اسركيبت ** معاناه ما بعد منتصف الليل **
عقلي : هتنامي ؟؟
انا : المفروض يعني الساعه واحده ...
عقلي : اها هتنامي كده ...
انا : ولا هنعرف ننام في ام الليله السوده دي ..عايز حاجة. . ايه متعتبتش من التفكير ..
عقلي : مينفعش تنامي كده .. لازم انكد عليكي الأول. ..
انا : مش كل يوم ... اتخمد احسن ..
عقلي : لا قومي كده صحصحي...
انا : امممم ... بس انا ماليش مزاج اعيط النهارده خليها بكره والنبي. ..
عقلي : والله ابدا .. ده اوبشن يا حبيبتى يالا جهزه انا محضرلك كام حاجه كده إنما ايه عظمه ...
انا : ارغي. ..
عقلي : عندك كام سنه دلوقتي. .
انا : 21و نص ..
عقلي : وعملتي ايه في ال 21سنه و نص اللي فاتو ولا حاجه لسه زي ما انتي. .. خيبه ولا اتخطبتي ولا اشتغلتي ولا روحتي الساحل حتي .. قاعده كده زي برطمان المخلل. ..
انا : تصدق صح بس انا ممكن اعمل كل ده عادي ..
عقلي : يا سلام ازاي ده يا روح امك. .
انا : ولا متغلطش. .
عقلي : طب قولي ازاي يا حب ..
انا : انت ناسي انا معايا كليه ايه .. لغات و ترجمه إسباني عارف الكول سنتر إسباني بيقبض كام 6 آلاف جنيه ... و ده اقل وظيفه تخيل بقا 6 آلاف كل شهر ده انا بشبرق نفسي ب ألفين مابالك ب 6 و ...
عقلي : بس بس بس ... اتوكسي
انا : هقوم اخبط فصوصك دي قي الحيطة. .
عقلي : يا شيخه اتنيلي انتي من غيري ولا حاجه. ..
انا : ياسلام يا ابو الذكاء ما انت اللي مضيعنا. .
عقلي : ما انتي مش بتشغليني...قولتلك استخدميني بدل ماانتي بتعملي حاجات غريبه كده و بتلبسي في حين و تيجي تعيطي الحقني يا ابو الفصوص مش كده ..
انا : خلاص أنجز عشان اتخمد في ام الليله دي ..
عقلي : هاهاهاها تتخمدي فين ده انا هطلع عينك... قولتيلي انك عايزه تشتغلي بالاسباني. . مش كده .
انا : اها
عقلي : منشكحه اووي و فخوره. .. ده انتي مبتعرفيش تقولي كلمتين صح اخرك صباح الخير و بتتلخبطي هي buenas ولا buenos
انا : .....
عقلي : بصيلي هنا بتعرفي تتكلمي إسباني
انا : لا
عقلي : اساسا مبتعرفيش تتكلمي عربي و الكلام بيطلع مخارجه في داهيه ..
انا : صح .. معاك حق .. طب نعمل ايه هاه. ..
عقلي : ما تنامي اللغه.. خودي كورسات مثلا ..
انا : يا ابني انا كحيانه مش معايا ولا جنيه تقولي كورسات انت عارف الليفل بكام ب 700 جنيه يعني انا عايزه فلوس عشان احسن اللغه عشان أشتغل و اجيب فلوس ايه الذكاوه دي ...
عقلي : خلاص بلاش ... ما تكملي كتابه روايات ممكن تنشهري مثلا و كمان ممكن تنشريها هي جات عليكي. .
انا : انت مقتنع ب اللي بتقوله ده ..
عقلي : فيها ايه .. ده علي غزلان نزل كتاب السنه اللي فاتت و مكنش ملاحق من المبيعات هو احسن منك في ايه مش أتفه منك يعني ..
انا : والمصحف بالكوبايه وفي وشك ..
