عايزه تقربي لربنا ف الكتاب هنا 😍عايزه وصفات شعر وبشره بردوو ف الكتاب ده😇

البوست ده ممكن يزعل ناس كتير مني

، بس معذرةً لازم أكتبه، وهحاول ما أنفعل وأكون مُنصفة، واللّٰه المُستعان.

في سنة من السنين كان فيه أخ مشهور هنا على الفيس وبيكتب محتوى ديني، كان يخبط البوست من هنا وإنت بتقرأه تحس إنه زلزل قلبك وعايز تقوم تحرر الأقصى وتحار.ب المُشر.كين وقتي، قدرًا تعرفت على أهله من النساء، لاقيتهم زي غالبية نساء المجتمع المصري من تبرج وإبداء زينة ولبس ضيق وحاجات عجيبة هداهم اللّٰه، استغربت وقتها هو ازاي الشخص المُتدين ده سايب نساء بيته بالشكل ده!

من فترة كنت بتكلم مع شخصية ما وبقول لها فلان ده واللّٰه ربنا يبارك له الواحد بيستفيد جدًا من محتواه عنده عقيدة ربنا يجعله في ميزانه، قالت لي ده شخص مش محترم، تفيد بإيه العقيدة وهو شخص قذر وماسكين عليه اسكرينات فيها كلام مش كويس ومتهدد لو مبطلش يقول الكلام ده للبنات هيتفضح، ولما خاف لم نفسه!

كان فيه بنت صغيرة كلمت حد على الفيس تطلب منه فتوى في أمر شخصي تحرش بيها في وسط الكلام، تعرضت لصدمة نفسية كبيرة ولما أخوها عرف قفل لها صفحتها وبقى يجيب لها هدايا وكتب واشترك لها في كورسات وبدأت تحفظ قرآن عشان تقدر تتخطى الصدمة.

..

البارح كان فيه صديقة بتكلمني متقدم لها عريس ولما قعدت معاه في الرؤية الشرعية، بتحكي لي إنها كانت بتحاول تشوف فيه أي ميزة من مميزات الإخوة اللي مشهورين على الفيس عشان تحاول تنجذب له أو تتقبله، وجه في بالها كذا اسم حد واكتشفت إنها معجبة بيهم ونفسها تتزوج حد منهم، وقررت ترفض العريس عشان مش طالب علم ومعندهوش صفحة على الفيس! أنا بقيت بسمع منها الكلام وأنا مصدومة ومش مصدقة!

يعني أنا يبقى ربنا ارسل لي رزق طيب، في صورة إنسان عنده خُلق ودين ومجتهد في شغله ودخل البيت من بابه، واقع أهو مش خيال، أقوم أفرط في الواقع وأمسك في الخيال؟!

بنظرة سريعة كده لعالم السوشيال ميديا الافتراضي وأرض الواقع اللي احنا عايشين عليها لو عملنا مقارنة هنلاقي إن نسبة كبيرة جدًا جدًا من مشاهير السوشيال ميديا مجرد أبطال من ورق، بطولتهم أخرها هنا وبس إلا من رحم ربي، نسبة قليلة جدًا اللي بيكون محتواه الحماسي العقدي زي شخصيته الحقيقية، بل نُدرة، اللّٰه المُستعان. 

كلمة للبنات وللنساء المتزوجات اللي بتنبهر بأي أخ هنا على الفيس وتقعد تقارن بينه وبين زوجها أو خطيبها أو أي أخ يتقدم لها، يا ريت كنت قادرة ألطشك قلم على وشك عشان تفوقي، احنا خلاص بقينا أهل فَاسمحي لي ألطشك، وأقول لك نصيحة صادقة من قلبي واللّٰه لا أريد بها إلا الخير، طالما إنت شخصية هشة كده ورقيقة الديانة، ابعدي، طالما عرفتِ فتنتك فين متقربيش! واقفلي صفحتك واخرجي من العالم ده بلا رجعة وركزي في حياتك بدل ما تضيعيها وتبقى مجرد حياة افتراضية.

ده ذنب وقلة نضج ومُراهقة وبتفتري على نفسك، ذنب عشان شايفة نفسك مُعجبة وقلبك بيتعلق برجل أجنبي ومكملة! وقلة نضج ومُراهقة عشان بتتأثري ببطل من ورق مش موجود على أرض الواقع، وبتفتري عشان ربنا بينعم عليكِ بفرص كويسة وبترفضيها بحجة إنه مش زي شخصية فلان ومش قوي زي علان! واللي بيفتري وبيتكبر على أنعم اللّٰه بتزول من وشه، صدقيني دي سُنة ربنا في الأرض.

فَاتقين اللّٰه يا إماء اللّٰه في أنفسكن وسيبكم من العالم الافتراضي اللي مليان نفاق وتناقض وتمثيل ده، لأن كل دي فتن! لا أحد يقوى عليها واللّٰه، واحفظن أنفسكن وقلوبكن من الوقوع في الفتن والمعاصي..

أنا عايزة استشهد بحديث النبي عليه الصلاة والسلام وعارفة إنه حديث قوي وشديد ولكن ربنا يسلمنا ويسلمكم، اللي وقع في الفاحشة كان بيقول مستحيل أقع فيها ومستحيل أغضب ربنا ولكن الشيطان مش بيقول للإنسان افعل كذا مرة واحدة! لا خالص الشيطان بيتذاكي على ابن آدم وبياخده خطوة خطوة على قمة الجبل وبعدين يهوى به في وحل المعصية عافانا اللّٰه وإياكم!

قال رسول اللّٰه صلى اللّٰه عليه وسلم: "إن اللّٰه كتب على ابن آدم حظه من الزنا أدرك ذلك لا محالة، فَالعين تزني وزناها النظر، واللسان يزني وزناه النطق، والِرجلُ تزني وزناها الخُطا، واليد تزني وزناها البطش، والقلب يهوى ويتمنى، والفرج يصدق ذلك أو يكذبه" مُتفقٌ عليه.

والقلب يهوى ويتمنى! القلب يهوى ويتمنى ويتسرسل في الخيالات والقصص فَتبدأ النفس تسعى لتحقيق الأهواء!
أنا عارفة إن الحديث قوي لكنه واللّٰه نذير لمن غفل قلبها! والواقع يشهد بقصص وكوارث وقعت مع أخوات، بيتمنوا دلوقت لو كانت الأرض انشقت وبلعتهم واختفوا من عالم السوشيال ميديا ومبقوش موجودين أسلم لدينهم ولقلوبهم.

ربنا يعصمنا من الزلل ويتوب علينا ويحفظ بنات ونساء المُسلمين ويهديهن، وإنا للّٰه وإنا إليه راجعون، اللّٰه المُستعان.

اللهم بلغت اللهم فَاشهد.