ومن الحب ما قتل (مكتملة)

الفصل الثانى

تمر الايام لتبدء جميله باخذ جلسات العلاج الطبيعي 

حسان : ازيك يا دكتوره حالتها ايه انهارده
الطبيبه : احسن كتير طول ما هي متابعه بالجلسات حتتحسن بسرعه
حسان : مش الاحسن تيجي انتي كل يوم هنا بدل ما هي بتتعب لما تنزل المركز
الطبيبه : لا طبعا خلينا علي البرنامج ده يوم هنا و يوم في العياده لان العياده فيها اجهزه اكتر و مبتنفعش نخرج بيها في البيت

تنتهى الجلسه و تتحدث جميله الي حسان بحرج
جميله : انا ممكن اطلب منك طلب
حسان : طبعا
جميله : بكره ممكن تقول للسواق ياخدني بدري شويه عندي مشوار قبل ميعاد الجلسه
حسان : مفيش مشاكل ؛ بس انا مش عايزك تتعبي شوفي عايزه ايه و انا ابعت اي حد يخلصلك مشوارك
جميله : لا مينفعش ؛ انا اصلي لازم اروح الشغل اشوف ايه الدنيا اختفيت كده بقالي اكتر من اسبوع و موبايلي ضاع وقت الحادثه و مش بحفظ ارقام للاسف فحتي معرفتش اكلم حد ولا حد يكلمني عشان اخد اجازه و بصراحه كفايه كده عليك انا لازم ابدء اظبط اموري عشان ارجع شغلي و اشوف شقه
حسان بضيق: هو انا اشتكيلك
جميله : انا عارفه انك بتعمل كده عشان احساسك بالذنب من ناحيتي بس صدقني ده قدر و انا مش محملاك اي ذنب و كفايه وقفتك معايا بس مش حقدر افضل قاعده هنا اكتر من كده
حسان بهدوء : طيب بصي حتفق معاكي علي حاجه ؛ شغلك خدي منه اجازه مرضي لحد اما تخفي ووعد اول ما تخفي انا بنفسي حوصلك لبيتك الجديد و حساعدك في الفرش و بعد كده لو عايزه متشوفيش وشي تاني حسيبك علي راحتك
جميله : هههههه خلاص اتفقنا
حسان : انتى شغاله فين بقي مقلتليش ؟
جميله : شركه تسويق عقاري في الرحاب
حسان : شغاله ايه فيها . مهندسه ؟
جميله : ههه يسمع من بوقك ربنا لا للاسف مندوبه يعني بقنع العملا بالوحدات و ليا نسبه علي كل وحده و الكام شهر اللي فاتو جه موظف جديد بصراحه شاطر اوي خلاني معرفتش ابيع ولا شقه ولا حتي عربيه فول .... عشان كده المرتب يعني مقدرش يشيل مصاريفي لان الشغل اساسه العموله مش المرتب
حسان : اممممم بصي انا دايما بقول للموظفين عندي طالما منجحتش في شغلتك تبقي مش دي الشغلانه اللي ممكن تكبر فيها ؛ يعني طالما جه حد حسسك انه اشطر منك في شغلك يبقي لازم تدوري علي شغل غيره تكوني اشطر واحده فيه
جميله :انا اشتغلت حاجات كتير اوي بس انا المهم عندي شغل يدفع الايجار و اعرف احوش منه فلوس اقدر اسافر بيها سوريا ادور علي اهل امي يمكن يكونو احن عليا من اهل بابا
حسان : هو اهل باباكي منين ؟
جميله : من بورسعيد انا عشت هناك عمري كله و جيت القاهره بعد اما اهلي ماتو زي ما قلتلك عشان اشتغل و اسافر سوريا

تمكث جميله اكثر من شهر في بيت حسان و شركائه و اعوانه غير راضيين عن ذلك و منهم احمد صديقه و شريكه 

احمد : انا مش فاهم سبب تمسكك بالبنت دي  ؟ انت عارف القوانين كويس محدش يدخل حياتنا الا بموافقه الكبار حتي لو كانت خدامه في بيتك
حسان : و انا اتكلمت معاهم ؛ هم عاملين القوانين دي علشان يحمونا من الجواسيس بتاعه البوليس و اتحرو عنها كويس ملهاش اي صله و بعدين ازاي ممكن تكون جاسوسه و الحادثه كانت ممكن تموتها اصلا ؛ البوليس ممكن يخاطر بالشكل ده بس لمجرد انه يدخل جاسوسه البيت
احمد : هو صعب بس مش مستحيل و انا مش بقول ان حد زارعها وسطينا انا خايف لحسن حد يجندها
حسان بحسم : بص انهي الحوار ده الكبار اه معترضين بس قالو انه مفيش خوف و كشفو عليها و سألو علي اهلها في بورسعيد و كله طلع تمام و انا حاطط وراها عيون في كل حته و هي اصلا مش بتخرج من البيت الا عشان العلاج و بيكون معاها السواق بتاعي يعني الدنيا امان و كلها كام يوم و تخف و الموضوع يتقفل خالص
احمد : يا ريت خلينا بقي نرجع نجتمع تاني في بيتك
حسان:و ايه الاخبار الجديده؟
احمد:الشحنه اتسلمت بس كان فى شويه مشاكل و عدم وجودك خلى الفران تخرج من جحورها
حسان بشرر:لا ادخلهالك جحورها تانى و لا يهمك و لاااا...... اخلصك منها خالص ايه رايك
احمد:انت معاك open card من الكبار تعمل بيه اللى انت عاوزه
حسان بثقه:يبقى جهز الرجاله خلينا ننظف البلد من الفران