سالفتنه_اليوم
#مگدر اگولن بغلتي ببريجي¿¿¿¿¿¿
شنو معناهه ارويلكم القصة بس شويه طويلة
هذا واحد وجيه من وجهاء المدينة مو وجيه عباس 😁
المهم هذا الرجال معروف بورعه وتقواه والتزامه بس چانت عده حچايه معلگة وياه يلعن الشيطان بكلشي يگَوم يلعنه يكعد يلعنه ذاك اليوم الشيطان اتربصله وگال هذا الوجيه شعده وياي مشتغلني لعن ٢٤ ساعة اني اله الا اخليه يتندم على هاي فعلته ذاك اليوم سمع الوجيه يدورله على بغلة اجلكم الله تاخذه وتجيبه لمكان عمله
گلوله وجيه تروح لسطبل حجي فلان تلگه عده طلبك لان هذا تاجر ويشتغل بيهن كلهم خوش راح اروحله هنا الشيطان دخل للاسطب وتهيئ بهيئه بغلة جميلة ونظيفة لونهه مميز معضلة ممشوقه القوام وقويه ونشيطة شافهه الوجيه اتخبل عليهه كله اريد هاي البغله بس من شافهه راعي الاسطبل اتفاجئ كال بينه وبين نفسه هاي البغله وين جانت خاتله عني المهم باعهه اله بسعر زين وضل الوجيه يروح ويجي بيهه لشغله والناس تتفرج على بغلته الحلوه وذاك اليوم الوجيه كعد يصلي الفجر وطلع بالحوش يصلي والشيطان يباوعله وهوه يصلي كله خوش ياوجيه هسه راح اشتغلك وبنص الصلاة صارت عينه على بغلته وشاف البغله تصغر تصغر تصغر لحد ما صارت بكد الفارة ودخلت بالابريج ماله هنا گطع صلاته وگال لا حول ولا قوة الا بالله شني هاي بصوت فايق الشيخ اني بحلم لو علم اخاف النعاس بعده بعيوني خل اروح اغسل وجهي والتأكد راح غسل وجهه باوع ماكو البغلة وصل يم الابريج خاف ورجع المهم طلع لشغله وكعد بالچاي خانه اليمه هوه وربعه بس هنا جماعته لاحظو عليه علامات الاضطراب والحيرة وسئلوه خيرك وجيهنا ليش مو على بعضك كلهم والله خاف احجيلكم وماتصدكوني كلوله احجي شبيك كلهم جاي اصلي وصار كذا وكذا.... الكاعدين كلهم صفگو بديهم وكالو لا حول ولا قوة الا بالله الوجيه صار بعقله شي وانتشرت السالفة بين الناس واهله وگرايبه وياهو يسئلة عل بغلته يكلهم شفتهه طبت ببريجي هنا اهله خذوه للعارف ليطلع الجني ويعقل المخابيل كلهم عوفوه هذا علاجة يمي وحبسه بغرفة وضل يجيه ٣ مرات باليوم الصبح والظهر وبليل ويسئلة وجيه شنو شفت وهوه يجاوبه يكله بغلتي طبت ببريجي
يطيح بيه ويجلده بالسوط ويرجعله الظهر وهم يجاوبه نفس الجواب وهم يجلده لحد ما الوجيه جلده طاح من السياط ذاك اليوم مرله صاحبه يشوفه وكعد يمه كله وجيه تره هذا العارف مايهدك الا تغير اقوالك كله شلون كله من يسئلك عل بغله كله كلشي ما شفت جنت متوهم وصاحبنه الوجيه طبق الكلام واستسلم للامر الواقع وعرف مراح يصدگه اي واحد واجاه العارف وبيده السوط وسئله كله وجيه شنو شفت وشبيهه بغلتك كله عارف اني كلشي ما شفت وبغلتي انباگت واني متوهم وكرر عليه السؤال وجاوب نفس الجاوب العارف وده طارش لأهل الوجيه كلهم اخذوه طيبته بعد كلشي مابيه ورجع الوجيه البيته وكعد يصلي الفجر بالحوش ونفس المكان وشاف البغلة تطلع راسهه وتطببه من الابريج وتباوع عليه
گلهه. (مگدر اگولن بغلتي ببريجي)
وصار هذا مثل دارج للشخص الي يشوف شي ومايگدر يحجي
وتحياتي الكم بعد روحي.......
