الحلقة 6 (أحببت طباخة )
وقفنا عند اما شهد صحيت و شافت مامتها و باباها قاعدين في الصالة بيتفرجو علي Tv و قررت تتجرا و تقولهم
شهد:ماما بابا عايزة اقولكم علي حاجة
مامتها :واحنا كمان عايزين نقولك حاجة
بس قولي يا حبيبتي انتي لأول
شهد قررت تقولهم الأول عشان ميفكروش أنها سمعتهم :انا قررت اشتغل و جريت علي اوضتها
مامتها و باباها :ايييه
امل (مامتها ):ايه اللي بتقوليه ده يا شهد انتي اتجننتي شغل ايه ما تتكلم يا عبدلله و بتستخبي كمان
باباها (عبدلله ):شهد تعالي هنا
شهد طلعت من اوضتها و هي خايفة و متوترة و مش مجمعة :اصل..اصل ...
امل :في ايه يا شهد مالك ما تتكلمي
شهد:يا ماما عايزة اخفف عنكم الحمل شوية
عبدلله :لما اموت ابقي اشتغلي يا شهد
شهد و دموعها نزلت من عينيها:بعد الشر عليك يا بابا متقولش كدا يا حبيبي ربنا يديك طولة العمر
طب انتو كنتو عايزين تقولو ايه يا ماما
امل :بصراحة يا شهد احنا عايزينك تحولي إعلام عربي
شهد:ليه يا ماما
امل:من غير ليه احنا يا بنتي ناس علي قد حالنا اه بس مش لدرجة انك تشتغلي و كل حاجة غليت دلوقتي يا شهد يا بنتي احنا اه هندفعلك السنة دي منضمنش السنين اللي جاية
شهد و دموعها نازلة من عينيها:ليه .. ليه عايزين تكسرو
و دخلت اوضتها و سندت ضهرها علي الباب و هي منهارة و بتعيط :علي فكرة انا عايزة اشتغل عشاني مش عشان حد عشان حسيت اني هتقل في المصاريف الشغل مش عيب يا ماما مش حرام
باباها :انتي عايزة الناس تقول ايه يا شهد
شهد:يقولو اللي يقولوه الناس دول عايزين يقولو اللي علي مزاجهم و بس
مامتها راحت عند الباب و بتخبط:افتحي يا شهد و بطلي عياط انا هبيع الشبكة بتاعتي عشان تكلمي الحاجة اللي انتي حباها بس افتحي
في اللحظة دي ملك صحيت علي صوتهم و قامت من النوم قعدت جمب شهد و بتمسح دموعها و بطبطب عليها و حضنتها شهد اوي
ملك :متزعليش يا شهد بصي انا محوشة مصروفي في الحصالة خديهم ليكي عشان الجامعة
ابتسمت شهد علي براءتها و حضنتها اوي :يا روحي ربنا يخليكي ليا يا لوكة انا مش عايزة حاجة
لو سمحتي يا ماما سيبيني دلوقتي
امل :كدا يا شهد كدا توجعي قلبيي فاكرة لما كان ابوكي يزعقلك كنتي تيجي في حضني و تعيطي دلوقتي بقيت خلاص طب افتحي و هعملك كل اللي نفسك فيه
شهد:مش عايزة يا ماما مش عايزة حاجة سيبوني اعمل الحاجة اللي بحبها مش عايزة تبيعي حاجة انا عايزة اعتمد علي نفسي يا ماما
في اللحظة دي موبايل شهد رن و كانت شيماء ملك جابتلها الفون ترد شهد سابته جمبها و بدل ما تكنسل فتحت عليها من غير قصد و شمياء سمعتها و هي بتعيط
باباها :افتحي يا شهد عشان اتكلم معاكي
شهد ساكتة و بتعيط
_________
شيماء و مامتها كانو صاحيين بيسمعو مسرحية ريا و سكينة و اتصلت علي شهد تشوفها عملت ايه مع مامتها سمعتها بتعيط و بابها و مامتها بيزعقو و قالت :الو الو شهد ردي
