🍁الحلقـــ24ــة : القســـ2ــم 🍁
✳♥♥✳
كبس الكاب مليح على وسطو و خزر للمرايا قدامو ...مسح البخار ايلي مضببها بكف يدو وثبت في ملامحو ...مشط شعرو ومسد لحيتو ...يقولو ايلي النساء تحب اللحية ...ويقولو انو الراجل ايلي حرجو اكحل يكون مرغوب وبشدة من النساء...اما اذاعة قالوا هاذي طلعت كذابة ...هو بعمرو ماكان مزهر مع النساء...تي اصلا بعمرو ماكان قريب منهم ...في عمرو عجبتو وحدة قعد لهاك اللحظة مليع منها ...تنهد بصوت مكتوم ومشى باش يكمل يحضر روحو ...الحكاية ماخذاتش منو بارشا... لبس و ريڨل جوو فيسع وهبط ، عرضتو الخديمة "سي أركان ...قهوتك حاضرة "
جاوبها وهو يكمل ثنيتو لباب الخروج " زيدها السكر واشربها وانت "
ضمت الخديمة شفايفها لبعضهم وتبعتو بعين ضيقة لين غاب عليها ..خسارة لسانو الموذي ...الساعة حليلتو ...ماناقصو شي كان كلام حلو وشوية رقة ...والبنات تهبط عليه بالكدس...
ركب كرهبتو وطول للعنوان ايلي في راسو ...هو وبالوسائل الخاصة متاعو قادر يطلع ويجيب اي حد حتى لو كان تحت الارض ...حبس قدام مكتب للمحاماة و قعد يقرى ويعاود في الاسم ...من بعد هبط و قرر يصدم ...استقبلتو السكريتار وخلتو يستنى شوية قبل ما تدخلو لعرفها ...المحامي كان راجل كبير شوية يمكن ستيني والا في اخر الخمسينات...اما عينيه كانت تلمع في لمعة بكلها شباب و فطنة ...هاكي علاه اول ما دخل اركان عقد حواجبو وبقى يتفكر وين راه .
تبسم اركان ومدلو يدو "عسلامة ماتر ...انا اركان سويـ...."
قص عليه وهو ياقف من بلاصتو "سويييدي!! ...ولد سي عادل السويدي !؟...يا مرحبا "
من غير مقدمات عنقو و مسد على ظهرو "مااااشاء الله كبرت خليتك قد الطرف ..." شاورلو ع الكرسي " هيا تفضل ..."جبد تاليفون بيروه " شنوة تشرب ...خليني نفرح بيك "
اركان " لا يعيشك سي فريد. ...شربت قهوتي قبل مانجي لهوني "
فريد "لا ...عيب ...ولد سي عادل يجيني لهوني وانا نخليه على ريقو ؟!..." طلب السكريتار وقالها تجيب مايلزم لضيفو ورجع قعد في كرسيه " اييييه ...قداش تعدت سنين ...وينهي اختك؟! ...راهي صبية تو ...وعمتك ؟! ...اه ...مرا هايلة هاكي "
بلع اركان ريقو " عمتي....يعيش راسك ...ماتت عندها قريب العشرة سنين ...."
فريد متأثر " الله اكبر ...وربي يرحمها...كانت مرا عظيمة "
اركان " ووفاء توا شادة بلاصتي في معامل الكوسمتيك في فرانسا "
فريد باعجاب" ماشااااء الله ...يعني نفهم انك رجل اعمال ناجح "
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Historia Corta★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
