🍇الحلقة عشرون : القســـ4ـم🍇
✳🐋✳
حبست يدها على تمسيد نواظرها وخزرتلو بغضب كبير " من ناحية التبني متبنية ...ومن ناحية امها الحقيقية مانعرفش اكاكا ...شكون يعرف ربما جابتها من غير صداق و طيشتها وكيف لقات شكون يلمها عاودت تبنتها " ضيقت عينيها بشر " وانت فاش تفرق معاك اذا بنتها والا متبنية ؟!"
هز ناظم حواجبو في استعداد للهروب اذا لحمت بيناتهم وقعد كل مرة يخزر لواحد فيهم مستني في لحظة تشعل النار .
نفخ فاضل بقلة صبر وحس انو اعصابو باش تفلت منو بالضبط كيف ماصار مع احمد ولدو ... ،النقاش معاها في اخر فترة ولى بكلو عرك وعياط , كلمتين خوات على بعضهم ماينجموش يحكوهم برياض ، لذا احسنلو يقوم من فم ويخليها مع روحها شوية لعل يرجعلها شاهد العقل وتعرف غلطها وين ...بعد ها العمر وقدام اولادو ايلي في طولو خايبة بارشا يقومو يتناڨرو كيف الفروخ...قام من بلاصتو وصاح باعلى صوتو "جنااااااة ...جناااااااااة "
جات الاخرى تهرول وتكبست قدامو " نعم سي الفاضل "
"هزلي قهوتي وخلطها عليا للبيرو "
هز زينب وحطها وخرج من الصالة يعفّس بغش ...اما هي موش معاه من اصلو ، مدت ساقيها وتنهدت من اعماقها ...مخها موش منجم يحبس تخمام ...وماهيش قادرة ترجع جو عايلتها كيف ما كان...تولين...حتى وهي بعيدة باقية حاجز بينها وبين ولدها ...عاجزة تحمي راجلها وصغارها منها وموش منجمة تلقى حل باهي يخرجها من هاك الوحلة .
لفوق ،وين بيرو الفاضل ،خلطت جناة وفي يدها طبق القهوة ، حطتها على طاولتو وحاولت ماتخزرلوش ...اما هو كان يڨحرلها في ڨحرة حارة اللطف ...سألها بنبرة جافة وحادة
"كنت تعرف بايلي تولين ماهيش بنت نزهة !؟ ..." ماهزتش عينها فيه وقعدت ساكتة ،ضرب الطاولة بكفو الغليظ لين تنطر من القهوة شوية " نكلم فيك "
اعترف بكل صراحة " ايه ...كنت نعرف "
تصدم وقعد باهت فيها "وعلاش ما فيباليش ...فاش كنت تستنى باش تقلي "
جاوبت بكل برودة دم "ماجاتش الفرصة "
تنطر جاء واقف ،قدم ناحيتها وعينيه تلمع بغش واضح" تتبهلل عليا!!! ...حياتك الكل وانت مدغورة عندي في الدار ...وتقلي ماجاتش الفرصة .!!..ومنين تبنتها ...عندكش فكرة شكون بوها وشكون امها ها الطفلة ؟! "
كتفت يدها بهدوء زاد شعلو نارو
" نخاف نقلك سي الفاضل ...تجرالك حاجة "
نبرتها ...وطريقة كلامها ماهيش ولابد...ماعجبتوش وكيف ايلي تجبد عليه بالمرتاح"شنوة !؟ يظهرلي لسانك طوال يالا جناة "
لعقت شفايفها وثبت في عينيه مليح ، خذات هواء مالي رواريها ورمات القنبلة ايلي بين يديها " تولين ...بنتي ...انا ..."شوفة وجهو يلخلخ ويشحب زادت شجعتها تقول اكثر "الصغير ايلي قتلي طيحو من خمسة وعشرين سنة لتالي ..."
قعد يكافح باش يتكلم ،خرجو منو كلمات متقطعة بالسيف مسموعين "ولدتو !؟؟...موش... على اساس... طيحتو. ...؟!!"
شاورت براسها " لا ..."
سند روحو بالكرسي الجلد ايلي قدامو " الله لا تربحك يا جناة...كيفاش تعمل فيا حاجة كي هكا "
قربت منو لين ولى الوجه في الوجه" بالضبط كيف ما انت كذبت عليا وقتلي ايلي عبد الجليل ...مات"
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Conto★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
