Man-made (Completed)

' little wishes '

Check Zawgyi version below ⬇️

#Unicode

တံခါးပေါက်ကြားမှ အလင်းတန်းလေးတွေသည် အရုပ်မလေးနေထိုင်ရာမှောင်မည်းသောဗီဒိုထဲသို့ ဝင်ရောက်နေသည် ။
အသက်မဲ့မျက်ဝန်းစိမ်းတစ်စုံသည် ထိုအပေါက်‌တွေမှနေ၍ အပြင်လောကကို ငေးကြည့်လို့‌နေသည် ။
ခံစားတတ်လျှင် မျက်နှာသေပေါ်၌ မိမိလိုချင်မက်မောလွန်းလှ‌ပါသောပစ္စည်းလေးကိုပိုင်နင်းသောသူတစ်‌ယောက်အား မနာလိုအားကျမှုတွေဖြင့် ငေးကြည့်နေရသည့်ကလေးငယ်လေးအသွင်ကို ဆောင်နေမှာသေချာပါသည် ။

နွေးထွေးသော ဝါဖန့်ဖန့်မီးရောင်အောက် ‌သခင်သည် နှစ်လိုစွာရယ်မောနေလေရဲ့ ။
သခင်၏ အကြည့်ရွှန်းရွှန်းသည် မိန်းမလှလေးတစ်‌ယောက်၏ မျက်နှာအမူအရာတွေမှ ထပ်ကျပ်မခွာ ။
တခါတခါ နင့်နဲစွာငေးနေတတ်ပြီး ၊ တခါတခါ အကြင်နာတွေကိုမဖွက်ထားနိုင်တော့ပဲ ဝေကျသွားတတ်သည် ။
အဲ့ဒီကြည်ပြာရောင်မျက်ဝန်းတွေ . . .။

အိုး သခင်ပျော်နေတဲ့ ပုံစံလေးဟာ Rosy မျက်လုံးဖွင့်ပြီးမက်တဲ့ စိတ်ကူးယဉ်အိပ်မက်တွေအတိုင်းပါပဲ . . . ။
လှပကာ အနှိုင်းမဲ့သည် ။
ပိုင်ဆိုင်လိုပေမယ့် လက်လှမ်းမမှီ ။

ဒါပေမယ့် ဘာအရေးလဲ Rosy ဟာ သခင့်အပြုံးတွေကို မထိတွေ့ရပေမယ့် ၊ သခင့်ရဲ့ဒဏ်ရာတွေကိုတော့ လက်ခံရပါသည်။ 
သခင် သူမနဲ့ပြုံးပြီးရယ်ပါ ။
Rosy က မျက်ရည်တွေမရှိပဲ ငိုကြွေးပေးမယ်လေ  ။
ဒီလိုလုပ် . . .
သခင်နဲ့ Rosy ဘဝတစ်ခုတည်းကို နှစ်ခြမ်းခွဲပြီး နေထိုင်ကြရအောင်လေ ။ 
ရယ်စရာရှိရင် သခင်ရယ် ၊ ငိုစရာရှိရင် အရုပ်မလေးကငို‌မယ် ။

သည်လိုအကြံတွေရ‌တော့ သခင့်ရဲ့ စကားတစ်ခွန်းကို ကြားယောင်မိသည်။ 

" ငိုလို့ရနိုင်တဲ့ မျက်ရည်အိတ်တွေထည့်ပေးထားပေမယ့် အတုအယောင်နှလုံးသားနဲ့ဆိုတော့ ဒီအရုပ်ကဘယ်ငိုတတ်ပါ့မလဲ . . . "

မျက်ရည်တွေက တန်ဖိုးရှိတာကြောင့် နိမ့်ကျတဲ့အရုပ်ကလေးနဲ့ မထိုက်တန်တာနေမည် ။
သခင်က မျက်ရည်တွေပေးသနားပေမယ့် Rosy သည် မငိုကြွေးနိုင်ပေ ။
Rosy မျက်ရည်တွေကျတတ်ဖို့ ဘယ်လိုလုပ်ရပါ့ ၊ Rosy က အသုံးမကျလိုက်တာ . . . ။
သခင်ပြောသလိုပဲ  Rosy ငိုရင် အံ့ဖွယ်ပဲနေမည် ။