💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

💖الحلقة 16 : القســ2ـم💖

🎆الحلقة السادسة عشر : القســـ2م 🎆
♥♥♥
بدات تحل في عينيها بالشوية ووين يجهرها الضو تسكرهم ...تقعد لحظات وتعاود تحلهم لين نجمت تفيق ...خزرت للسقف ...لجنابها ...شنوة تعمل فم ؟!...هذا هاو سبيطار ...تقوات على روحها وهزت ظهرها لفوق شوية باش تنجم تقعد ...مدت صوابعها الرقاق  للسيروم ايلي معلق في يدها ونحتو ...بعدت شعرها ايلي هابط على وجها وتحلحزت شوية لاطرف السرير باش تاقف ... وهي هكاكا دخل عليها فرملي  من ايلي سرفيسهم وقتها ،وقف وهو زام شفايفو بقلة صبر كيف ايلي عمايلها موش عاجبتو  " يامدام علاااه صحة الراس ...تي ماو استنى لين الشكارة توفى ع الاقل .."
بلت شفايفها الشايحين" شنوة صارلي ...شنعمل هوني ؟!"
"طحت دايخة وراجلك جابك لهوني ومن بعد مشى "
تمتمت ببهتة " راجلي ..انا  ..."
قص عليها وهو ينحي في شكارة السيروم " اذا تحب تروح تنجم ...اما ننصحك كلمو يجي  يروح بيك  ...لعل تدوخ مرة اخرى ...ايام الحبالة الاولى ديما هكا صعيبة"
تنفضت في بلاصتها وجات واقفة "شنوة قلت ...عاود "
ڨحرلها على جنب "علاه ...ياخا ماتعرفش روحك حبلة ..."
حست الدنيا ظلامت ...وساقيها يا دوبك موقفينها ...ترهوجت وقريب تطيح  لوطة لولا يدين الفرملي ايلي لقفها " قتلك راك  لازم تكمل الشكارة ...ربي يهديك "
ماهيش تسمع فيه ...ولا عينها باش تسمعو ...مصيبة وهبطت على راسها ...هي حبلة ...حبلة في الحرام ...في كرشها فمة ثمرة ماهيش حلال ...وكان تسمع نزهة اش يصير فيها ...الا ما تڨددها... "لا ....لا ...مانيش حبلة...مانيش حبلة ...انتوما غالطين ...عندي روتار اما روتار متاع العادة...انا هكا ديما ...مستحيل ...لا ..لا ...لااااااا"
يعني وفي الاخير جابت طريق امها ايلي جابتها في الحرام...علاش مستغربة ...هي قطعة حبل جابها واد....وهي جابت قطعة حبل باش يهزها الواد....وكب ااطنجرة على فمها تطلع الطفلة لامها .. ظاهرة جابت ثنية امها ايلي جابتها ...حطت يدها على كرشها تحسستها ...مازالت مسطحة موش باين عليها شي ...علاش يقلها حبلة مالا...وينو ها الصغير ...ضربت كرشها بقوة خلت الفرملي يحل فمو فيها "مداااام! "
بدات تضرب وتعاود في كرشها وهي تبكي بهستيريا " مانيش حبلة...مانيش حبلة ...مافماااش صغير هوني ...."
شدلها الفرملي يديها "ياخا فاش تعمل كيف انت ماعينيكش بالصغار اش لزك تعمل ها العملة ...والا ....تظهرش...تظهرش جايبتو في الحرام "
حبست دموعها وخزرتلو بشر " حرام !؟..."تمتمت من غير وعي "حرااام ...حرام ...ماهوش حرام....بوه ...بوه موجود...بوه موجود "بعدتو من قدامها وخرجت تجري ...بوه احمد... ولازم يعرف بها الصغير ...لازم تقلو ايلي في كرشها ولدهم ...الليالي ايلي عدوها مع بعضهم ماهيش بلاش نزوتهم وشهوتهم هاي اش خلفت ،لحظات من الجنون طيحتها بضربة قاضية...قسمتلها ظهرها  ...لازم تمشيلو وتقلو يتحمل معاها المسؤولية...طز في امو ...طز في كلامها ...ماهيش باش تبعظ عليه ويصير ايلي يصير ...معاد يهمها في الشي ...المهم ها الفضيحة تتسكر...و فيسع ...احمد لازم يعرس بيها ...مهما كان وليوم قبل غدوة توخيرة بنهار لا  ...هو البو و يتحمل مسؤوليتو ...علاش ياربي في ها الوقت بالذات ... سعدها مكبوب خليقة وكملت ختمت بهاالبلوة ايلي في كرشها  ...ضربت كرشها مرة اخرى وهي تجري في كلوارات السبيطار خارجة ...تستاهل الذبح والموت ...تستاهل القص طروف طروف ...كيفاش تنازلت على شرفها وسلمتهولو ...تحبو ايه ...اما موش لدرجة تحبل منو ومابيناتهم حتى ورقة .
      💚⭐⭐💚
قاعد يطلب ويعاود فيها وفرد وقت يحل في باب دارو ...لا يزي ملي روحت ما كلمتوش وزيد تاليفونها يصوني وماتهزش ...هاذي صارتلها حاجة والا متغششة من حكاية هو عملها على سهوة ...وهو داخل للدار عفس على ماصو ابيض صغير ...في العادة مايوصلو شي على دارو لكل بعنوان ناز يجوه حتى كانهم حاجات خاصة ...قليو بين يديه يلقاش اسم والا حكاية يعرف بيها منين جاه ها الجواب...هز حواجبو مستغرب وقت مالقى شي مكتوب عليه ...الدنيا كانت  سخونة وهو مستحق لدوش قبل كل شي ومن بعد يعمل الله فيه .
