🍇الحلقة عشرون : القســ2ــم🍇
✳🐋✳
شافها تاقف وتركح شعرها بعد ماهبط على وجها ...ضيق عينو وخزر طول لوجها ...وهي تحدتو بڨحرة حاول توصلو بيها انها تحكي بجدها ...عض شفايفو بقلة صبر وبغش مكتوم "شنوة معناها ها الكلام ؟!"
كتفت يديها واتكت ع البيرو ببرودة دم " اذا تحب... تكمل ...تخدم... رايض... خرجها " خيرت تقلو الكلمات مقطعين باش تزيد تشعلو نارو وتزيد تغيضو ،اما هو ماكانش من العاكسين ...طبطب بقوة ع الطاولة
" سيلين ...اخرج "
هبتلت سيلين شفتها اللوطانية باش تبكي "مانحبس "
مد يدو الطويلة و جبدها من ساقها ...كركرها لين خرجها ومن بعد دزها لامها " فازي العبو بعيد" حملتها تولين بغزول وتشوحرتلو بخزرة فيها بارشا وعيد
ترجتو سيلين بصوت باكي قطعلو قلبو " بااااا "
خزر لايكرون البي سي و عمل روحو يخدم وموش لاهي بيهم ولا هامو فيهم ...هوما خرجو وهو ضرب ساق الطاولة بغل ...نفخ هواء مثقل بالغش وفرك شعرو لعل يهدى ويرجع لتركيزو لكن كل ما هو يحط الدوسيات قدامو ...لا اراديا يشوف خيال تولين قدامو ...ميت فاني فيها وفي حبها ،يكافح بالسيف باش ما يغلطش في حقها ويرضي شهوتو منها ...بالنسبة ليه فمة اتفاق بيناتهم ولازم هو يحترمو مهما يكون ...مالازمش يكون احمد بن رجب ثاني ...لكن هو بشر بالاخير ...و علة قلبو هي ...وايلي يقهر انها حلالو وقدام عينو وماينجمش يقرب منها ...ولا حتى يصارحها بحبو ...
قرر يسكر كل شي ويأجل الخدمة حتى لين يفضي مخو وينجم يركز كيما يلزم ...مشي طول للدوش برد جواجيه غادي وخرج ...حضر روحو ولبس وهبط للصالون الكبير وين المفروض يستقبل ضيفو ...وبزهرو لقى سيلين تلعب وعاملة جو ...وقف يثبت فيها وفي اللبسة ايلي اختارتهالها امها ...روبة باربي في الفيولاي و البلون وشدتلها شعرها لفوق كعكة خرجتها في صورة الملايكة ....تفكر اول مرة شاف امها ...اول دقة لقلبو ...اول خيبة ...اول خطوة للجحيم ايلي لحد هاك اللحظة قاعد يتخبط باش يخرج منو باقل الاضرار ...
تلفتت سيلين واول ماراتو جاتو تجري وحملتو بذراعاتها الصغار "ببببااااابببا"
ها الفرخة ماتعياش من ها الكلمة ...عملتلو ااجاير بيها وهي وين تراه تلصق فيه وتنبح بيها ...شدها من اكتافها الصغار وبعدها عليه ،نبه عليها " رد بالك كيف يجي عمي الراجل تلصق فيا هكا وتناديلي بابا...تفاهمنا "
ضحكت بدلال وقلدت كلامو " تفاهمنا "
جاتو الخديمة تهرول "سي اركان الضيف وصل "
تأفف " و تولين وينهي !؟ "
"مازالت لفوق تحضر في روحها "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Kısa Hikaye★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
