أنا مش بخرج وماليش علاقات كتير وماعرفش حد ولا حد يعرفني تقريبا ...
= أنتي خرجتي النهارده!
- أيوه مع ماما راحت تشترى طلبات
= ياختي كنتى خرجتي من بدرى
- إيه دا إشمعنا يابابا يعني!
= عارف أنا البنات دى اللى تبقي حابسه نفسها وهوب تشوف الشارع يجيلها عريس
- عريس!
= هو دا اللى لفت نظرك أوى يعني
- لا يابابا مش قصدى بس آااااااا
= بلا إيه بلا ما إيهش هو كلمنى وأنا يعني فتحتله الباب عشان عارفهم ناس محترمين هما ساكنين نواحينا والواد كويس ومحترم وسنه مناسب و أهو هتُسكنى جنبنا ومش هتتغربي عشان أمك تهدا بقي وماتدوشنيش
= هيجي يوم الجمعه يوم إجازته عشان تشوفيه وكدا
- بس انا ماعرفهوش!
= ويعني أنتي فيه حد تعرفيه ولا يعرفك!!
- الصراحه لا
= خلاص خلينا فـ اللى نعرفه ونعرف أهله ويعرفنا وشافك و عجبتيه وسأل وعرف إنك بتي
- بس يابابا ماكنش نفسى أتجوز بالطريقه دي!
= ليكي زمايل ف الشغل؟
- أنا مش بشتغل اصلا!
= لينا قرايب ولاد؟
- كل قرايبنا بنات وأنا أكبر واحده
= خلاص بقي أهدي كدا الواد فرصه مناسبة وأنا الصراحة عاجبني
- بابا أنت مابتغصبنيش ع حاجه !
= وهغصبك ليه انتى تشوفيه وتتكلمى معاه وانا هسمحله ياخد رقمك ويكلمك واول ما ترتاحي هتلبسوا دبلة مارتحتيش خلاص الباب اللى يودى خليكى قاعدة جنب أمك!
_____
~ طبعاً زي كل البنات ماكنش نفسك تتجوزي بالشكل دا!
- لو ربنا كاتبلي الخير ف الطريقة دي مش هكرهها
~ يعني والدك مش غاصبك
- لا بابا قالي أكمك ولو أرتحت هنتخطب
~ يوم المُنيَ والله
- شكراً
~ بس إزاى نبقي جيران وماشوفكيش أبداً!!
- أنا مش بخرج كتير
~ مالكيش صحاب ولا بابا مش بيوافق
- مش بحب أخرج أو مالقتش حد أخرج معاه!
~ وأنتي مرتاحه دلوقت!
- دي أول مكالمه بينا!
~ آه مفهوم مفهوم أنا قولت أطمن بس
~ أنتي مش هتشتغلي صح بعد الجواز!
- لا مش عاوزه
~ أغلب البنات مش بتقول كدا؟
- أنا مش بميل للشغل ونفسى أهتم لـ تربية أطفال تربية صحية أطلعهم بدون عقد وأمراض نفسية وكلاكيع عندهم طموح وإقبال ع الحياه يراعوا ربنا ويحترموا الدين قبل كل حاجه، يفهموا ف الأصول وعندهم ذوق، يقدروا الناس قبل مايحبوهم
~ أنتي بجد بتفكرى ف كدا!
- أصلي بشوف ناس كتير فاقدين ثقته بنفسهم بسبب أهاليهم وأساليب التربيه الخاطئة وعادات كتير منتشره مش بحبها نفسى اللى هيكونوا ولادى يبقوا زي بشوات الستينات
~ إشمعنا الستينات!!
- كان عندهم ذوق وتقدير وبيعرفوا يتعاملوا باحترام، بُنسوار ياهانم... سعيده يامدام...صوت أم كلثوم وعبد الحليم
- عارف لما هعلمهم الحب هحفظهم أغاني أم كلثوم ، و أعلمهم اللغه الفصحي، وأحفظهم شعر
- عشان اللى يكبر منهم و يرتبط يعرف يغازل محبوبته بـ غزل مش موجود ع لسان الشباب الايام دي، يهاديها بقصايد نزار قباني ويسمعها محمد فوزي
- آلو ... أنت لسه بتسمعني!!
~ مش عاوز أقاطعك، عايز أسمع صوتك دايما سرحت فـ الحاله اللى بتحكيها، دي تقريباً حالة الحب اللى نفسك تعيشيها، واللى مش موجوده دلوقتي
- أيوه
~ ليه مش زي كل البنات أنتي!
- وليه أبقي زيهم لو زيهم ماكنش ربنا خلقني وكان قال كفايه الموجود
~ سرحت ف كلامك وعيشت حالة غريبة خلتيني عاوز نفس اللى بتقوليه و إن محبوبتي تبقي مختلفة عن كل البنات وذوقها واختياراتها مختلفه عن الكل... أنا عاوز محبوبتي تبقي زيك، وليه زيك!... أنا عايزاها تبقي انتي..!!
- أنا هقفل طايب لأتى اتكلمت كتير، عن إذنك
~ أتفضلي ياهانم، سعدت بمكالمتك جداً ويشرفني يدوم صوتك فـ حياتي...
- تصبح ع خير
~ الخير فيكى ياهانم
______