راحت قفلت و بصت ل مامتها :ماما انا نازلة لشهد
وفاء:في ايه شهد مالها
شيماء:معرفش بس مش مطمنة شهد بتعيط و باباها و مامتها بيزعقو تقريبا موافقوش علي الشغل
وفاء :طب استني البس عبايتي و نازلة معاكي
_________
عند شهد كانت لسة بتعيط و حاسة ان كل أحلامها اتدمرت
في الوقت ده وفاء و شيماء رنو الجرس
امل:حاضر جاية اهو
فتحت لقت شيماء و وفاء
شيماء دخلت علي اوضة شهد لقتها قافلة الأوضة
شمياء:شهد افتحي انتي بتعيطي ليه
شهد:سيبيني يا شيماء عايزة اكون لوحدي
و كانت ملك لسة حضناها و بطبطب عليها
شيماء:لا مش هسيبك عشان انتي حتة مني انتي اختي و صاحبتي فاكرة لما كنا صغيرين و واحدة فينا تغلط كانت التانية بتستخبي في حضن التانية عشان متحسش بالوجع مش هسيبك و امشي و اقول براحتك انتي حتة من قلبي بحس بيكي حتي وانتي عاملة نفسك مبسوطة اوعي تفكري اني مش عارفة انك لما جيتيلي انك مش زعلانة لا عارفة بس قولت اسيبك و هتحكيلي
شهد في اللحظة دي فتحت الباب و شمياء خدتها في حضنها و بتهديها
________
امل :كنت عارفة ان محدش هياثر عليها غير شيماء
وفاء:عايزة اتكلم معاكو انتي و الحاج عبدلله و سيبو شهد مع شيماء دلوقتي
امل :اتفضلي يا وفاء في الصالون
دخلو الصالون
امل :تشربي ايه يا وفاء
وفاء:هو ايه اللي اشرب ايه يا امل انا مش ضيفة
انا عايزة افهم شهد مالها بتعيط ليه
عبدلله :بنتي عايزة تشتغل يا ام شيماء
لو بنتك طلبت منك تشتغل هتوافقي
وفاء:ولله لو بنتي عايزة اسيبها تشتغل طالما هي عايزة تعتمد علي نفسها
امل :و الناس يا وفاء هيقولو علينا ايه
وفاء:الناس كلها عارفة أخلاق شهد و هيقولو ايه هيقولو ان انتو عرفتو تربو صح و هيقولو أنها ب 100 راجل
لما شهد قالتلي كدا زعلت بس من جوايا فرحت بيها أنها عايزة تشيل مسؤلية من دلوقتي ده بدل ما تشجعوها بتحبطوها بنتكم مغلطتش ولا عملت حاجة غلط ولا ايه يا حاج عبدلله
عبدلله :عداكي العيب يا ام شيماء لكن
وفاء :مفيش لكن يا حاج قومي يا امل صالحي بنتك و خديها في حضنك وانت كمان يا حاج عبدلله
عن اذنكم ادخلها
عبدلله و امل بصو لبعض و فهمو انهم كسرو شهد و كانو هيهدو حلمها
وفاء دخلت ليها و خدتها في حضنها
شهد بعياط:مش عايزة احول من الجامعة دي يا ماما وفاء مش عايزة
وفاء:غصب عن اي حد هتفضلي فيها و هتشتغلي يا شهد
و طول ما انا عايشة محدش هيقدر يزعلك انتي بنتي التانية
شهد :ربنا يخليكي ليا يا ماما انا بحبك اوي
في اللحظة دي دخل امل و عبدلله
عبدلله: شهد
شهد بصتله و هي في حضن وفاء :نعم يا بابا
عبدلله :انا موافق يا شهد بس بشرط
شهد :شرط ايه يا بابا
عبدلله :الشغل مياثرش علي مستواكي في الدراسة
شهد :بصت لوفاء و حضنتها انتي احسن فوفا في الدنيا بحبك لالا بعشقك يا فوفا
