💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )

الحلقة 19 : القســـ3م

🌺الحلقة التاسعة عشر : القســ3ــم🌺
                      ❇⭐❇
يحرك في قهوتو وشارد ...تاليفونو بحذاه يصوني وهو مولى الدار موش هوني ...يحس بفراغ كبير ووحدة مانجمش يتحملها من بعدها ...كل مايتعدى نهار ،كل ما الندم ياكلو ماكلة ...اللحظات ايلي  نسى فيهم رزانتو وعقلو وتصرف معاها كيف ولد شارع مازالو راسخين في بالو ،مطبوعين وموش منجم يمحيهم ...كل مرة يفكروه بعملتو وبغلطو ايلي ماتتصلحش وماتتغفرش مهما عمل ومهما طلب السماح ...لكن فاش قام عليه شاغل وقتو بيها ...سمع ايلي عرست بصاحبها ...ايلي صوحبتو عليه ...ايلي خانتو وخانت ثيقتو ...حتى بعد ايلي صار بيناتهم نجم يقبلها ويعرس بيها ...ساعات يستغرب فيه،حسب ما سأل عليه راجل ماناقصو شي  اغنى منو حتى ،علاش من دون النساء اختارها هي ...كان ينجم ياخو اكبر عارضة اما هو عينو جات كان علي يحبها هو ...فاق من سرحتو وقت وقف ناظم بجنبو وهز ع التاليفون في بلاصتو " اهلا بمرت خويا ...ايه ناظم يالا ...سي السيد متاعك يدوش ويظهرلي غرق في البانو هاك فكرتني نتفقدو...باهي ...تو نقلو يطلبك اول ما يكمل "
نفخ وهو يعلق عليها ويرمي ااتاليفون عاى خوه "بربي شنوة في مخك ؟! ...ياولدي ريما تو خطيبتك لازم عليك تتلهى بيها حتى شوية "
تأفف أحمد  وخزر بعيد " هذا الكل في مصلحتك عاد ...طالما انا ملصقيني فيلي اسمها ريما...انت ونورس  في صحيفة العسل "
صفق ببلادة " برااااافو براااافو ... ياااا ...فهمها ..." مال لقدام بنصو الفوقاني " ياولدي اخرج من حالة الجمود هاذي ، شنوة ناقصها ريما.... الف راجل يتمناها ...بدن ،زين ،فلوس ....تي اش تحب اخر"
تنهد وهو ياقف ويحط تاليفونو في جيب الدخلاني متاع الفاست "حديثك مع ايلي مايفهمكش ينقص من الاعمار "
"العمر ناقص بالحديث والا بلاش ...استغل الفرصة مادامك شباب ومفاصلك تطاوعك ...راو اذا كبرت تاكل صوابعك ندم "
دوح أحمد براسو و خلاه قاعد ومشى ...دوب مابعد وجات جناة "سي ناظم ...مدموازال نورس وصلت "
ضحكت عينيه ولمعت من الفرحة ،قام ينغز ويزرب لين وصل للصالة وين كانت فمة بنية في اول العشرينات  تستنى فيه ، متوسطة في الطول ،ضعيفة وبشرتها صافية و فاتحة ...شعرها قصير يادوبك يفوت رقبتها ، مكياجها خفيف مبينها على طبيعتها ،عينيها مكبرتهم بالكحل والايلاينر وفمها اختارتلو لون الرمان باش تصبغ شفايفو  ...كانت قاعدة وحاطة ساق على ساق وهي تفتوش في تاليفونها ...على اول  ما وصل  ناظم  قامت وعرضتلو
"نروووستي " رصلها بوسة مطولة  على خدها وهي مسلمة روحها وعاجبها الشي  ،قرصتلو خدو وتبسمتلو "شنوة ناقص نوم ؟!...علاش كلمة نروستي مرخوفة والبوسة موش هي "
صرت جناة سنونها بغزول ...ها الفرخة مااكثر تزعبينها وترهدينها و المدك ناظم ميت فاني عليها ومايراها كان هي ..ملعبتو على صوابعها كي الخاتم بين صوابعها وهو راضي ومسلم ...ماتعرفش علاش تكرها وماتحملهاش رغم ايلي احساس ااكره هاكي حد ما على بالو بيه وحد ما سألها على رايها ولا شاورها  ...زمت شفايفها بقلة صبر وكملت التنظيف وهي تحاول ماتركزش معاهم .
