🎭الحلقة الواحدة والعشرون : القسـ4ــم 🎭
✳🐋✳
مع صباح النهار الجديد...كل حد صبح فاقد ذاكرتو خاصة ايلي صار بيناتهم ...هي تعاملت ببرود العادة معاه ...وهو وين يلقى الفرصة ينبزها ...قصدو ربي للمطار و سيلين فرحانة تنڨز ...ماهيش مصدقة انها باش تركب الاوف كيما تقول هي...خافت وتخبت عند امها وقت طلعت الطيارة وعلت في السماء ...طمنتها بكلمات رقاق وخفاف ومسدت على شعرها بحنية ....مادامتش بارشا السفرة ،فيسع ماوصلو لمطار كرطاج وين كانت نزهة تستنى فيهم...توحشت بنتها ع الاخير ، جراتلها وعنقتها بقوة ،باست كل طرفة من بدنها " ياروحي توحشتك "
ضمتها تولين بعينين دامعة " توحشتك يااااامي ...توحشتك مووووت "
مالت على سيلين وقرصتلها خدودها " تي هاو كطوس كبر وعمل رجلين وولى يلب في اامطارات "
هي حشامة خليقة وزادت نزهة حشمتها ،خبت راسها عند امها ...كي شافتها هكاكا مدت يدها لاركان غصب مازالت ماهيش صافية ناحيتو ،وباقي ترى فيه واحد استغلالي يخمم كان في مصلحتو ،كبس على كفها وضغط على صوابعها "نسيبتي الحرة "
تملصت منو و تبسمت فوق من قلبها "نسيبي الحر ،شنوة احوالك "
تنهدت تولين بقلة حيلة ،يعني مابقى حد ما سلمش من زرارقو ومصاطو ، طلعو الباڨاج للكرهبة ايلي كانت تستنى فيهم و شدو طريق دار نزهة ، هي وامها يحكاو ماسكتوش ،ماصبروش حتى يوصلو للدار ،وهو راسو تكسر منهم ...اما كان فرحان ...ع الاقل فمة حد تنجم تضحك معاه تولين....فمة حد يخليها تحكي وتقول ايلي بداخلها ...يزيها ما سكتت وخبت ...الواحد لازمو يتحدث ساعات حتى مع الحجر ...ما يخفف الضيق كان الكلام...
نزهة فرحت بيهم ، طيبت وصنفت كل ماكلة تحبها بنتها ، حتى سيلين عملتلها الڨاطو ايلي تحبو ...بالنسبة لاركان هاكي كانت المرة الاولى يحس بلمة العايلة ....و بلهوة الام وببصمتها ع الطاولة...وها الاحساس نغص عليه قعدتو وفكرو بالام ايلي قعد نهار كامل يخزرلها وهي ميتة بجنبو ...
مسح فمو وقام " يعطيك الصحة يا نسيبتي "
تولين من غير ماتشعر " ماكليت شي راك "
يعني تحب تقول مهتمة بارشا بيا وبماكلتي ...ضحك على جنب باستهزاء" خايفة عليا ترعش ما شاء الله "
لوت فمها وكملت تاكل ،هو ما ينفع معاه شي ومايتبدلش جملة ...هز مفاتح كرهبتو و طار بيها طول ...اربعة سنين كاملين مانسوهوش في طريق ناز ...قلبو يخض بين ضلوعو و يستنى وقتاش ياقف قدام فاضل ...منى روحو بشوفتو وهو يتغصور و ماينجمش يرد ...يحب يراه عاجز ووجهو شاحب ومصدوم ...
صونى تاليفونو وايلي كان طالب نومرو من تونس...زعمة هاذي تولين طالبتو من نومرو امها ؟!! تكونش نسات حاجة من الباڨاج في المان !؟...هو مايصبرش عليها وقد مايتناوش معاها يرجعلها تقول ذكيرة تجبدو ،هز ويدو ع الفولون " وي "
الصوت ايلي سمعو خلى عينيه تتحل على كبرها "أركاااان ...وينك توا ...قلي على بلاصتك "
ضحك موش مصدق "عبدووووو...مانصدقش ...في تونس!؟..موش قتلي جاي بعد بايامات "
ضحكة عبد الجليل كانت واضحة ومنغمة "ريحة البلاد غرتني شنعمل لعمري "
ضرب ع الفولون بحماس" يسلملنا ريحة البلاد ...اه...انا قاصد ربي لناز ...تحب نتقابلو قبل والا بعد مانمشيلهم "
"عندي اقتراح ما خير ...نتقابلو في ناز ...شنوة قولك !؟ "
هز راسو هزة خفيفة " خليها اثنين في واحد كي الشامبوان ...ماكس نصيف ساعة ونكون غاااادي "
قهقه بصوت عالي بعد ما علق ،دور الفولون خارج من حومة تولين القديمة "والله وجاتك صدمة كبيرة يا احمد بن رجب ..."
💚🐬نهاية الحلقة الواحدة والعشرون 🐬💚
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
