#حرب_المشاعر🥀🥀🥀
الحلقة 23:
خرجت حياة برا تتسوق بعدما راحت زارت يماها ....نزلت من التاكسي شادة أكياس فيدها ...طاحت الظلمة ... حكمت الأكياس بيد وحدة تحوس على المفتاح باليد لأخرى... نور و فؤاد يكونو راقدين و أنس راح يتأخر ليوم ...جبدت المفتاح من الصاك راح تفتح الباب ...ما حست غير بواحد غرس سكين فنص ظهرها ...طيحت المفاتح و الأكياس فالأرض ....
آه ...تآوهت من الوجيعة ..تفتح و تغمض فعيونها...حاولت تجبد النفس بسيف ...فلحظة رجعت ظلامت الدنيا بين عينيها و طاحت فالأرض ... و تخبط راسها مع الدرجة لي قدام الباب .
وصل لأنس بسيارتو ...نزل منها ...حاكم الفاست بيد و المفاتح بيد ...تمشى خطوات للباب و حبس ...فشلو رجليه كي لمحها طايحة و غارقة فدمها ..ضو الشارع ضارب فيها ....خرج صوتو متقطع
أنس: حي..يا..حياة ...جرا لعندها و نزل يتفقد فنبضها ...يديه يرعشو و صوتو راح من كثر الصدمة لدوك ماشي مصدق أنو هي جنبو غارقة فدمها .....غمض عيونو و فتحهم شحال من خطرة يحاول يستوعب ...ضرب روحو بكف
جرا السيارة و فتحها ..عاود رجعلها ...حط يد ورا رقبتها و يد ورا رجليها و رفدها
حطها من اللور و هو ركب من القدام ...يسوق و يتلفت ليها مرة على مرة ...و خايف فنفس الوقت يدير حادث ...قلبو يضرب بقوة بين ضلوعو ....حس بغصة داخل حلقو ...حاب يعيط و يكسر أما صوتو خانو ...رحا الطريق و وصل للسبيطار ...نزل من السيارة يجري للاستقبال
و أخيرا صوتو خرج متقطع
أنس: الحقوني ..الحقوا ...عيط بأقوى صوتو حتى حس حنجرتو واجعتو ... مرتي رااح تمووووت ساعدونييييي ازربوااااا الحقوهاااا
جاو الفرمليات و الطبة المناوبين على صوتو
رجع بالزربة لعندها و هوما جابو نقالة ...حطوها فيها بلعقل ...و راحو يجرو بيها للاستعجالات ...وقفوه قبل ما يدخل ...خلاوه برا و هوما داخل
شد شعرو حاس روحو راح يهبل ...حكم يدو يضرب فيها على الحيط بكل الغل و العجز لي حسو كي شافها فهاديك الحالة لو مفاقش من صدمتو كان راح يلحقها
رجعت يدو حمرة و تلطخت بالدم أما ما حسش بالوجع قد الوجع لي حاسس فيه داخلو ...مسح يدو فالشوميز ديالو ...لمح الدم لي عليها ...دم حياة...فلحظة انهار على الأرض يبكي و يخبط في راسو على الحيط ...جراو لعندو يحبسو فيه أما بلا جدوى ..جاب طبيب آخر إبرة مخدرة ...و غرسها فكتفو ...حس روحو راح يغيب عن الوعي طرافو فشلو و عينيه ثقالو و راح يستسلموا للنوم ...قاوم باه ما يرقدش لازم يكون فاطن و يستنى حياة تفيق اما جسمو خانو و استسلم ...طاح على الأرض ...زربو رفدوه و حطوه فغرفة أخرى
عند حياة لي كانت تصارع فالموت
بعدما نحاولها السكين من ظهرها و عقمولها جرح راسها لي النزيف ماحبش يحبس ...داوها لغرفة العمليات ...الفرامل يتجاراو ..وضعها حرج ...حتى لو جرح السكين ماشي عميق أما الضربة لي كلاتها فراسها ما تبشرش بالخير
كل هاد سمعاتو نور ...حاطة يدها على فمها تبكي و آدم حاط يديه على كتفها يهدي فيها
أختها بين الحياة و الموت و خوها راقد فعالم آخر يستناو وفتاه يفيق ...بعدما صرالو إنهيار عصبي كي شافها بهاديك الحالة أما كي يعرف وضعها الحرج كيفاه راح يكون موقفو !!!
قعدت على الكرسي ترجف بكلها
حاطة يدها على راسها و الدموع نازلين على خدها...بعدما سمعت بالخبر ... خلات يماها مع فؤاد و جات خارجة تجري تحوس على طاكسي ...لقات آدم فوجهها ... مكانش عندها حل آخر ...ركبت معاه و وصلها بعدما حكاتلو واش صرا ...مع اللول ماقدرش يفهمها من صوتها لي كان يرجف
نور: كيفاه ماحسيتش بيها كيفاه ...بسبة الدوا ل#### لي نشرب فيه ..لو أنس تأخر أكثر كانت راحت فيها ...
قعد جنبها يحاول يهديها
آدم: اشتتت ماشي ذنبك بلاصة مراكي تلومي فروحك ادعيلها ..لازم تكوني قوية ...الايام الجاية راح تكون صعيبة
نزلو دموعها كثر ...حط يدو على خدها يمسح فدموعها ...حطت راسها على صدرو و كملت تبكي بحرقة ...لف يدو عليها يمسح على شعرها
أنت تقرأ
حرب المشاعر {من تأليفي Macilia Ch}
Acakهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