بالنسبة لناظم كان غارق للشوشة معاها ،كل حركة وكل تغنيجة يذوب معاها ذوبان وايلي تقول عليه يقلها الله يبارك ،متبعها بعين مغمضة وما صدق لربي كيفاش وافقت اخيرا انها تكون معاه  ..نفضتلو  كتف الفاست بطراطش صوابعها وهي تذبلو في عينيها " شقولك في بتي داج راس راس"
" اش يقول الميت قدام غاسلو "
ضحكت بتزعبين ودخلت ذراعها في مرفقو "مالا هيا "
شطح حواجبو " هيااا "
بايبا لجناة "قول لزينوبة هاني  خارج ....ليوم الله غالب باش تفطر وحدها "
دوحت براسها وتبعتهم لين خرجو وضحكهم واصل للعباد الكل " اييييه...والله ما تجيب آخرتكم كان ها الفزغولة ...عرفت كيفاش تلعب بيكم واحد واحد وشربتلكم عقولكم ...والايام الجاية تو توريكم معدنها الصحيح..."
                  ❇🌺❇
التاليفون بوذنها ومفكسيتو بكتفها باش ما يطيح  وهي تطوي في دبش بنتها وتنظم  فيه في بلاصتو ""مانعرفش يا امي...هو هكا قالي ومازاد شي من بعد ...ماك تعرفو كلمة وعدي لا يفسر ولا يقعد يحكي كي خلق ربي ...هاك ترى من الاول هزنا لسويسرا وتوا فرانسا واخرتها يحب يرجع لتونس وانا في هذا الكل مغيبة وماعنديش حتى ربع راي"
من الجهة الاخرى كانت نزهة تمسح في الغبرة من الشبابك "هي ع الاقل قالكش وقتاش جايين خليني نحضرلكم حتى فطوركم"
"حتى انت يا امي... قتلك ماقال شي ومافسر شي ...الحاصل تو كيف نجو طالعين للطيارة نكلمك هوكا ريڨل اومورك من وقتها ..."
"باهي شاهياش حاجة نطيبهالك "
"والله ماتخمم فيا كان انت ...يعيشك يا ننزو...ايلي يجي منك مبروك ...تقطعت شهاويا وماعاد عيني في شي "
"وهاك الفتروشة ماتوصيلها شي"
"اسكت ماهي عابدة اركان وين تراه تلصق فيه ...وليت نحشم اصل ...الراجل معيفتو في روحو وزيد تعيطلو باا وهو الدم يطلعلو ع الكلمة ...حرت معاها ...ديما نقلها ماهوش بوك وباقية مكبشة فيه وهو ماعينو فيها "
"شوف بنيتي ...اركان ...لازم تفهمو...موش بالساهل راجل يربي ولد حد اخر...وسيب الطفلة معادش تعبيلها مخها بها الهداري بوك والا موش بوك شتفهم منو هي ...مازالت صغيرة على ها الكلام وقت تكبر وتعمل عقل وتولي تفهم وقتها فسرلها كل شي ...سيب الصغيرة تعيش صغرها يعيش بنتي "
"تعرف امي خايفة ...قلبي ضاغط عليا ع الاخير... اربعة سنين وانا هاربة على هاك البر ...شكون قال ايلي مانيش باش نقابل احمد كي نرجع لتونس "
"اوووف على ولد زينب ...علاش باش تخاف ...بالاخير هو بوها وحق بنتك لازم تاخذو منو...ليوم والا غدوة انت ياش تقابلو...انت صاحبة الحق موش هو ...ماتخافش امك معاك "
"ماعيني في  حتى حق ...ومانحبوش يعرف ايلي هي بنتو "
"انت متخيلة انك باش تنجم تخبي ها الخقيقة ...يراااا ...حتى انت يا تولين ...كان البهيم ايلي يطربق في وذنيه موش باش يطلع  ايلي هي بنتو ...سيلين بكلها بوها ...نسخة منو ...والا احنا منين جانا العين الزرقاء و الشعر الاصفر ...الله لاتربحو ...مايستاهلهاش.... لكن هذاكا اش تكتبلنا الله غالب ..."
تنهدت بصوت قوي وصل لنزهة " مانحبش يا أمي ...مانحبش بنتي تاخو لقب بن الرجب مهما يصير ...انا ايلي عانيت الويلات باش جات للدنيا موش هوما ...موش بها السهولة  "
"كيف تجي تو نزيدو نحكو اكثر ،الحديث ع التاليفون موش باش يخلينا نفهمو بعضنا مليح "
"باهي نزو...هوكا تو نحكاو من بعد "
"بوسلي سيلا ورد بالك على روحك "
"يوصل وانت زادا سايس روحك "
علقت ورمات التاليفون حذاها ،فرعست شعرها بعصبية وتمتمت "مستحيل تكون بنت هاك الحيوان ،اكبر عار ليها هي انها من دمو ...ناس وحوش ...اول مايعرفو انها بنتهم ممكن ياسر يقتلوها ...موش غريب عليهم ماهم الشهيرة زينب حبت تعملها قبلها "