#حرب_المشاعر🥀🥀🥀🥀
الحلقة 25 و الأخيرة :
آدم: من ساعات قلتلك مديلي فرصة أما نتي رفضتي ...إذا بقيت واش راح يتبدل ؟؟
نور: ما راح يتبدل والو لكن ..
آدم : مكاش لكن نور ...راني رايح ...إذا قلتيلي إبقى و راح نمدلك فرصة نكونو مع بعض راح نبقى أما غير هك ...مبقاتش قعدة ...مكاش حاجة راح تبقيني هنا نور
سكتت تشوف فيه ...قعدو مدة يخزرو لبعض
بلا حتى كلمة ..طال سكوتها ..
آدم: فهمت ...سكوتك مدلي الإجابة ..
قرب منها و باسها جنب شفافها ..
...و همس في وذنها
آدم: فوقت قصير دخلتي قلبي
و حتليتي جزء منو ...
منعرف إذا حب و لا إعجاب
أما متأكد أنو مراحش ننساك بسهولة
و راح تقعدي راسخة فعقلي قبل قلبي ..
...تهلاي فروحك و ففؤاد...تبقاي على خير ...باي .....بعد منها و شاف فيها نظرة أخيرة بعدها راح و مخليها وراه
تشوف فيه و هو يبعد ...تحس روحها مربوطة و حايرة
...حكمتها غصة تاع بكا ...نزلو دموعها ...صح تحب يبقى اما تحبو يبقى لمجرد إحساسها بالأمان و هي جنبو ...متحبش تمدلو أمل كاذب بعدها تجبد عليه ... الأفضل يروح و يشوف حياتو خير ما يبقى هنا...كيما قال ...مكانش حاجة تبقيه هنا ... خلاصت حكايتهم قبل حتى ما تبدا 💔
نور: باي 😟
عند أنس...
راح وصل يمات حياة للدار لترتاح شوية ...و رجع لسبيطار ...غير قرب لباب غرفتها ...لمح الطبيب خارج منها ...زرب فخطواتو ...خايف و قلبو يضرب بقوة
أنس: دكتور !! خير حياة كاش ما صرالها
تبسم الطبيب معاه ...لا هي بخير....أما فاقت
ضحك أنس بفرحة
فاقتت !!!
ايه بشفا عليها
يعطيك الصحة دكتور
بلا مزية ..واجبي
راح الطبيب و هو فتح باب الغرفة ...و البسمة ماشي مفارقة وجهو
غير دخل ...قابلاتو حياة ..مكسلة فسريرها تشوف فالسقف ...غير دخل ناضت و تقعدت فبلاصتها
قرب منها ..و شدلها وجها بيديه
أنس: حياة !! و أخيرا فقتي يا عمري ...
باسها من راسها و قعد يتأمل فيها ..فكل تفصيلة منها ...خزر فعينيها لي يعشقهم بحب
..أما جوابها صدمو و ضحكتو تمحات من وجهو ...حس طرافو فشلو و راح يدوخ
نحات يديه من وجهها و نطقت
حياة : شكون نتا ؟؟
أنس: أنا أنا ....معرفش واش يقول كأنو لسانو تربط ...أنا أنس ههه راجلك ماشي متذكرتني ؟؟؟
حياة..لا اكيد راك تتمسخر وقتاه تزوجت أنا ؟؟
...ناض من السرير رايح جهة الباب ...راح نعيط لطبيب دوك نرجع
فتح الباب و خرج ...شاد فالحيط ...حط يديه على راسو و تكا على الحيط ...تقوى على روحو و راح عند الطبيب
دخل لمكتبو بلا مايدقدق يهدر بسيف
أنس: دكتور مرتي ماشي متذكرتني هي فقدت ذاكرتها ...هي ...قعد على الكرسي شاد راسو بين يديه ..بصوت ضعيف ..نساتني
فرغلو الطبيب كاس ما و مدهولو
تفضل اشرب ...اقعد هنا راح نعاينها و نجي ..اهدا أن شاء الله خير..خرج الطبيب منا و دموعو نزلت منا ...أنو حياة تفقد ذاكرتها و تنساه هدمو كيما لي قريب يوصل لأعلى الجبل و عاود طاح لتحت ...كل لي دارو راح مع الريح ..كل صبرو و لي دارو باش يكونو كيفكيف و تحبو تبخر مع الريح
رجع الطبيب و قعد مقابلو و نطق و هو قعد متحركش من بلاصتو
مع الاسف مدام حياة فقدت ذاكرتها أما ماشي كاملة
هز راسو ..كيفاه؟
يعني على حساب هدرتها ماشي متذكراتك متذكرة عايلتها برك
بلع ريقو ...و مراحش تسترجع ذاكرتها
لا اكيد راح ترجعلها اما معلابالناش وقتاه .. تقدر ترجع دوك تقدر بعد يومين ...بعد أسبوع ولا بعد شهر و لا عام ...
اوكي مرسي دكتور
ناض من الكرسي و خرج رايح لعندها
توجه للحمام قبل ...غسل وجهو و رتب حالتو ،و خرج
فتح باب الغرفة لقاها لابسة حوايجها و راح تخرج
أنس : وين رايحة ؟؟
حياة ..اسمحلي أما واش دخلك ؟؟.رايحة لداري
دارك؟؟...نعرف و نتفهمك أنو نتي ماشي متذكرتني أما انتي مرتي أولا و ثانيا مزالكي مريضة ...و ثالثا راح تجي معايا
حياة...طلعت حاجبها ...والله !!!
ايه هيا قدامي ...شافت فيه من فوق لتحت
شعرو مفرفش ...عيونو مذبالين ..سواد تحت عينيه ...
عوجت فمها ..لا منروحش معاك ؟؟انا منعرفكش و مستحيل نروح مع غريب ...هيا باي
غمض عينيه بزعاف و عاود فتحهم كانت تجاوزاتو و راح تخرج من الباب ...شدها من يدها قبل ما توصل للباب و تفتحو
دورها عندو حتى خبطت في صدرو
شهقت حياة شهقة وحدة ..
واش راح دير ..اطلقني
مراحش نطلقك ..راسك يابس و مراحش تفهمي بساهل ...
كانت حا ترد عليه ...أما أنس سبقها و شدها من خصرها و رفدها على ظهرو و خرج من الغرفة ...و الناس يشوفو فيهم و هو ما عطاهمش اهمية ...دخل للمصعد و هو مزالها شادها هكاك ..جاب ربي غير هوما فيه
حياة..هاي نتا يا وسمك هبلت نزلنيييي
أنس..بركاي بلا عياط و قرصها من جنبها
حياة..اييي توجع اححح يعطيك ضربة
زادلها الزاوجة
اححح خلاص وجعتني مهبول
مهبول بيك ...قلبت حياة عينيها و سكتت خايفة يزيد يقرصها
تفتح باب المصعد و خرجوا منو ....مشى بيها حتى لطوموبيل ...فتحها و حطها على الأرض
هيا اركبي و لا نركبك أنا و غمزها...شنفت في وجهو و دخلت ...دار من الجهة الثانية و ركب حتى هو ...
أنت تقرأ
حرب المشاعر {من تأليفي Macilia Ch}
Randomهل يجتمع الحب و هوس الإنتقام في آن واحد ؟؟ عقل مريض يقوده مهووس للإنتقام أم سيتغلب الحب الذي تسلل إلى قلبه خفية لتثور داخله حرب مشاعر بين قلبه و عقله و يا ترى من سينتصر في النهاية؟ (باللهجة الجزائرية ) {من تأليفي Macilia Ch} بدأت في أفريل 2019 إن...