دوش وريڨل حالتو ،عمل رشفة عصير بارد يهبط الجواشي ويرويها ومن بعد جبد الجواب وحلو ...تكبست عضلات وجهو وقت لقاهم تصاور لتولين ...اما ماهيش وحدها ...معاها نفس الشخص ايلي راه المرة ايلي فاتت معاها في الرستورون ...الحكاية ولت جدية ولازم تقلقو و يفهم بالضبط شكونو هو وشنوة يعمل معاها من غير علمو ...التصويرة الثانية خلات نارو تشعل وعروقو تتكبس ع الاخير ...اللعب ولى احرش ...السيد محملها بين يديه وهازها لكرهبتو ...المشكل موش غادي ...المشكل هي مسلمتلو روحها وعادي ...اخ تولين ...شنوة ايلي  قاعدة تعمل فيه فيا  وشكونو ها الفرادي ايلي تلعب بيه وبيا فرد وقت ...هاكي علاش نهار كامل ريحتك مافماش ...واكيد باش تكذب عليا كذبة جديدة وتقلي خرجت نتمشى والا مع البنات كيف كل مرة ...وانت في الواقع تخون فيا وانا كيف البهلول مغمض عيني و نضحك ومخمم نحارب على جالك الناس الكل.
يغلي غليان وعينيه حمارت بالوقت من الغش...حتى بلاصة معادش هازتو وحاملتو . .رجع لتاليفون يطلب فيها ...وحتى ماتهزش يعاود يطلب ...لين اخيرا حنت وهزت عليه ...من الاول ماعرفش اش يقول ولا يحكي ...تربث ...لانو ماتوقعش بعد المحاولات هاكي الكل باش تغلط وتهز ...سمع صوتها الرقيق والمبحوح ونجم يعرف منو  انها ماهيش كيف العادة ...طبيعي ...الكذاب ديما تلقاه داخل بعضو " احمد...روحت ...هاني جاية توا "
"وينك توا ..وين مشيت بعد الخدمة... على اساس تستناني نروحو مع بعضنا"
"حبيت نخرج نشم طرف هواء وحدي"
"وشميت !؟ ...قصدي تفرهدت ..."
"تو كيف نروح نحكو "
"مع شكون شميت الهواء ؟! ...وحدك "
"ايه وحدي..."
هاذي الكذبة الثانية يا تولين ...مانيش باس نستناك تكذب عليا مرة ثالثة وتردني طرطور ...ليوم لازم تعرف انو احمد ينجم يكون عبد اخر ...احمد ماهوش اك العاقل والحشام وايلي يعدي ويبلع السكينة بدمها من غير مايتكلم ..ماهوش احمد ايلي يضعف قدامو وينسى كل شي معاك ...احمد ايلي صدقك وصدق محبتك ليه...انت اول وحدة قلبي يحبها ...اول وحدة قلبي يدق على خاطرها ...بعد ها السنين تعديها عليا ؟!...يعني كنت تتقرب مني و تغنيلي في غناية الحب لا لشيء غير باش تلقى بلاصتك وتتشهر على حساب اسمي ...استغليتني وطمعت فيا ..لعبت عليا لعبة نحبك وانت ليا وانا صدقت ...اما لا ...لا يا تولين ...انت باش تعرف احمد اخر من ها اللحظة .
يدادي في الصالة موش منجم يقعد ولايرتاح في اي بلاصة ،استناها لين شرفت واول ماراها تحل الباب وتدخل وقف وكتف ذراعتو لصدرو "عسلامة ...شنوة كملت تدوليشتك "
قلبها يدق بقوة ...كيفاش باش تجبدلو ...كيفاش باش تنجم تقلو راك بو لصغير جاء في غير وقت ...اما هي مجبورة تصارحو لذا لازمها تتحدى خوفها وتقلو " أحمد ...انا ...عندي مانقلك "
عض شفايفو بغل" بخصوص التدوليشة يظهرلي "
هزت راسها بمعنى ايه " فمة موضوع ضروري نقولهولك قبل ما تصير فضيحة لينا الزوز ...انا ..."
قبل ماتكمل كلمتها جاها كف لا يقرى لا يكتب ..دورلها كرايمها وجابها طايحة ع القاعة...حست بالدنيا تدور بيها بدنها تاعب خليقة وهو كمل عليها بها الكف  ...ماهيش مصدقة ايلي صار ...احمد يضربها بكف ؟!...ماهيش فاهمة اصل شبيه " احمد !!!"
هبط عليها وجبدها من شعرها وقفها " قتلي خرجت تشم في طرف هواء ...هاو **** الهواء متاعك " حشالها راسها ع التصويرة ايلي تظهر فيها مع اركان وهو محملها ...ثبتت فيها ونجمت تفهم انو الراجل ايلي وصلها للسبيطار موش اي واحد لقاها دايخة ...انما هاك ايلي ديما وراها ولعب اللعبة مع صفاء باش يقابلها ....بدات تفهم شوية الحكاية ...يعني احمد فاهم كل شي  بالغالط ...هو شاكك فيها تخون فيه ...مايعرفش ايلي هي واركان تجمعو صدفة " أحمد ايلي ترى فيه موش ..."
عاودلها بكف ثاني قريب يجننها بيه " تلعب ع الحبلين مالا ...راجل واحد ماكفاكش يا ****...**** وحدة ماكافاتكش...باهي ...ليوم تهز شبعتك منها ...ليوم الا ما **** امك **** "
جبدها من ذراعها وكركرها لبيت النوم وهي تبكي " احمد ....احمد خليني نفسرلك...احمد كل شي فاهمو بالغالط "
" سكر عليا*** فمك ...سكككككر "
شدتو من ساقيه باش ياقف " اسمعني شوية ...اهدى خليني نحكيلك "