#حرب_المشاعر🥀🥀🥀🥀
الحلقة 22:
نزلو للتحت حاضنين بعض يضحكو
تبسمتلهم صفاء بسمة صفرة بعدما قعدو مقابلينها ...حياة معبرتهاش كأنها مش موجودة متحبش تعكر مزاجها بيها ...تمتم تقلب وجهها كي شافت وحدة متعنكشة فذراع أنس و تضحك تقول يدغدغو فيها
ناضوا يتعرفو بالضيفة
أنس: سلام ...لمح يماه و شاف فحياة بعدها قرب لعندها ...أهلا ماما مقلتيش راح تجي ...و باسها زوج بوسات على خدها ...طلت لي كانت معاه
ياسمين : هاي
أنس: احم نقدملكم ياسمين كنا اصدقاء فالجامعة ...رجعت تستقر فالبلاد و دارها مزال موجدتش ...
ياسمين : و انس بطبعو مخلانيش نتمرمد فالفنادق
أنس: راح تكون ضيفتنا ليامات ...خليني نعرفك ...صفاء تكون مرت بابا الله يرحمو
نور ختي الصغيرة و ..قرب من عند حياة و ضمها لعندو و هاذي حياة مرتي
ياسمين: اه متشرفين تبسمتلها تبسيمة صفرة
تمتمت بين سنيها ...
حياة : حية صفرة ...رجعو قعدو و يحكو أما حياة كانت فعالم آخر معلابالهاش واش تبدل أما كي شافت الحية الصفرة متعنقة فأنس حست قلبها يوجع فيها و خطر على بالها تروح تشدها من شعرها تمسح بيها الارض ...ولا كي سمعت كلمة مرتي منو و لا كي حضنها حست قشعريرة سرات فكامل جسمها ...معرفتش واش توصف كمية المشاعر لي هاجمتها على خطرة .
بعدما تعشاو كل واحد طلع و شد غرفتو
دخلت حياة تحت الغطا...خرج من الدوش مبدل حوايجو....
حاكم ورق بين يديه خارج
حياة : أنس لوين ؟
أنس: اه ايه عندي شوية ورق لازم نراجعهم لغدوة ...ارقدي نتي تصبحي على خير
حياة: و نتا بخير
حطت راسها على المخدة اما النوم حلف لا يجيها ...تقلبت شحال من خطرة كيفكيف ...حست قلبها ناغزها ...ناضت من السرير رايحة لعند أنس
فتحت الباب و نزلت للتحت ...قبل ما توصل للمكتب سمعت صوت جاي من الصالة
قربت شوية شوية و قلبها كل ما يزيد يوجعها
وصلت و شافت الحية الصفرا قاعدة على رجليها فالأرض تبوس فأنس و هو راقد و تمس فوجهو
تسمرت فبلاصتها و قلبها دق بقوة فوسط ضلوعها ...غمضت عينيها و زيرت عليهم كأنها حابة تمحي واش شافت بلعت ريقها شحال من خطرة ...فتحت عينيها لي رجعو حمورا من كثرة الزعاف
شافتها راح تنوض
زربت تخبات مور الحيط ....لحقتها بعينيها طالعة لشمبرتها ...جرات للكوزينة حكمت سكين و طلعتلها ...فتحت باب غرفتها و عاودت غلقاتو بهدوء ...ماسمعتهاش كي دخلت كانت داخل الدوش ...غير خرجت قابلتها و السكين فيدها
قبل ما تدير أي ردة فعل زربت خبطتها فالحيط و حطت السكين على رقبتها و شدتها من شعرها حياة : كلمة وحدة نمحيك من الدنيا ...
شدتها من شعرها كثر
ياسمين : اه ...اطلقي اطلقيني
حياة : اششتتت زيرت السكين على رقبتها كثر ...أنس خط احمر و نتي قربتي لحاجة خاطياتك ..و ملك غيرك ...نحات يدها من شعرها و شدت شفايفها تعصر فيهم
ياسمين : مممممم
كيفاه تجرأتي تحطي شفايفك المسخين على شفايف راجلي ...حطت السكين على جنب و مدتلها كف ...طيحها على الأرض ...عاودت شدتلها شعرها مزيرة عليه ...غدوة كي نوض صباح منسحقش نشوف وجهك فهمتي ...زيرت على شعرها كثر فهمتي
ياسمين : اه ايه فهمت فهمت
و إذا زدت لقيتك مزالكي دوري بيه المرة الجاية ما راحش نرحمك
ايه خلاص فهمت اطلقي شعري اه
طلقت شعرها لي نصو علق فيدها ...و بزقت عليها ...حكمت السكين و خرجت بعدما رمقتها بنظرة تخوف
نزلت و رجعت السكين لبلاصتو ...جازت على الصالة لقاتو مزال راقد ...قعدت جنبو على الفوتاي بعدما غطاتو ... مسحت على خدو و هي تتبسم ...ما هانش عليها تفيقو ...دنات يدو شوية و تسطحت جنبو و جبدت الغطا عليهم ...حضناتو و حطت راسها على صدرو تسمع فدقات قلبو ...غمضت عيونها و استسلمت للنوم .
أنت تقرأ
حرب المشاعر {من تأليفي Macilia Ch}
Diversosهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