و جريت علي باباها :موافقة يا بابا ...موافقة يا حبيبي و أوعدك اني هجيب تقديرات عالية جدااااا
كلهم فرحو و شيماء و وفاء روحت و شهد و ملك نامو و مامتها و باباها خلاص اقتنعو
___________
اما مازن في الوقت ده روح البيت بعد ما وصل خالد و رانيا و مروة مامتها
_________
في البيت عند رانيا
كانت رانيا بتفكر في ريماس و عارفة ان ريماس بتحب مازن لكن مازن ميعرفش حاجة
مروة مامتها دخلت الأوضة :انتي لسة صاحية يا رانيا
رانيا :ماما ... اتفضلي
خالد نام
مروة :اه يا حبيبتي نام الحمدلله
مروة قعدت جمبها علي السرير و قالت
عارفة يا رانيا من يوم ما ياسمين (مامت مازن )ماتت و وصتني عليه قبل ما تموت كان مازن عنده 10 سنين وقتها مكنش بيقعد كتير ما ابوه ربيته معاكي و كبر دلوقتي و بقا راجل الله يرحمك يا ياسمين كان نفسي تشوفي مازن دلوقتي بقا عامل ازاي ابوه مات من 5 سنين لما ابوه مات كان مازن يجي يقولي انا هشتغل و هنجح و هثبت نفسي بنفسي حتى جوز خالتو معتمدش عليه و فعلا نجح و بقا مخرج كبير و مشهور و سنه صغير
رانيا :ياااه يا ماما فكرتيني بطنط ياسمين كانت طيبة اوي عكس طنط رباب نهائي
مروة :رباب عكسها فرق السما من الارض يا بنتي مازن جدع و حنين و ابني اللي مجبتهوش ابني الكبير اللي بجد
رانيا: ههههه كل ده مدح في مازن يا ماما
مروة :مازن ابن حلال و يستاهل كل خير
يلا يا روكا نامي
رانيا :خليكي نايمة جنبي يا ماما
مروة:لا هنام جمب خالد عشان لو صحي بالليل
باست رأس رانيا و خرجت
و رانيا نامت
______________
في الصباح
عند شهد صحيت الفجر صلت و وقفت في البلكونة كعادتها تدعي ربنا و هي باصة للسما و رنت علي شيماء تصلي الفجر و قرأت قران لحد ما الشمس طلعت و حضرت الفطار و صحت ملك و بعدها لبست و نزلت عشان تروح تحضر الانترفيو في المطعم
_____________
فيلا شاهر والد زياد
زياد نزل و ريماس و مامته وباباه كانو بيفطرو
زياد :صباح الخير
رباب و ريماس و شاهر:صباح النور
و هما بيفطرو الجرس رن
ريماس قامت تفتح كان قلبها حاسس انه هو
ريماس بفرحة :ابيه مازن
اتفضل
مازن:صباح الورد يا ريمو
ريماس:عامل ايه دلوقتي
مازن تمام الحمدلله
ريماس :تعالي افطر بقا شكلك مكلتش حاجة
مازن دخل معاها
مازن :صباح الفل
رباب :ايه صباح الفل دي يا مازن قول Good Morning
مازن :حاضر يا خالتي
رباب :مش اسمها قولتلك خالتي اسمها ..
قاطعها مازن :ما خلاص يا خالتي بقا عديها
زياد و ريماس ضحكو
رباب بصتلهم و كملو اكل
في اللحظة دي موبايل مازن رن و كانت رانيا
مازن:روكا ازيك
خالد عامل ايه و ماما مروة
رانيا:كويس الحمدلله بيسلم عليك
انا اتصلت عشان...
مازن قاطعها :انتي اجازة يا بنتي كام يوم لحد ما خالد يقوم بالسلامة
رانيا باستغراب :انت عرفت ازاي يا مازن اني اجازة
مازن :عارف انك هتقولي كدا ولله