عقلي : خلاص اهدي. ... بس قوليلي مش موافقة ليه .
انا : يا ابني الروايه الاخيره يدوب كانت بتجيب لايكات بالعافيه و التعليقات يدوب يعني شويه استيكرز و متابعه و كمان مكنتش عاجبه كتير ليه بقا اهزأ نفسي اكتر من كده و ماشاء الله باقي الروايات بتجيب لايكات و كومنتات كويسه اروح انا فين وسطيهم. .
عقلي : ايوه صح .. ده حتي في الحاجه اللي بتحبيها فاشله فيها ..
انا : شوفت بقا ...
عقلي : اها صحيح خليتي خديجة ترجع ل عاصم لية بعد اللي حصل ...
انا : المتابعين عايزين كده. .
عقلي : اها المتابعين. .. مش عشان انتي اللي مهزأه و معندكيش كرامه .
انا : تؤتؤ عشان الفانز حبايبي. .
عقلي : اها بس انتي كنتي أوفر شويه ..
انا : بجد .
عقلي : اها .. مش واقعيه كده ... و في حاجات مسروقة
انا : امممم ماانت اللي بتجيب الأفكار ده ...
عقلي : يعني الغلط مني ..
انا : اها منك شوفت بقا انت ظالمني ازاي ..
عقلي : معلش المره دي ... طب هتفضلي قاعده لوحدك كده ..
انا : البيت كله نايم مافيش غيري انا وانت يا ابن الجزمه. .
عقلي : متغلطيش لو سمحتي
انا : صح انا كده بظلم الجزمه ده ليها فايده عنك ..
عقلي : بت اتلمي. ..
انا : يا عم اقعد بقا قهرتني و كرهتني في حياتي منك لله ..
عقلي : بتدعي عليا ... طيب يالا يا سينجل يا بائس. .
انا : انا سنجل و بائس
عقلي : ايوه و دي حاجه بقولها بالأمانة
انا : امانه
عقلي : ايوه امانه
انا : طب وحياه امك ما انا هسيبك ... تعالي بقا عشان انا مستحمله تقطيمك فيا و احباطك اللي وصلني للمريخ بصاروخ يا تربيه زباله ...
عقلي : يالا يا سنجل ده انتي بطفشي الناس بدبشك و أسلوبك الواطي
معدتي : ايه يا شباب انتو هتتخانقو ايه مش مراعين وجودي
انا : يادي النيله ..جايه ليه دلوقتي روحي اتخمدي مش ناقصاكي
معدتي : اتخمد ازاي وانا جعانه
انا : نعم يا روح امك جعانه ازاي يعني .. ده انتي طافحه نص صنيه مكرونه لوحدك يا مفتريه من ساعه
معدتي : عادي جعت تاني .. تعالي هنفتح التلاجة نطقش بضتين
عقلي : ايه ده هنفتح التلاجة. .
انا : اقعد بقا ... مش هنفتح تلاجه ولا هناكل. . احنا فتحنا التلاجة النهارده 39 مره و البوتاجاز شغلناه 50 مره للشاي و النسكافيه بس ...ده اللي يشوفنا يقول علينا مجانين. ..
معدتي : بس جعانه بردو حتي اسمعي ( بلوبلوبلو)
عقلي : اها قومي هاتي اكل و انا هفتح التلفيزيون. .
انا : ما نعمل فرح بالمره ... بقولكم ايه انتي اصبري للصبح و هفطرك وانت اتخمد مافيش افلام ولا مسلسلات إلا بكره حرام الساعه 3 و منمتش. .
عقلي : هتنامي من غير ما تصلي الفجر يا جاحده
انا : لسه فاضل ساعه و نص عالفجر اكون نمت ..
معدتي : (بلوبلوبلوبلو)
انا : قوم افتح التلفيزيون وانتي تعالي هطفحك يخربيت اهاليكم ...
&& معاناتي بعد نص الليل .
&&مين كده 😂😂
