هارب من حاجة ...بالاخير هو هارب ...هارب من زهرو المعوج...من وجيعة قلبو ...من خيبتو...من ظلم الدنيا ليه ...من صدمتو ومن المرا ايلي كان يراها ڨمرة في السماء...ظهرت مجرد وحدة عاهرة تبيع في بدنها للكاميراوات و ليلي يدفع فيها اكثر فلوس .