"إنتمائي"

(2)💛

✨رواية "إنتمائي" روايات كلوفر✨
..
الحلقة (2)
..

عون:(سيبتهم ومشيت للمطبخ وهنا شفتها..نفس الملامح نفس كل شي .. بنتي كبرت تمت أطول وأحلى❤)
إنتماء طبست راسها:انت اكيد ولد عمو جواد صح؟
عون تنهد بعد سمع صوتها بس غصه في قلبه بعد م عرف انها مش متذكرته : أها ي إنتماء (وفي خاطره أول مره نقول اسمها بدون ياء التملك #إنتمائي )
إنتماء ابتسمت:تعرف اسمي
عون حاول يكون ثابت و م يبينش شي:اها بنت عمي اكيد بنعرف اسمك.. وحط الاكياس وطلع تحت مراقبة عيون إنتماء اما هو فكان قلبه ينبض بسرعه عليها نفس المشاعر يلي من طفولتهم لتوا عند عون.
..
Klo0ver_Novels
..
فرشوا في الجنان وجهزوا الفطور والتموا العيلتين وعون يتفادى فيها م يبيش عيونهم يتلاقن..وكان ناوي ميطولش في قعدته معاهم ويتحجج بالشغل
إنتماء بعفويه:عمو جواد لمَ جيتنا الخميس يلي فات وعدتني ب حاجه تتذكر؟
عون بدون شعور ولا إراده يتأمل فيها كيف تحكي❤
جواد ضحك: اووو اينمي واقسم بالله نسيت خلاص ساهل لمَ نروحوا نجيبها لكِ
أحلام فنصت في إنتماء: تحشمي من امتى تطلبي من حد غير باتك؟
أحمد:خليها جواد عمها مش غريب
جواد:الله يسامحك ي مرت خوي انا غريب عليها يعني؟
أحلام:لا والله مش هذا المقصود لكن م نبيهاش تتعود عليها
أنوار:غير اسكتي البنت بنتنا حتى نحنَ راه

عون شاف لخوه:هيا كان كملت نمشوا للإسطبل
معين ياكل:نبي ناكل، استناني
إيلاف:حتى أنا بنمشي نشوف الخيول عادي؟
عون ابتسم:خلاص جيبي معاكِ معين
أحلام:ضمن المطبخ انتِ واختك وبعدها ديرن يلي تبنها
عون شاف ل إنتماء: تمشي حتى انتِ؟
أحمد قاطعهم :اي امشن غيرن جو قبل ما يجي إياد😂
جواد:يهديه الله بنات زي هذين مفروض على راحتهن م ينخافش عليهن بكل

..
Klo0ver_Novels
..
بعد نص ساعه
إيلاف جايه من بعيد تنادي :عوون
إلتفتلها وشيرلها:تعاالي
إيلاف:وااك من الشوك
عون ضحك:وين معين (وفي خاطره وين *إنتمائي*؟)
إيلاف:إنتماء تغسله في يديه تو يجي،طبعاً إنتماء خوافه مش كيفي نحب الخيول
عون ابتسم:أختك زمان ديما تبكي
إيلاف:حي حي لعند توا تتفرج ع توم وجيري وتبكي ع القطوس يلي كمل عمره جعان😂
عون ضحك:مش طبيعيه انتِ صغيره ولسانك طويل
إنتماء من بعيد:إيلاااف
التفتوا الاثنين
إنتماء: تعالي خوذي معين
إيلاف ضحكت:مش قتلك خوافه
عون ابتسم بعيون كلها حُبْ:ما عليك فيها تو نمشيلها
إنتماء تشوف ل عون جاي جيهتها وفي خاطرها(ليش نرجف كل م نشوفه؟)
عون شاف ل معين:جري امشي للإسطبل بروحك راجل انت
معين مشا يجري وهو يردد: انا بطل
عون شاف ل إنتماء: تبيش تجي انتِ؟
إنتماء:انلااء عندي م ندير
عون ضحك وضحكته كانت كفيله بأنها تقيم راس إنتماء ويتلاقن عيونهم❤
عون:صار عندك م ديري؟
إنتماء: اهااا
عون ب عيون كلها حنيه ❤ : يعني مش خايفه؟
إنتماء رفعت راسها من جديد:لاا من شنو بنخاف؟؟
عون :باه هي تعالي معايا

إنتماء بخوف :لالا عوّن والله م نحبهن
عون :باه انا نحبهن ؟
إنتماء : كيف ؟
عون فطن لروحه : ماهو انا نحبهن واختك تحبهن .. تي تعالي بي( ومسك يدها بعفوية ومشوا لعند الخيول ❤)
إنتماء تنحي في يده : عوّن بالله م نبش م نبش فكني عوّن 😭
عوّن م كأنش يسمع فيها بس عاجبه كيف تقول في اسمه ❤
إيلاف تضحك : هي عاد يا خوافه 😂
مُعين : إينمي م تختفيش انا معاكِ
إنتماء ضحكت : باه خلاص نصبي غادي
عوّن بجديه : لالا هنا وبتركبي عليه اخرى
إنتماء : انسى عوّن مستحيل
عوّن : انا قلت تركبي يعني تركبي ؟
إنتماء بلعت ريقها : ءء عون الله يربحك
إيلاف: باه نركب نا قبلها وبعدها هي عشان تشجع .
عوّن شاف لإنتماء : يا كشفه كأنها اكبر منك🤦🏻‍♂️

..
Klo0ver_Novels
..

ركبت إيلاف وهي فرحانه خذت لفه بالحصان وكانت بطير من الفرحه عكس إنتماء يلي كانت بطبعها م تحبش الحيوانات بكل ، ولما نزلت إيلاف ركب مُعين يلي حتى هو كيف إيلاف ويلي عوده ع الشيء هذا عوّن يلي حالياً هوايات عوّن نفسهن هوايات مُعين .
ولما جا دور إنتماء هربت 😂 ورفضت رفض تام انها تركب ومشت تجري للإستراحه مع ضحكات معين وإيلاف 😂💛
اما عوّن كان كيف المسحور بيها م يشوفش في حاجه غيرها ❤
اما هي فَ تحس بشعور غريب اتجاهه بدت تميل له لكن ترفض في فكرة الحُب هذه مستحيل تفكر في الإرتباط وهي عندها خو زي إياد مستحيل .

..
Klo0ver_Novels✨
..

بعد مرور يومين ..
في نفس المكان عند الخيول كان عون واقف وسارح ، إنتماء ماسكة سفره فيها قهوه وحلويات العشيه : عوّن
عوّن بدون م يشوفلها : نعم ؟
إنتماء : القهوه ؟
عوّن التفت : حطيها لوطه
إنتماء حطتها وجت بتمشي وقفها صوت عوّن يلي قال لها : استني نبيك
إنتماء بإستغراب : انا ؟
عوّن شاف يمين و يسار : هو في غيرنا هنا ؟
إنتماء ضحكت بعفوية : لا بس استغربت
عوّن : إنتماء عندك تليفون ؟
إنتماء طبست راسها :....#يتبع